Bu "mismar" Qarabağda erməni separatizminin bir daha olmayacağına təminatdır...
Aydın Hüseynov: "Bizim suverenliyimizin qarantı Azərbaycan Ordusudur"
"Xankəndidə verdiyim səs, o qutuya atdığım bülleten sadəcə olaraq bülleten deyildi. Bu, erməni separatçılarının tabutuna vurulan son mismar idi". Bu sözləri Prezident İlham Əliyev andiçmə mərasimindəki nitqində söyləyib.
Maraqlıdır, Prezidentin məlum fikrində erməni separatizminin Qarabağda bir daha baş qaldıra bilməyəcəyinə qarantiya nə qədərdi?
“Prezident İlham Əliyev seçki qutusuna atdığı bülletenlə Azərbaycan ərazisində erməni separatizminin mövcudluğuna birdəfəlik son qoyulduğunu bir daha dünyaya nümayiş etdirdi"
Millət vəkili Aydın Hüseynov "Bakı-Xəbər"ə açıqlamasında qeyd etdi ki, ölkə prezidentinin qətiyyətli fikri birbaşa Azərbaycan dövlətinin qəti mövqeyinin ifadəsidir. Eyni zamanda, bizim suverenliyimizin qarantı Azərbaycan Ordusudur. Ölkə başçısı İlham Əliyev andiçmə mərasimindəki nitqində də bir daha qeyd etdi ki, Azərbaycan Ordusu bundan sonra da qüvvətli olacaq. Azərbaycan Ordusu gələcəkdə də müasir silahlarla təmin olunacaq".
Millət vəkilinin sözlərinə görə, dövlət başçısının ailəsi ilə birlikdə səs vermək üçün məhz Xankəndi şəhərini seçməsi həm mənəvi, həm də siyasi cəhətdən son dərəcə böyük əhəmiyyət kəsb edən bir qərar oldu: "Erməni separatçıları ölkəmizə qarşı öz qanlı cinayətlərinə ötən əsrin 80-ci illərinin sonlarında məhz bu şəhərdə başlamışdılar. Cənab Prezident İlham Əliyev isə, fevralın 7-də seçki qutusuna atdığı bülletenlə Azərbaycan ərazisində erməni separatizminin mövcudluğuna birdəfəlik son qoyulduğunu bir daha dünyaya nümayiş etdirdi və özünün də dediyi kimi, erməni separatçılarının tabutuna son mismarı vurdu".
A.Hüseynov hesab edir ki, Prezident İlham Əliyevin atdığı bütün addımlar ölkənin təhlükəsiz gələcəyinin təmin olunmasına dəqiq hesablanıb: "Bu gün Azərbaycan Ordusu çox güclüdür və ötən il cəmi bir neçə saat davam edən antiterror tədbirləri bunun bariz nümunəsidir. Hazırda Ordumuzun gələcək inkişafı ilə bağlı lazımi addımlar atılır. Silah-sursat, texnika alınır, yeni silahlı birləşmələr yaradılır. Azərbaycan Ordusunun qüdrətli və qüvvətli olması bizim suverenliyimizin qarantıdır. Eyni zamanda, Azərbaycan Ordusunun gücü erməni və onları dəstəkləyən ölkələrə lazımi cavabdır. Ordumuzun qüdrətlənməsi, daha da inkişaf etdirilməsi və indiyə qədər əldə etdiyimiz nailiyyətlər Prezident İlham Əliyevin uzaqgörən siyasəti ilə bağlıdır".
Günel CƏLİLOVA
