Ermənilər Brüsselin sülh vasitəçiliyi mövzusunda Azərbaycana şər atır...
Elşən Mustafayev: “Ermənistan özünü elə aparır ki, sanki sülh təkcə Azərbaycana lazımdır, onlara lazım deyil”
Ermənistan Avropa İttifaqının vasitəçiliyi ilə Azərbaycanla danışıqların bərpasına sadiqliyini bir daha təsdiqləyir.
Baxmayaraq ki, Milli Assambleyanın hakim fraksiyasının katibi Artur Hovhannisyan “Mülki Müqavilə”nin toplantısında onun bərpası ilə bağlı hazırda heç bir əminlik olmadığını qeyd edib:
“Ermənistan Respublikası da təbii olaraq bu formatlarda danışıqların bərpasının tərəfdarıdır, çünki regionda sülhün bərqərar olması Ermənistanın gündəmində prioritet məsələdir”.
Deputat hazırda formatın bərpasının və Azərbaycan Prezidenti İlham Əliyevin razılığının nə dərəcədə real olduğunu bilmədiyini deyir. Onun sözlərinə görə, son zamanlar Aİ-nin vasitəçiliyi ilə aparılan danışıqlar nəticəsində bir sıra razılaşmaların əldə olunmasına baxmayaraq, Azərbaycan Aİ və ABŞ-ın vasitəçiliyi ilə Ermənistanla sülh müqaviləsi üzrə danışıqlarda iştirakdan yayınır. Hiss olunur ki, Ermənistan Avropa Birliyinin vasitəçiliyi ilə danışıqlar formatının bərpası mövzusunu qabartmaqla Azərbaycanın üzərində özü üçün üstünlük əldə etməyə çalışır. Sanki Azərbaycanın prosesdən yayındığı, onların isə buna hazır olduqlarına dair yanlış təəssürat yaradılır. Azərbaycan belə fikir ifadə etməyib. O halda, Ermənistanın hansısa ehtimalları əsas götürüb bizi bu mövzuda qaralaması hansı məqsəd üçündür?
Beynəlxalq məsələlər üzrə ekspert Elşən Mustafayev “Bakı-Xəbər”ə açıqlamasında bildirdi ki, Ermənistan əlinə fürsət düşmüş kimi davranmaq istəyir: “Ermənistan belə qənaətə gəlir ki, əgər Azərbaycanın AŞPA, Fransa ilə hər hansı problemi varsa, deməli, biz Avropanın vasitəçiliyindən imtina edəcəyik. Çox səhv qənaətdir. Çünki biz hətta 30 il uzanan işğal zamanı da sülh danışıqlarına sadiqliyimizi nümayiş etdirdik. Ancaq nəticə olmadı. Sonda məcbur qalıb, öz ərazilərimizi hərbi yolla azad etdik. Biz görürük ki, sülh danışıqlarında da əsas mövzudan yayınma cəhdləri var. Bunu da biz yox, Ermənistan edir. Azərbaycan Qərb formatında bir neçə dəfə danışıqlarda iştirak etdi. Hətta müəyyən irəliləyişlər də vardı, amma sonda nəticə olmadı. Azərbaycan istənilən platformada müzakirələri qəbul edir. Hətta vasitəçilər olmadan, ikitərəfli təmasların da tərəfdarı olduğumuzu demişik. Biz sərbəstik. Çünki konkret mövqeyimiz var, kimsə bizə nə isə diqtə edə bilmir. Ermənistanın məqsədi isə bəllidir. Onlar nəyin bahasına olursa-olsun, Moskvanı prosesdən uzaqlaşdırmaq istəyir. Onların istəyi budur ki, proses yalnız Qərbin nəzarətində olsun. Məhz Qərbə xoş gəmək üçün belə yalanlar uydururlar.
Qeyd edim ki, Avropa Birliyi Şurasının Prezidenti Şarl Mişel Prezident İlham Əliyevə prezident seçkilərində qələbəsi ilə bağlı telefon zəngi zamanı
üçtərəfli formatda Brüsseldə Azərbaycan, Ermənistan və Avropa Birliyi arasında görüşlərin bərpa edilməsi ilə bağlı Prezident İlham Əliyevdən mövqeyini bildirməsini xahiş edib.
Prezident İlham Əliyev Azərbaycanın həmişə Şarl Mişelin təşəbbüsü ilə Brüsseldə keçirilən üçtərəfli görüşləri dəstəklədiyini vurğulayıb. Rəsmi Bakı 2021-ci ildə, 44 günlük müharibədən sonra öz prinsiplərini elan edib, təkliflərini masaya qoyub. Söhbət beş maddəlik təkliflər paketindən gedir. Bunu Azərbaycan tərəfi Ermənistana təqdim edib və sülh prosesi başlayıb. Bu dövr ərzində Ermənistan özünü elə aparır ki, sanki sülh təkcə Azərbaycana lazımdır, onlara lazım deyil. Ermənistan Qərbin vasitəçiliyinin onlara sərf etdiyini düşünür. İrəvan çalışır ki, danışıqlarda hansısa qüvvə otursun. Vətən müharibəsindən sonra gördük ki, Ermənistan sponsor axtarışına çıxıb. Guya Rusiya bunlara kömək etmir, ona görə də kömək edəcək güc lazımdır. Bizim üçün bu yanaşma hakim deyil. Biz Qərbin də, ABŞ-ın da, Rusiyanın da obyektiv vasitəçiliyini qəbul edirik. Ermənistan nahaq yerə bizim əvəzimizdən rəy verir”.
Məhəmmədəli QƏRİBLİ
