Yasamal sakinlərindən "İmperial Residence" tikinti şirkətinə ittiham...
İllərdir Bakıda köhnə binalar, həyət evləri sökülür. Yerində isə ya çoxmərtəbəli binalar tikilir, ya da parklar salınır. Bu pilot layihələr həyata keçirildikdə vətəndaşlara kompensasiya məqsədilə ödənişlər edilir. Son zamanlar əmlak bazarında qiymətlərin sürətlə bahalaşması kompensasiya məbləğini aktuallaşdırıb.
Məlumat üçün bildirək ki, Bakının Yasamal rayonu, Z.Əhmədbəyov küçəsində yaşayan bir qrup sakin mənzil problemi ilə üz-üzə qalıb. Vətəndaşların bir qismi evlərinin sökülməsi ilə əlaqədar onlara verilən kompensasiyadan narazıdır.
Narazı sakin Elnarə: “Şirkət yalnız evin içini ölçüb ona uyğun kompensasiya təyin edir, ancaq köməkçi sahələr üçün…”
Elnarə adlı narazı sakin “Bakı-Xəbər”ə qeyd etdi ki, şirkət yalnız evin içini ölçüb ona uyğun kompensasiya təyin edir: “Ancaq köməkçi sahələr üçün heç nə nəzərdə tutulmur. Köməkçi sahə deyəndə evin qabağı, vətəndaşların özləri üçün yaratdığı xırda ölçülü şəraitli sahədir. Orda biz güllər saxlayırıq, evin əşyalarını qoyuruq. Biz bu sahəni qanunən özəlləşdirmişik. Lakin şirkət əməkdaşları həmin köməkçi sahəni hesablamır”.
Sakinləri narazı qaldığı məqamlardan biri də onlara vəd edilən kirayə haqqının olduğu kimi verilməməsidir: “Şirkət sözdə 600 manat verəcəyini deyir, ancaq 400 manat verir. Bu məbləğə indi kirayə ev tapmaq mümkün deyil”.
“Imperial Residence” - Rafael Abdullayev: “Sakinlərə kirayə haqqı 400 manat deyil, 600 manat veriləcək”
Məsələ ilə bağlı “Imperial Residence” şirkəti ilə əlaqə saxladıq. Şirkətin rəhbəri Rafael Abdullayev “Bakı-Xəbər”ə şərhində dedi ki, yeni bina 233 ailə üçün nəzərdə tutulub, ərazidəki 185 nəfərlə müqavilə bağlanıb, 25-i ilə bağlanmaq üzrədir, qalan 23 ailə ilə danışıqlar gedir: “Sakinlərə kirayə haqqı 400 manat deyil, 600 manat veriləcək. Sakinlərin bu iddiası həqiqət deyil”.
Elnur Fərzəliyev: “Tikinti şirkəti hər hansı ərazini sökərkən vətəndaşla müqavilə bağlayır, otaq sayına uyğun olaraq onlara kirayə pulu verir”
Əmlak məsələləri üzrə ekspert Elnur Fərzəliyev “Bakı-Xəbər”ə açıqlamasında qeyd etdi ki, 2016-cı ildən başlayaraq Nazirlər Kabinetinin 86 saylı qərarına əsasən, Bakı şəhərində köhnə, istismar müddətini bitirmiş və qəzalı binaların sökülməsinə start verilib: “Bugünə qədər müxtəlif dövlət layihələri ilə çox sayda köhnə çoxmənzilli yaşayış binaları və fərdi həyət evlərindən ibarət olan yaşayış massivləri sökülərək yeni tikili binalarla əvəzləndi. Bunlar sökülərkən vətəndaşlara tikinti şirkətləri tərəfindən köç xərcləri, kirayə pulları ödənilir. Daha sonra köhnə mənzillər sökülmüş binanın yerində tikilmiş yeni, tam təmirli, daha geniş mənzillərlə əvəz olunur. Tikinti şirkəti hər hansı ərazini sökərkən vətəndaşla müqavilə bağlayır, otaq sayına uyğun olaraq onlara kirayə pulu verir. Lakin bəzən bir binanın sökülüb yeni bina ilə əvəzlənməsi ortalama 2-3 il müddət çəkir. Müqavilə qüvvədə qalsa da, digər tərəfdən bəlli bir zamandan sonra əmlak bazarında kirayə qiymətlərinin artımı müşahidə olunur. Belə olan halda isə şirkətin ödədiyi pul mövcud bazar qiyməti ilə üst-üstə düşmür. Bağlanılmış müqavilə və tərəfdaşların razılığı əsasında ödənilən kompensasiya əksər hallarda dəyişilə bilmir. Çünki şirkətlər hər hansısa bir tikinti işləri aparılan zaman əvvəlcədən bütün xərclərini və digər maliyyə ilə bağlı məsələləri dəqiqləşdirir. Eyni zamanda hazırda kirayə mənzillərin qiymətinin artdığını da görürük. Bu səbəbdən belə problemli məsələlər mütəmadi olaraq müşahidə olunur”.
Günel CƏLİLOVA
