Qarabağda növbəti kütləvi məzarlıq - erməni cinayətlərinin sonu gəlmir...
Azər Həsrət: “Erməni cinayətlərinin sübutu aşkar olunduqca dünyaya, erməni havadarlarına çılpaq faktlarla təqdim etmək lazımdır”
Birinci Qarabağ müharibəsindən sonra yüzlərlə azərbaycanlının taleyi naməlum olaraq qaldı. Əsir düşən bu insanlardan hələ də heç bir xəbər yoxdur. Dəfələrlə Azərbaycan tərəfi Ermənistana müraciət etsə də, nəticə əldə edilməyib. İtkin kimi siyahıya alınan həmin insanların yaxınları, ailə üzvləri hələ də ümid edirlər ki, onlar haqqında bir məlumat olacaq.
Qeyd edək ki, itkinlər istər mülki şəxslər, istərsə də hərbçilər arasında kifayət qədərdir. Bu, Ermənistanın bizə qarşı törətdiyi cinayət hadisələrindən yalnız biridir. Qarabağda erməni terrorçuları tərəfindən dinc əhalinin və hərbi əsirlərin kütləvi şəkildə qətlə yetirilməsi danılmaz faktdır. Ağlasığmaz işgəncələrə məruz qalan əsirlər ya dözməyib dünyasını dəyişib, ya da ermənilər tərəfindən qətlə yetiriliblər.
44 günlük Vətən müharibəsindən sonra işğaldan azad edilən ərazilərimizdə tikinti-quruculuq işləri aparılan zaman kütləvi məzarlıqlar aşkar olunur. Bu günlərdə Xocalı rayonunun Əsgəran qəsəbəsində qala divarlarının yaxınlığında kütləvi məzarlıq aşkarlanıb.
Bildirək ki, 44 günlük Vətən müharibəsindən sonra Şuşa həbsxanası və Daşaltı kəndi, Ağdam rayonunun Sarıcalı kəndi, Xocavənd rayonunun Edilli kəndi, Xocalı rayonunun Fərrux kəndi, Füzuli rayonunun Yuxarı Seyidəhmədli kəndi və Kəlbəcər rayonunun Başlıbel kəndi ərazisində kütləvi məzarlıqlar aşkar edilib. Bu məzarlıqlardan indiyədək 400-ə yaxın insanın qalıqları aşkarlanıb.
Məlumat üçün qeyd edək ki, Dövlət Təhlükəsizliyi Xidmətində (DTX) aparılan cinayət işi üzrə təqsirləndirilən şəxs Raşid Beqlaryan ifadəsinin yerində yoxlanılması istintaq hərəkəti zamanı Xocalı soyqırımında qətlə yetirilən azərbaycanlıların Əsgəran qalası ətrafında kütləvi basdırıldığı həmin ərazini göstərmişdi.
“Azərbaycan bütün dünyanın gözü önündə kütləvi məzarlıq aşkar edir, ermənilərin törətdiyi cinayətləri faktlarla sübut etsə belə, bizə şübhə ilə yanaşılır”
Siyasi şərhçi Azər Həsrət “Bakı-Xəbər”ə açıqlamasında qetd etdi ki, Ermənistan dövlətinin birbaşa iştirakı ilə gerçəkləşən cinayətlərin izi hələ uzun illər bizi təqib edəcək: “Biz azad edilən torpaqların hər qarışında bu cür xoş olmayan surprizlərlə qarşılaşa bilərik. Azad edilən ərazilərdə tikinti quruculuq işləri aparıldıqca kütləvi məzarlıqlar aşkar olunacaq. Azərbaycan dövləti hər bir faktı sənədləşdirməli, müvafiq qaydada beynəlxalq qurumlara təqdim etməlidir. Beynəlxalq təşkilatlar, dünya dövlətləri bilməlidir ki, Azərbaycan erməni cinayətləri deyəndə boş söz demir. Təəssüflər olsun ki, dünya ermənilərə inanır. Onlar iddia ki, guya 1915-ci ildə Osmanlı imperiyası tərəfindən milyon yarım erməni soyqırıma məruz qalıb. Ermənilər bunu dünyaya tirajlamaqla məşğuldur. Ancaq bir dənə də olsun kütləvi məzar aşkar edib, dünyaya göstərə bilmir. Buna baxmayaraq, dünya dövlətləri ermənilərə inanmaqda davam edir. Azərbaycan isə bütün dünyanın gözü önündə kütləvi məzarlıq aşkar edir, ermənilərin törətdiyi cinayətləri faktlarla sübut etsə belə, bizə şübhə ilə yanaşılır. Bu səbəbdən də hesab edirəm ki, erməni cinayətlərinin sübutu aşkar olunduqca dünyaya, erməni havadarlarına çılpaq faktlarla təqdim etmək lazımdır”.
Günel CƏLİLOVA
