Ermənistan KTMT və Avrasiya İqtisadi İttifaqından eyni vaxtda qovulacaq...
Rusiya Ermənistanı ictimai hücumlar və tənqidlər əvəzinə KTMT-dəki işlərin vəziyyətini müzakirə etməyə çağırır. Bunu Rusiya Federasiyasının xarici işlər nazirinin müavini Aleksandr Pankin bildirib:
“Hamımız KTMT-nin fəaliyyətinin və onun hərbi-siyasi birlik kimi effektivliyinin daha da təkmilləşdirilməsində maraqlıyıq. Təbii, buna Ermənistanın qısa zamanda təşkilat daxilində normal və tam işinə qayıtması kömək edərdi. Təəssüf ki, erməni müttəfiqlərimiz indiyə qədər həqiqətən də ondan uzaqlaşıblar”.
Pankin Ermənistanı konstruktiv mövqe sərgiləməyə çağırıb: "Biz İrəvandakı vəzifədaşlarımızı ictimai emosional hücumlar və təşkilatı tənqid etmək əvəzinə, siyasi və ekspertlər səviyyəsində aktual məsələləri müzakirə etməyə çağırırıq. Moskva buna əsaslanır ki, KTMT çərçivəsində Ermənistanla qarşılıqlı hörmət əsasında dialoqun davam etdirilməsi İrəvanın təhlükəsizlik sahəsində maraqlarına cavab verir və Avrasiya məkanında, o cümlədən Cənubi Qafqaz regionunda sülhün və sabitliyin qorunmasına xidmət edir". Amma Rusiyadan gələn çoxsaylı xəbərdarlıqlara baxmayaraq, İrəvan Moskva və KTMT-yə hücumlarını davam etdirir. Xüsusən də bu günlərdə baş nazir Nikol Paşinyanın ölkəsinin İctimai Radiosuna müsahibəsində dedikləri tərəflər arasında narazılığı daha da artırırb. Paşinyan bildirib ki, Rusiya bir neçə səbəbə görə Ermənistanın müdafiə və hərbi-texniki sahədə əsas tərəfdaşı ola bilməz: “Biz həqiqətən kiminlə hərbi-texniki və müdafiə əlaqələri saxlaya biləcəyimizi başa düşməliyik. Əvvəllər bu problem sadə idi, çünki belə bir sual və konsepsiyanın yaradılmasında heç bir çətinlik yox idi. Əvvəllər müdafiə sektorunda münasibətlərimizin 95-97 faizi Rusiya Federasiyası ilə idi”. Məsələyə Kremlin cavabı özünü çox gözlətməyib. Rusiya Xarici İşlər Nazirliyinin sözçüsü Mariya Zaxarova qeyd edib: “Ermənistan rəhbərliyinin erməni xalqı üçün düzgün seçim edəcəyini gözləyirik. Ölkələrimiz müttəfiq olaraq qalır, erməni xalqının maraqları Rusiya ilə qonşuluq münasibətlərindən ayrı deyil. Biz Ermənistan rəhbərliyinin bunu nəzərə alacağını və hazırkı geosiyasi transformasiyalar fonunda düzgün seçim edəcəyini gözləyirik”. Onun sözlərinə görə, Rusiya və Ermənistan arasında etibarlı ikitərəfli hüquqi baza var: “Bu, hərbi-texniki əməkdaşlığa da aiddir. Hər iki tərəfin suverenliyin, ərazi bütövlüyünün və təhlükəsizliyin qorunması da daxil olmaqla, bir-biri qarşısında öhdəlikləri var. İrəvan da KTMT çərçivəsində mümkün təcavüz halında kollektiv təminat altındadır. Ölkələr 2016-cı ildə qoşunların birgə qruplaşdırılmasına dair saziş imzalayıblar. KTMT çərçivəsində fəal əməkdaşlığa qayıtmaq ilk növbədə Ermənistanın maraqlarına cavab verir. İrəvanın sərəncamında təşkilatın geniş imkanları var, onun potensialı çoxillik təcrübəyə əsaslanır”. Zaxarova bəyan edilmiş məqsədlərdən uzaq məsələlərlə məşğul olan Avropa İttifaqı missiyasının müşahidəçilərindən fərqli olaraq, KTMT-nin Cənubi Qafqazda sabitləşdirici rol oynaya biləcəyini vurğulayıb.
Ermənistan parlamentinin “Şərəfim var” fraksiyasının katibi Tiqran Abramyan bildirir ki, Paşinyan KTMT ilə münasibətlərini sərtləşdirib təşkilatdan çıxsa, Ermənistan Avrasiya İqtisadi İttifaqından da qovulacaq. Bu da ölkə iqtisadiyyatına dağıdıcı təsir edəcək: “Bəzi şikayətlər edirlər, deyirlər ki, Rusiya ümidləri doğrultmayıb. Vəziyyətə praqmatik baxaq. Etiraf etməliyik ki, Rusiya bölgənin bir nömrəli oyunçusudur. Bunu bilə-bilə belə bir ölkə ilə münasibətləri necə korlaya bilərsiniz? Üstəlik, şantaj və digər çirkin manipulyasiyalardan istifadə etməklə”.
Siyasətçi qeyd edir ki, beynəlxalq tərəfdaşlarla münasibətlərdə hakimiyyət Ermənistanı sınaq poliqonu statusuna gətirib. Üstəlik, Ermənistan üzərindən kimin zərbə endirəcəyi ikinci dərəcəli məsələdir. O, ölkənin qarşısında duran əsas vəzifəni bu vəziyyətdən çıxış yolu hesab edir, lakin bildirir ki, Ermənistan hakimiyyəti tamam başqa işlərlə məşğuldur. Rusiya xarici işlər nazirinin müavini Aleksandr Pankin “RİA Novosti”yə müsahibəsində bildirib ki, Avrasiya İqtisadi İttifaqı Ermənistana böyüfk fayda gətirir: “Avrasiya İqtisadi İttifaqına üzvlükdən imtina Ermənistan üçün sərfəli deyil, bu onun maraqlarına ziddir. Qurum çərçivəsində əməkdaşlıq Ermənistan üçün səmərəlidir, son bir neçə ildə ölkə ÜDM-in artımı, əsas kapitala investisiyalar, başa çatdırılan tikinti işlərinin həcmi və sair kimi göstəricilərə görə birlik daxilində liderə çevrilib. Bütün bunlar əsasən birlik daxilində vahid bazar, əmək resurslarının sərbəst hərəkəti, müəssisələrin açılması prosedurunun sadəliyi, enerji təchizatı üçün güzəştli şərtlər və sair sayəsində mümkün olub. Beləliklə, iqtisadi baxımdan, fikrimcə, ittifaqa üzvlük İrəvan üçün əlbəttə ki, faydalıdır və ondan imtina etmək, ölkənin maraqlarına zidd olardı”. Pankin əlavə edib ki, Ermənistanın baş nazirinin səsləndirdiyi prioritetlər inteqrasiya quruculuğu sahəsində ümumi yanaşmalarla uzlaşır və onlar məhsuldar əməkdaşlığa sadiqdir. Amma görünən odur ki, Ermənistan Rusiyanın təkliflərini rədd edir və Kremlin orbitindən çıxmaqda israrlıdır.
Tahir TAĞIYEV
