"Azparkinq" demişdi bazar günləri pulsuzdur, bəzi dayanacaqlar "bazarda" da pul yığır...
Aslan Əsədov: “Bakıda pulsuz parklanma ərazisinə rast gəlmək mümkün deyil”
Paytaxtın nəqliyyat idarəçiliyində ən mühüm problemlərdən biri parklanmadır desək yanılmarıq. Danılmaz faktdır ki, bu gün Bakıda avtomobillərin sayı çoxdur. Avtomobillərin sayının çox olması ilə yanaşı, parklanma problemi də yaranıb.
Bu gün fəaliyyət göstərən parkinqlər yalnız bəzi ərazilərdə və baha qiymətədir. Bəzi avtomobil sahibləri dayanmağa ərazi tapa bilmək üçün saatlarla vaxt sərf etmək məcburiyyətində qalır. Parklanmanın digər problemi isə qiymətlərlə bağlıdır. Onu da qeyd edək ki, hazırda bu sahədə "Azparkinq" sistemi də fəaliyyət göstərsə də eyni mənzərə yaşanır. Xatırladaq ki, hazırda parklanma ilə bağlı vətəndaşlara güzəşt edilir. Həftənin bazar günləri fəaliyyət göstərən zonalar üzrə parkinqlər pulsuzdur. Bu qayda bayram günlərinə də şamil olunur. Ancaq paytaxtın bəzi yerlərində bazar günləri də parkinqə görə sürücülərdən ödəniş tələb edilir. Maraqlı məqam ondan ibarətdir ki, qeyd edilən günlərdə parkinqə görə ödənişi fiziki qüsurlu insanlar tələb edir. Şəhərin bir neçə yerində müşahidə apararkən gördük ki, həftənin bazar günü parkinqə görə ödənişi dili qüsurlu, kəkələyən insanlar istəyir.
Ancaq bu da faktdır ki, bəzi ölkələrdə nəinki bazar günləri, hətta iş günləri olmayan bayramlarda da parklanma pulsuzdur. Bizdə isə bu qayda yalnız kağız üzərindədir.
“Parkinq probleminin həll yolu ancaq tənzimləmələrdən keçir, burada da söhbət dövlət tənzimləməsindən gedir”
Nəqliyyat məsələləri üzrə ekspert Aslan Əsədov “Bakı-Xəbər”ə açıqlamasında qeyd etdi ki, Bakı şəhərində yeni qurulan "Azparkinq" sistemi ilə bağlı belə təkliflər var. Bakıda parklanma zonalarına bölünən ərazilərlə bağlı məlumat verilir kii, parklanmaların bir neçə əhatəsi pulsuz hesab edilir. Tam əksinə olaraq demək olar ki, Bakıda pulsuz parklanma ərazisinə rast gəlmək mümkün deyil. Çox az, yaxud barmaqla sayılacaq ərazilər var ki, burada pulsuz parklanmanı görmək olur. Bunun başlıca səbəbi, xüsusən də istifadə edilən ərazilərin qiymətlərinin bahalığı daha çox şəhər mühitinin bahalı mühit olması ilə əlaqədardır. Yəni şəhərin mərkəzi hissələrində həyatın bütün çalarları ödənişli, baha, rentabelsiz, rəqabətsiz olur. Şəhər mərkəzində olan adi mağaza qiymətləri ilə şəhərə yaxın olan mağaza qiymətlərində belə fərq olur. Məsələn, Moskva, eləcə də dünyanın müxtəlif şəhərlərdə bazar günləri ilə yanaşı, bayram günlərində də pulsuz parkinq sistemi olan ərazilər var. Ümid edək ki, gələcəkdə belə ərazilərə Bakıda da rast gəlinəcək. Sarı, yaşıl “jiletlilər”in fəaliyyətində də hər hansı pulsuz parklanma nəzərdə tutulacaq”.
Ekspert onu da əlavə etdi ki, parkinq probleminin həll yolu ancaq tənzimləmələrdən keçir. Burada da söhbət dövlət tənzimləməsindən gedir. Yəni dövlət pulsuz parkinq üçün ərazi ayıra bilər. Problem həm də ondadır ki, Bakı şəhərində pulsuz parkinq üçün ərazi yoxdur. Söhbət şəhərin mərkəzi rayon ərazilərindən gedir. Ancaq Bakıətrafı kənd və qəsəbələrdə belə ərazilər ola bilər: “Bina tikən sahibkarlar qarşısında şərt qoyulmalıdır ki, binanın 2-3 mərtəbəsi parkinq olsun. Ən azından bina sakinləri öz şəxsi avtomobillərini park edə bilsinlər. Belə olan halda problemi əsasən həll etmək olar”.
Günel CƏLİLOVA
