7 fevral seçki təcrübəsindən nümunə götürən ilk ölkə özünü göstərdi...
Bəhruz Quliyev: “Karasinin pozitiv fikirləri bu seçkinin keçirilməsinə obyektiv qiymətin nəticəsidir”
Rusiya Federasiya Şurasının beynəlxalq məsələlər komitəsinin sədri Qriqori Karasin seçki məntəqəsinə baş çəkdikdən sonra jurnalistlərə bildirib ki, Azərbaycanda keçirilən seçkilər Rusiya üçün nümunə ola bilər:
“Biz nikbin üzlü çoxlu sayda insan görürük. Onların gözlərində gələcəyə inam var. İnsanlar öz seçimini tərəqqinin xeyrinə, hamı üçün müsbət nəticələr verəcək müasir, suveren Azərbaycanın xeyrinə etmək istəyirlər. Rusiya da mart seçkilərinə hazırlaşır və biz (müşahidəçilər) Bakıdan özümüzə müəyyən təcrübə qazanacağıq”.
Q.Karasin onu da qeyd edib ki, seçki prosesinin təşkilatçılarının davranışları düzgün idi, heç bir ajiotaj yaradacaq hal baş vermirdi: “İnsanların üzlərində təbəssüm, gələcəklə bağlı inam vardı. Məni təəccübləndirən hal o idi ki, seçki geniş zallarda keçirilirdi. Bu da seçki prosesinin sakit keçməsinə şərait yaradırdı. Qısaca olaraq seçkilər məsuliyyətli çərçivədə təşkil olunmuşdu”.
“Ölkəmiz dünyaya hər zaman yeni modellər təqdim edib və bu seçkilər sözün əsl mənasında yeni bir model oldu”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyevin fikrincə, Azərbaycanda nümunəvi seçki keçirilib: “Keçirilən prezident seçkiləri həqiqətən də çox nümunəvi bir Zəfər seçkiləri idi. Həm texniki prosedur qaydalarının yüksək səviyyədə hazırlanması, həm də şəffaf, demoratik, insanların fəallığı fonunda keçirilən seçkilər nümunəvi olaraq tarixə yazıldı. Bu baxımdan Rusiya Federasiya Şurasının beynəlxalq məsələlər komitəsinin sədri Qriqori Karasinin pozitiv fikirləri bu seçkinin keçirilməsinə obyektiv qiymətin nəticəsidir. O, seçkini təqdir edərək, bunun Rusiya üçün də bir nümunə olduğunu bildirir. Azərbaycan son dövrlərdə yaxşı nümunələr yaratmaqla məşğuldur. Hətta 44 günlük Vətən müharibəsində belə ən son müasir müharibə modelini yaratdı. Eyni zamanda mülki vətəndaşlara toxunmamaq şərti ilə müharibənin hərbi sturukturlarla aparılması onu göstərdi ki, Azərbaycan hətta müharibədə belə insan haqq, hüquqlarına və sadə insanlara dəyər verir. Baxmayaraq ki, Ermənistan düşmən tərəfdir, amma Azərbaycan bütün mənada beynəlxalq konvensiyalara hörmətlə yanaşır və bizim üçün insan amili hər zaman diqqət mərkəzindədir. Azərbaycan dünyaya hər zaman yeni modellər təqdim edib. Bu seçkilər də sözün əsl mənasında yeni bir model oldu. Bir liderə 92 faizdən artıq səs vermək onu göstərir ki, bu illər ərzində Azərbaycan Prezidenti dövlət və xalq qarşısında böyük xidmət göstərib. Bu xidmət xalq tərəfindən dəyərləndirildi, nəzərə alındı və seçkidə də özünü göstərdi. Bu izdiham həm də liderlə xalqın ümumilli məsələlərdə həmrəyliyinin göstəricisi idi. Rusiya nümayəndə heyəti isə seçkiləri digər xarici müşahidəçilır kimi müşahidə etdi və seçkilərə obyektiv qiymət verərək onu ən nümunəvi seçkilər adlandırdı. Bu, Rusiyanın Azərbaycana olan münasibətindən, həm də obyektiv yanaşmasından irəli gəlir”.
Vidadi ORDAHALLI
