Konqresmen Frenk Pallone Qarabağ zəfərimizi hələ də "uda bilmir"
Bədrəddin Quliyev: “ABŞ Nümayəndələr Palatasının üzvünün məlum açıqlaması tamamilə qərəzəlidir”
ABŞ Nümayəndələr Palatasının bəzi üzvləri var ki, sanki o kürsüyə Azərbaycanı qaralamaq, antiazərbaycan mövqeyi sərgiləmək üçün seçiliblər.
Bunlardan biri də ABŞ Nümayəndələr Palatasının üzvü Frank Pallonedir ki, onun iş-gücü Azərbaycanı hədəfə almaqdan ibarətdir. Qarabağın işğaldan azad edilməsini, şanlı zəfərimizi həzm edə bilməyən Pallone sosial şəbəkə hesabında yenə də həqiqətə uyğun olmayan fikirlər səsləndirib. İddia edir ki, guya Azərbaycan son lokal antiterror tədbirləri zamanı “beynəlxalq hüququ pozub”.
Qeyd edib ki, Ermənistanın Müdafiə Aktı ABŞ Konqresinin Nümayəndələr Palatasına təqdim edilib. Akt Azadlığa Dəstək Aktının ABŞ-ın Azərbaycana hərbi yardım göstərməsini məhdudlaşdıran 907-ci maddəsinin ləğvinin dayandırılmasını nəzərdə tutur.
O, həmçinin, postunda Azərbaycan-ABŞ münasibətlərinə xələl gətirə biləcək qəbuledilməz məsələlərdən yazıb. İşğalçı Ermənistana hərtərəfli dəstək olan Pallone kimiləri məqsədli şəkildə Azərbaycan-ABŞ münasibətlərini zədələməyə çalışır.
“Onlar Azərbaycanın qələbəsini heç cür həzm edə bilmir”
Müstəqil ekspert Bədrəddin Quliyev “Bakı-Xəbər”ə şərhində bildirdi ki, ABŞ Nümayəndələr Palatasının üzvü Frank Pallone Qarabağ məsələsini tez-tez gündəmə gətirməklə öz ermənipərəst mövqeyini ortaya qoyur. O, həmçinin vurğuladı ki, ABŞ Cənubi Qafqaza girmək və burada söz sahibi olmaq üçün müxtəlif vasitələrdən, o cümlədən də Qarabağ kartından, erməni amilindən istifadə etmək niyyətini dəfələrlə ortaya qoyub. “Onlar bölgəyə girmək üçün Ermənistanda öz varlıqlarını gücləndirməyə çalışırlar. Rusiyanı bölgədən çıxarıb onun yerini tutmağı hədəf götürmüşdülər.
Keçən əsrin əvvəllərində də onlar ermənilər vasitəsilə bölgədə olublar və ermənilərin xalqımıza qarşı törətdiyi faciələri gözləri ilə görüblər. Hətta 1919-cu ildə ABŞ Ermənistanın təhlükəsizliyini öz üzərinə götürüb. Fransız da, ingilis də, alman da, başqaları da ermənilərdən öz məqsədləri üçün istfadə ediblər. İndi də bölgədə öz varlıqlarını ortaya qoymaq üçün çalışırlar. Bu gün Azərbaycan və Ermənistan arasında sülh sazişinin imzalanması aktualdır. Danışıqlar müxtəlif formatlarda gedib, son olaraq da Azərbaycan ikitərəfli danışıqlar təklif edib…Əlbəttə, ABŞ da, Avropa da bu prosesə müdaxilə etmək istəyir. Verilən hər bir qərəzli bəyanat, səsləndirilən hər xoşagəlməz fikir birbaşa sülh sazişinə yönəlib. Müəyyən qüvvələr var ki, sülh sazişinin imzalanmaması üçün hər cür təxribata əl atırlar.
Azərbaycanın Qarabağda keçirdiyi antiterror tədbirlərinə qara yaxmağa çalışan konqresmen nə üçün 30 il torpaqlarımız işğalda olanda, 1 milyondan çox vətəndaşımız qaçqın düşəndə, tarixi irsimiz, kəndlərimiz, şəhərlərimiz tar-mar ediləndə səsini çıxarmadı? Elə obyektivdirsə Ermənistanı ittiham etsin, 4 minə yaxın azərbaycanlının taleyini aktuallaşdırsın, 8 anklav kəndimizi qaytarması üçün bu ölkəyə qarşı kampaniya keçirsin. Amma görürsüz, heç birinin adını çəkmir. Qarabağ Azərbaycanın beynəlxalq səviyyədə tanınan ərazisidir və orada Azərbaycanın konstitusiya quruluşu bərpa olunmalı idi, oldu da.
ABŞ Nümayəndələr Palatasının üzvünün məlum açıqlaması tamamilə qərəzlidir və ikili standartın nümunəsidir”-deyə B.Quliyev qeyd etdi.
B.Quliyevin sözlərinə görə, iqtidar da, müxalifət də, ziyalılar da, ictimai-siyasi xadimlər də Qarabağ zəfəri, eləcə də bütün proseslər, baş verənlər barədə ABŞ və başqa ölkələrin mətbuatında çıxışlar etməli, rəsmi qurumlara məktublar, müraciətlər ünvanlamalıyıq. “Biz öz mövqeyimizi daim bildirməliyik. Təbii ki, hər bir ölkənin ərazi bütövlüyü toxulmazdır. Möhtəşəm qələbədən sonra xaricdəki erməni lobbisinin və onların havadarlarının bizə qarşı olacağı gözlənilən idi. Onlar Azərbaycanın qələbəsini heç cür həzm edə bilmir və bu səbəbdən bu cür açıqlamalar verirlər”-deyə B.Qilıiyev qeyd etdi.
O, həmçinin vurğuladı ki, Ermənistan Azərbaycan torpaqlarına vurduğu ziyana görə təzminat ödəməlidir və beynəlxalq aləm də bu ölkəyə təzyiq göstərməlidir.
Azərbaycana qarşı aparılan qərəzli kampaniyalara qarşı ayıq-sayıq olmalı olduğumuzu deyən B.Quliyev hesab edir ki, heç bir qüvvə bizim birliyimizi qıra bilməz və biz hər zaman gerçəyi təbliğ etməliyik.
Əli TURABOV
