Paşinyanı tənqid edən jurnalistə basqılar başladı...
Xəyal Bəşirov: “Bununla da cəmiyyətə və mətbuata mesaj ötürür ki, mənə qarşı çıxan hər kəsin müqəddəratı bu şəkildə olacaq”
Paşinyanı tənqidinə görə Ermənistan İctimai Radiosunun rəhbəri barəsində tədbir görülür. Bu barədə Azadlıq radiosu məlumat yayıb. Ermənistanın İctimai Radiosuna nəzarət edən dövlət qurumu radionun icraçı direktoru Qaregin Xumaryana qarşı intizam tədbirinin görülməsinə başlayıb.
Azadlıq Radiosunun Erməni xidməti - Azatutyun yazır ki, Xumaryan baş nazir Nikol Paşinyanın Azərbaycanla bağlı bəyanatlarını tənqid etmişdi.
Bəzi məlumatlara görə, Paşinyanın bu radioya əvvəlcədən yazılmış müsahibəsi fevralın 1-də efirə verilmişdi.
Bu müsahibədə Paşinyan Ermənistanın 1990-cı il Müstəqillik Bəyannaməsini tənqid etmişdi.
Baş nazir bildirmişdi ki, bu bəyannaməyə istinad Konstitusiyanın preambula hissəsində qaldıqca Ermənistanın Azərbaycanla “heç vaxt sülhü olmayacaq”.
Beləliklə də Paşinyan konstitusiyanın dəyişdirilməsi planlarını müdafiə etmişdi.
Xumaryan Paşinyanın bu bəyanatlarını tənqid edən məqaləsini radionun internet saytında dərc edib. O iddia edib ki, baş nazir “bizim siyasi kimliyimizin sütunlarından birini” məhv etmək və “bizi - biz olmaqdan məhrum etmək” niyyətindədir:
“Bizə deyirlər ki, azərbaycanlılar güclüdür və ermənilər zəifdir. Azərbaycanlılar erməniləri qətliam edirlər. Bu sillogizm belə bir deduktiv qənaətlə yekunlaşmalıydı: “Gəlin daha güclü olaq”. Amma bunun əvəzində bizə deyirlər ki, “erməni olmağınızı dayandırın”.
O, baş naziri 2020-ci il Qarabağ müharibəsindən bəri Ermənistan ordusunu yenidən qurmamaqda ittiham edib.
Ermənistanın İctimai Yayım Şurası fevralın 6-da gecə Xumaryanı İctimai Radionun rəsmi saytında şəxsi fikirlərini ifadə etməsinə görə tənqid edib. Şura bildirib ki, İctimai Radio direktorunun hərəkətlərinin etik və hüquqi normalara uyğunluğu araşdırılacaq.
Sözügedən şuranın 7 üzvünün hamısı Paşinyan tərəfindən təyin olunub.
Xumaryan israr edib ki, şuranın bəyanatı ilə razı deyil və “peşə vəzifəsini” yerinə yetirərək Ermənistanın “həyati” problemləri barədə şərh yazıb və bunlar “siyasətin fövqündədir”.
Paşinyanı tənqid edən jurnalistə qarşı tədbir görülür, o, hakimiyyət qurumları tərəfindən basqıya məruz qalır, yazdığına, fikirlərinə görə divara qısnanıb. Maraqlıdır ki, Qərbin “söz azadlığını müdafiə edən” təşkilatlarının birinin də səsi çıxmır.
Amma Azərbaycanda buna bənzər kiçik bir problem baş versəydi həmin təşkilatlar Azərbaycana hücuma keçər, bəyanat-bəyanat dalınca verilərdi.
