Rus əsgərlərinin 2025-dən sonra Qarabağda qalmasına nə zərurət ola bilər...
Ramil Məmmədli: “Sülhməramlıların 2025-ci ildən sonra Qarabağda qalmasına heç bir ehtiyac yoxdur”
Qarabağda sülhməramlıların məsələsi yalnız Azərbaycan tərəfi ilə müzakirə olunur. Bu barədə Rusiya xarici işlər nazirinin Mixail Qaluzin TASS-a müsahibəsində deyib.
“Tərəfdaşlarla dialoqumuz konstruktiv xarakter daşıyır. Biz yaranan bütün məsələləri qarşılıqlı razılaşma əsasında həll edirik. 2025-ci ilin noyabrından sonra Rusiya sülhməramlı kontingentinin səlahiyyətlərinin uzadılmasına gəlincə, bu, regiondakı vəziyyətdən, tələblərdən, Bakı ilə müvafiq razılaşmalardan asılı olacaq”, - nazir müavini bildirib.
Maraqıdır, sülhməramlıların Qarabağda qalmasına nə kimi tələb, ehtiyac ola bilər? Nazir müavini sülhməramlıların orada qalmasına ehtiyac deyəndə nəyi nəzərdə tuta bilər?
“Qaluzin nəzərdə tutur ki, iki il ərzində ermənilər qayıdacaq və sülhməramlıların qalmasına zərurət yaranacaq”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında buna bir neçə konteksdən yanaşdı: “Əvvəla, Rusiya sülhməramlılarının 2025-ci ildən sonra Qarabağda qalmasına heç bir ehtiyac yoxdur. Ona görə ki, Qarabağ məsələsi bitib. Ötən ilin sentiyabrında həyata keçirilən məlum bir günlük antiterror əməliyyatlarından sonra Azərbaycan Qarabağda suverenliyini tam təmin edib. 2020-ci ilin 10 noyabrında Qarabağa Rusiya sülhməramlıları ona görə gətirildi ki, Qarabağın müəyyən hissəsi separatçıların nəzarətində idi. Razılaşmaya görə, rus sülhməramlıları daxil olandan sonra həmin silahlı qruplar buraxılmalı idi. Qarabağdakı Ermənistan ordusu oranı tam tərk etməli idi. Ancaq təəssüflər olsun ki, bunların heç biri təmin edilmədi. Nəinki separatçı silahlı birləşmələr buraxıldı, əksinə, onların silahlanmasına, Ermənistandan yeni minaların gətirilməsinə göz yumuldu. Rusiya sülhməramlıları ötən müddət ərzində qanunsuz silahlı erməni birləşmələrinin buraxılması üçün konkret addım atmadılar. Əslində indinin özündə də Rusiya sülhməramlılarının orada qalmasına ehtiyac yoxdur. Sadəcə, Azərbaycan üçtərəfli razılaşmaya hörmət edərək bunun üzərinə getmir. 10 noyabr üçtərəfli razılaşmaya əsasən rus sülhməramlılarının 2025-ci ilin noyabrınadək Qarabağda qalması nəzərdə tutulub. Ancaq Qaluzin onu nəzərdə tutur ki, iki il ərzində ermənilər qayıdacaq və sülhməramlıların qalmasına zərurət yaranacaq. O, çox güman bunu nəzərdə tutur. Azərbaycan isə hesab edir ki, Qarabağ erməniləri ölkə vətəndaşlarıdır. Kim bizim qanunları qəbul edib yaşamaq istəyirsə, problem yoxdu. Bundan ötrü də nəinki Rusiya, istənilən beynəlxalq sülhməramlıya zərurət yoxdur. Azərbaycan dövlətinin zəmanəti yetərlidir. Rusiya isə sülhməramlı adı altında regionda təsir imkanlarını gücləndirmək istəyir”.
Vidadi ORDAHALLI
