Bakı avtobus marşrutlarında fərqli ödəniş sistemləri tətbiq olunub... Niyə?
İlqar Hüseynli: “Hansısa daşıyıcı qanunsuz şəkildə kart sistemindən nağd qaydaya keçirsə bu düzgün deyil”
Bir vaxtlar avtobuslar nağd ödənişlə işləyirdi, Türkiyəyə, elə Avropaya həsəd aparırdıq ki, kaş bizdə də avtobuslar kartla işləyərdi. Nə vaxt ki kart sisteminə keçdik, irəli getməkdənsə, daha da gerilədik.
Dayanacaqlara quraşdırılan "MilliÖN" aparatları ilə kartı yükləmək problem olur. Bununla yanaşı, avtobuslar da nağdsız ödənişdə maraqlı deyil. Məlumata görə, kartla işləyən marşrutlar müəyyən şəxslərə “hörmət” edərək avtobusu nağd sisteminə çevirir. Beləliklə, həmin marşrut xəttindən istifadə edənlər ödənişi kart vasitəsilə deyil, nağd qaydada verir. Təbii ki, bu qayda qanun pozuntusudur.
“Avtobusu qanunsuz olaraq nağdsız qaydadan nağd qaydaya keçirənlər aşkar edilməli və məsuliyyətə cəlb olunmalıdır”
Sosial sahə üzrə ekspert İlqar Hüseynli “Bakı-Xəbər”ə açıqlamasında qeyd etdi ki, ictimai nəqliyyatda kart sisteminə keçid olduqca yaxşı bir addımdır: “Avtobusların kart sisteminə keçməsi bu sahədə bir sıra problemlərin qarşısını aldı. İlk növbədə sürücü və şirkət arasında gərginlik aradan qalxdı. Eyni zamanda, vətəndaşla da sürücü arasında da ödəniş problemləri də aradan qalxdı. Kart sisteminə keçid vaxt itkisinin də qarşısını aldı. Sürücü sərnişinin pulunun qalığını qaytararkən bu müəyyən vaxt itkisinə səbəb olurdu. Sürücünün üzərində xırda pul olmayanda bu hal müzakirəyə və narazılığa səbəb olurdu. Bu səbəbdən kart sisteminə keçid daşıyıcılarda bir sıra problemlərin qarşısını aldı”.
Həmsöhbətimiz onu da əlavə etdi ki, karta ödənişlə bağlı müəyyən problemlər yaşanır. Bu da əsasən ödəmə terminallarının sayının az olması ilə bağlıdır. Ödəmə terminallarının sayı çoxalmalıdır ki, sərnişinlər rahat şəkildə kartlarına vəsait vurdura bilsin.
Ekspert hesab edir ki, hansısa daşıyıcı qanunsuz şəkildə kart sistemində nağd qaydaya keçirsə bu düzgün deyil. Bunu edənlər qanuna qarşı çıxır. Həmin şəxslər aşkar olunmalı və məsuliyyətə cəlb olunmalıdır.
Günel CƏLİLOVA