“Paşiniynı tənqid etdiyinə görə İctimai Radionun icraçı direktoru Qaregin Xumaryana qarşı basqıların olması onun necə “demokratik lider” olduğunun növbəti göstəricisidir”
Siyasi və Hüquqi Strateji Araşdırmalar Mərkəzinin rəhbəri, politoloq Xəyal Bəşirov “Bakı-Xəbər”ə bildirdi ki, bu bəlli prosesin davamıdır: “Nikol Paşinyan hakimiyyətə gəldiyi gündən indiyə qədər ona əks mövqedə dayananlara, həm siyasi müxalifətdə olanlara, həm mətbuata, həm də ictimaiyyət nümayəndələrinə qarşı sərt addımlar atır. Onu tənqid edənlərə qarşı inzibati resurslardan istifadə edir, həmin şəxsləri bu və digər formada zərərsizləşdirir. Biz bunu keçmiş cinayətkar ünsürlərə, revanşist qüvvələrə qarşı davranışlarda, etiraz mitinqlərində iştirak edənlərə qarşı atılan addımların timsalında görmüşük. Məsələn, Robert Köçəryana, onun oğluna, eləcə də Paşinyan hakimiyyətinə müxalif olan digər qüvvələrə qarşı dəfələrlə belə yanaşmalar olub. Amma hər bir halda, bu proseslə paralel olaraq Paşinyan özü haqda “demokratik lider”, öz hakimiyyəti haqda “demokratik hakimiyyət” görüntüsü yaratmağa cəhd göstərir. Baxın, bir tərəfdə parlamentdə ona qarşı sərt tənqidlər, hətta onun şəxsiyyətinə qarşı bir sıra tənqidi fikirlər səsləndirilir. Guya Paşinyan da öz hakimiyyətinə qarşı bu cür tənqidi fikirlərin səsləndirilməsini, belə mövqeyin sərgilənməsini “demokratiya” ab-havasının olması ilə əlaqələndirir. Amma biz bu hadisələrdən bir müddət sonra bu və digər formada, mümkün qədər ictimailəşmədən, həmin o şəxslərə qarşı inzibati addımların atıldığının şahidi oluruq. Yəni bu, qərblilər, Nikol Paşinyanı hakimiyyətə gətirənlər tərəfindən onun və hakimiyyətinin “demokratik” olması ilə bağlı görüntünün yaradılmasına hesablanıb. Təbii ki, onların bu istəklərini Paşinyan hələlik çox böyük “uğurla” davam etdirir”.
X.Bəşirovun sözlərinə görə, Paşinyan İkinci Qarabağ müharibəsindən bugünə qədər Azərbaycan tərəfinin və Prezident İlham Əliyevin sülh təşəbbüsləri ilə bağlı atdığı addımları öz adına yazmağa, öz imzasına qoşmağa çalışır.
“Amma hər birimiz bilirik ki, proseslərin bu məcraya gəlib çıxmasında Nikol Paşinyanın şəxsən özünün çox böyük rolu var. O, həm İkinci Qarabağ müharibəsinin baş verməsinə səbəb olan “Qarabağ Ermənistandır.” sözünü səsləndirib, həm artıq məhv edilən qondarma rejimin cinayətkar ünsürlərinin “seçkilərinin” “inauqurasiya mərasimində” iştirak edib, içkili vəziyyətdə Şuşada yallı gedib, bu da Azərbaycan dövlətinin və Azərbaycan xalqının səbr kasasını daşdıran son damla oldu. İkinci Qarabağ müharibəsindən sonra lokal antiterror tədbirlərinin həyata keçirilməsi məcburiyyətini, zərurətini yaradan onun addımları oldu. Halbuki, 10 noyabr 2020-ci il tarixli üçtərəfli bəyanatla üzərinə öhdəlik götürsə də, o öhdəliyi yerinə yetirmədi. Buna görə də o proseslər reallaşdı. İndi də sülh prosesinin uzadılması ilə məşğuldur.
