Rusiya "Cermuk" suyundan imtina edir - Paşinyana daha bir mesaj...
Elçin Qurbanov: “Paşinyanın Moskvanın orbitindən çıxmağa can atması Rusiyanın ardıcıl təzyiqlərinə tuş gəlməsi ilə nəticələnir”
Vladiqafqazda “Cermuk” mineral suyu içən kişinin qida borusu yanıb. Bu barədə Şimali Osetiya Prokurorluğu məlumat yayıb. Bildirilir ki, Şimali Osetiyada “Cermuk” suyu içən kişinin boğazı yanıb.
Ermənistandan gətirilmiş yeni, açılmamış mineral su şüşəsində sirkə turşusu olduğu üzə çıxıb.
Bölgədə suyun satışının dayandırılması barədə respublika rəhbəri Sergey Menyailo göstəriş verib.
Hadisənin aydınlaşdırılmasına Daxili İşlər Nazirliyi, Prokurorluq və “Rospotrebnadzor” cəlb edilib.
“Bu gün məlumat yayılıb ki, Vladiqafqaz sakini “Cermuk” mineral suyundan bir qurtum içdikdən sonra qida borusundan yanıq xəsarəti alıb.
Yeni bağlanmış butulkada suyun əvəzinə sirkə turşusu olub. Vəziyyətdən xəbərim var.
Daxili İşlər Nazirliyi, Prokurorluq və Rospotrebnadzor vəziyyətin aydınlaşdırılmasına cəlb olunub”, – məlumatda deyilir.
Hazırda Rusiya “Cermuk” mineral suyunu satışdan çıxarmağa başlayıb.
Artıq Şimali Osetiya ərazisində 24 bağlama “Cermuk” suyu araşdırma üçün götürülüb, zəruri əməliyyat tədbirləri davam etdirilir.
Bu mineral suyu satan sahibkarlara satışı dayandırmaq tövsiyə olunub.
“Cermuk” adlı mineral su əvvəllər işğalda olan Kəlbəcərin “İsti-Su” mineral su hövzəsindən istehsal olunurdu.
Hazırda isə “Cermuk” yaxınlığında mineral su yatağından hazırlanıb brend ad altında xaricə satılır.
Ermənistanın xaricə əsas ixracatçısı olduğu və ölkəyə yaxşı gəlir gətirən “Çermuk”la bağlı yaranan vəziyyət Putinin Paşinyana göstərdiyi növbəti təzyiq üsulu ola bilərmi?
İqtisadçı Elçin Qurbanov “Bakı-Xəbər”ə açıqlamasında bildirdi ki, Ermənistanla Rusiya arasında davam edən ziddiyyətlər dərinləşməkdədir: “Mövcud olan gərgin münasibətlərin artıq yeni mərhələsi başlanıb. Bunun səbəbi Ermənistan hakimiyyətinin Rusiyaya arxa çevirərək Qərbə üz tutmaq istəyindən qaynaqlanır. Bu mövqe rəsmi İrəvana deyəsən baha başa gəlməkdədir. Son zamanlar baş nazir Nikol Paşinyan və komandasının üzvləri Rusiyanın əleyhinə açıq şəkildə bəyanatlar verirlər. Hazırda Ermənistan iqtisadiyyatı tamamilə Rusiyadan asılıdır.
Moskvanın Ermənistana qarşı təzyiq imkanları kifayət qədərdir. Ermənistanın Rusayaya yeganə çıxış imkanı olan Yuxarı Lars yolunun vaxtaşırı olaraq bağlanması da erməni cəmiyyətini müəyyən çətinliklərlə uz-uzə qoyur. Amma bu da son deyil. Rusiya Ermənistana satdığı təbii qazın qiymətini də artıra bilər. Artıq Paşinyana bu yöndə təzyiqlərin başlandığı haqda məlumatlar yayılır. Hazırda Ermənistan Rusiyadan təbii qazın hər min kubmetrini 165 dollara idxal edir. Rəsmi İrəvan hətta bu məbləği də ödəməkdə çətinlik çəkir. Moskva xəbərdarlıq edir ki, əgər Paşinyan belə davam edərsə təbii qazın qiymət artırılacaq. Çünki Ermənistan Rusiyadan təbii qazı dünya bazarında olan qiymətdən təxminən üç dəfə ucuz idxal edir. Əgər bu qiymətlər artırılarsa, o zaman sosial-iqtisadi böhran yaşayan İrəvan onun qiymətini ödəmək imkanında olmayacaq. Nəticədə isə, Rusiya qazın verilişini dayandıracağı halda, sosial partlayış baş verəcək ki, əhali Paşinyan hakimiyyətinə qarşı kütləvi etiraza qalxacaq. Ermənistanın heç bir manevr imkanları yoxdur. Avropa Birliyinin Ermənistana ayırdığı milyonlarla vəsait Rusiyadan alınan qaza sərf edilərsə, Paşinyanın sosial islahatlar üçün ümid etdiyi maliyyənin səmərəliyi olmayacaq. Nəticədə xalq yenidən ağır sosial tələblərlə etiraz aksiyalarına çıxacaq. Baş verən proseslər göstərir ki, Paşinyanın islahat vədləri heç bir real əsaslara malik deyil.
Qərb Paşinyana maliyyə və siyasi dəstək naminə onun Rusiyanın orbitindən çıxması üçün əsaslı vədlər verib. Kreml çalışır ki, Paşinyanın qərbpərəst siyasətinin qarşısın alsın. Paşinyanın Putinlə siyasi şərtlərlə danışması, Moskvanın orbitindən çıxmağa can atması Rusiyanın ardıcıl təzyiqlərinə tuş gəlməsi ilə nəticələnir. “Cermuk” suyu ilə bağlı yaranan vəziyyət də bunun tərkib hissəsidir. Çünki bu mineral suyun əsas idxalçısı Rusiyadır və Ermənistan ondan yaxşı gəlir götürür. Rusiya bu planı işə salmaqla Ermənistana növbəti mesajını verir”.
Məhəmmədəli QƏRİBLİ
