Seçkidən sonra Azərbaycana doğru ilk böyük jest - Mişel Əliyevə təklif verdi...
Elşən Həsənov: “Qərbin davranışları, təbii ki, Azərbaycanın müharibədə qazandığı qələbəyə və yeni yaranan real şəraitə görədir”
Avropa Birliyi Şurasının Prezidenti Şarl Mişel üçtərəfli formatda Brüsseldə Azərbaycan, Ermənistan və Avropa Birliyi arasında görüşlərin bərpa edilməsi ilə bağlı Prezident İlham Əliyevdən mövqeyini bildirməsini xahiş edib.
Bu barədə Şarl Mişelin Prezident İlham Əliyevə prezident seçkilərində qələbəsi ilə bağlı telefon zəngi haqda yayılan məlumatda bildirilib.
Prezident İlham Əliyev Azərbaycanın həmişə Şarl Mişelin təşəbbüsü ilə Brüsseldə keçirilən üçtərəfli görüşləri dəstəklədiyini vurğulayıb.
Qərbin yenidən bu mövqeyə qayıtması ilə İlham Əliyevin yenidən Prezident seçilməsi arasında bir əlaqə varmı? Seçkidən qabaq təzyiq, seçiləndən sonra məcburi əməkdaşlıq siyasətinin konturları görünürmü?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Azərbaycan sülhlə bağlı müzakirələrin aparıldığı bütün platformalarda sağlam əməkdaşlığa qarşı olmayıb: “Biz hətta 30 il uzanan işğal zamanı da sülh danışıqlarına sadiqliyimizi nümayiş etdirdik. Ancaq nəticə olmadı. Sonda məcbur qalıb, öz ərazilərimizi hərbi yolla azad etdik. Biz görürük ki, sülh danışıqlarında da əsas mövzudan yayınma cəhdləri var. Azərbaycan bu formatda bir neçə dəfə danışıqlarda iştirak etdi. Hətta müəyyən irəliləyişlər də vardı, amma sonda nəticə olmadı. Çünki Qərb neytrallığı kənara qoyub, Ermənistanla müttəfiqlik edirdi. Belə mövqe etibarlı vasitəçiliyə xələl gətirir. Fikir verdinizsə, Qərbin vasitəçilikdən az qala imtina edib Azərbaycana yalnız təzyiqləri artırması növbədənkənar prezident seçkilərinin elanından sonra başladı. Hətta vəziyyət o həddə çatdı ki, ölkəmizin AŞPA-dakı mandatını belə uzatmadılar. Seçkilərdən əvvəl və sonra ölkəmizə qarşı qarayaxma kampaniyası aparıldı. Azərbaycan bütün bunlara sinə gərəndən sonra yenə əvvəlki mövqeyə qayıdıblar. Prezident belə təşəbbüsə, təbiidir ki, müsbət cavab verəcək. Ancaq Qərb üçün əvvəlki nüfuzunu bərpa etmək çətin olacaq. Yenə Fransanın diqtəsilə addımlar atacaqlarsa, bunun heç bir nəticəsi olmayacaq. Çünki Fransa Ermənistanı əvəz edir. Hər halda inanmaq istərdik ki, Avropa etdiyi səhvlərdən nəticə çıxarıb. Bundan sonra daha konstruktuv mövqe tutmaqla sülh sazişi istiqamətində nəyəsə nail olacaq.
Bu gün Qərbin davranışları, təbii ki, Azərbaycanın müharibədə qazandığı qələbəyə və yeni yaranan real şəraitə görədir. Qərb istəmir ki, bu bölgədə heç kimin orbitinə daxil olmayan bir güc olsun və Türkiyə ilə birgə yaradılmış Türk Dövlətləri Təşkilatı da bir güc kimi ortaya çıxsın, nəticədə də Qərb birlikləri və ayrı-ayrı ölkələr dominantlığını itirsin.
Azərbaycan həm karbohidrogen ehtiyatları istehsalçısıdır, həm də digər dövlətlərə karbohidrogen ehtiyatları tranzit edir. Buna görə də Avropa bir Ermənistana görə Azərbaycanı tam itirmək də istəmir”.
Məhəmmədəli QƏRİBLİ