Ermənistan Konstitusiyasının preambula hissəsində müstəqillik bəyannaməsinə istinad edilməsi ilə bağlı məsələdə Azərbaycana qarşı ərazi iddiaları var. O ərazi iddiaları ilə bağlı məqamların konstitusiyadan çıxarılmasını həyata keçirmək əslində Paşinyanın çoxdankı işi idi. Paşinyan ondan əvvəl qəbul edilmiş bu absurd konstitusiyaya, yaxud konstitusiyada nəzərdə tutulmuş bu absurd müddəaya münasibəti indi deyil, çoxdan bildirməli idi. Təbii ki, Paşinyan “sülh təşəbbüsünü ortaya qoyan”, sanki Azərbaycanla sülh müqaviləsi imzalamaq istəyində olan bir baş nazir görüntüsünü yaratnağa çalışır, amma konstitusiyadakı o müddəa ona mane olur. Bununla Paşinyan bir oxla iki hədəfi vurmağa cəhd göstərir. Hər iki variant - konstitusiyaya dəyişikliyin edilməsi variantı da, konstitusiyaya dəyişiklik edilməməsi variantı da Paşinyanın işinə yarayacaq. Necə? Konstitusiyaya dəyişiklik etmədən Azərbaycanla sülh sazişini imzalaya bilməyəcək. Sözsüz, bunun məsuliyyətini öz üzərindən atmağa, özündən əvvəlkilərin qəbul etdiyi konstitusiya ilə bağlamağa çalışacaq. Əsaslandıracaq ki, konstitusiyada dəyişikliklərin edilməsi mümkün olmadığına, yaxud buna bir sıra qüvvələr mane olduğuna görə Azərbaycanla sülh sazişi imzalaya bilmir. Əgər konstitusiyada o maddə olacaqsa, o halda sülh sazişi qüvvədən düşmüş hesab olunur. Digər tərəfdən, əgər konstitusiyaya dəyişikliyə nail olacaqsa bu yolla Paşinyan zərərsizləşdirdiyi sələflərinin bütün iz-tozunu Ermənistan tarixindən silməyə cəhd götərəcək, bunu reallaşdıracaq. Hər bir halda Paşinyanın düşündüyü Azərbaycanla sülh sazişi imzalamaq, Cənubi Qafqazda sülhün və təhlükəsizliyin bərqərar olmasına nail olmaq deyil, özünün hakimiyyətini müxtəlif yollarla qoruyub saxlamaq və ömrünü uzatmağa hesablanır. Paşiniynı tənqid etdiyinə görə İctimai Radionun icraçı direktoru Qaregin Xumaryana qarşı basqıların olması onun necə “demokratik lider” olduğunun növbəti göstəricisidir. Baş naziri kim tənqid edirsə, müəyyən bir vaxtdan sonra hansısa formada cəzalandırılır. Əvvəl tənqidə şərait yaradır, sonra isə tənqid edənin başına oyunlar açır. Bununla da cəmiyyətə və mətbuata mesaj ötürür ki, mənə qarşı çıxan hər kəsin müqəddəratı bu şəkildə olacaq. Qərbin bunu görməzdən gəlməsi də gözlənilməz deyildi və bu hər dəfə belə olur.
Eyni zamanda erməni tarixindən Ermənistan tarixinə keçid məsələsi də ortaya atılıb. Baş nazir bununla yeni Ermənistan qurmaq və bunu da gələcəkdə öz adı ilə bağlamaq niyyətini ortaya qoyur. Onun bu addımı ondan xəbər verir ki, əslində Robert Köçəryan, Serjik Sarkisyan hakimiyyətdə olarkən Ermənistan hakimiyyəti olmayıb, sadəcə ermənilər adlı bir toplum olub, o şəxslər də o topluma rəhbərlik ediblər. Amma Ermənistan dövlətinin yaradılmasını o öz adı ilə bağlamağa cəhd edir. Bütün bu proseslər də ona hesablanıb”-deyə X.Bəşirov qeyd etdi.
İradə SARIYEVA
