Zaxarova Qarabağda saxta kultursid ittihamına görə erməni jurnalisti belə vurdu...
Məhərrəm Zülfüqarlı: “Qarabağda Böyük Vətən müharibəsinə aid olan abidələr dağıdılıbsa, bunu ermənilər özləri ediblər”
Erməni mediasının təmsilçiləri Rusiya Xarici İşlər Nazirliyinin rəsmi nümayəndəsi Mariya Zaxarovaya ənənəvi brifinqi zamanı artıq tarix səhnəsindən silinən “Arsax”la bağlı separatizmi təbliğ edən suallar verməyə öyrəncəklidirlər.
Çalışırlar ki, guya Qarabağda “kultursid törədilməsinə” ondan münasibət öyrənsinlər. Zaxarova da hər dəfə daha sərt şəkildə erməni jurnalistlərini yerində oturdur, çox israr edənlərdən isə fakt, material tələb edir.
M.Zaxarova bu dəfə də keçirdiyi ənənəvi brifinq zamanı erməni jurnalistin, necə deyərlər, aşının suyunu verib. Erməni mediası yazır ki, Zaxarova jurnalistin Azərbaycanın “Arsax”da Böyük Vətən müharibəsi abidələrini “dağıtması” ilə bağlı sualını şərh etməkdən imtina edib.
“Əgər sizin bu məsələ ilə bağlı materiallarınız varsa, lütfən, mənə çatdırın, o zaman mən mütləq onlara münasibət bildirəcəyəm”, - Zaxarova bildirib.
Jurnalist isə ona “materialları” göndərəcəyinə söz verib.
Qəribədir, ortada nə fal var, nə də yumurta, kor tutduğunu buraxmadığı kimi erməni mediası da “kultursid” şousundan əl çəkmək istəmir.
“Erməni jurnalistin bu sualı təxribat xarakterlidir”
Məsələyə şərh verən AVCİYA-nın vitse-prezidenti, tarixçi alim, professor Məhərrəm Zülfüqarlı “Bakı-Xəbər”ə şərhində bildirdi ki, bu çox aktual və geniş şərhə ehtiyacı olan bir mövzudur. “Çünki İkinci Dünya müharibəsi və onun tərkib hissəsi olan Böyük Vətən müharibəsi, Sovet əsgərlərinə abidələr qoyulması ənənəsi keçmiş SSRİ-də, keçmiş Varşava müqaviləsinə daxil olan ölkələrdə mövcud olub və bunlara münasibət birmənalı deyil. Hər şeydən əvvəl onu deyək ki, erməni jurnalistin bu sualı təxribat xarakterlidir. Azərbaycanda Böyük Vətən müharibəsinə aid olan abidələr toxunulmazdır. Ənənəvi olaraq 9 Mayda veteranlar o abidələrin qarşısına gül qoyurlar. Qarabağda guya Böyük Vətən müharibəsinə aid abilərinin sökülməsi iddiası tamamilə böhtandır, uydurmadır, birmənalı olaraq yalandır. Azad edilmiş ərazilərdə, Qarabağda Azərbaycan bu cür abidıləri nə söküb, nə dağıdıb, əksinə, orada abidələrə və evlərə qarşı dağıntıları ermənilər törədib. Yəni bu cür təxribatçı suallar indiki Ermənistan-Rusiya, Rusiya-Azərbaycan münasibətlərindən doğur. Yəni özünün forpostu olan Ermənistanın Qərbə sığınmaq cəhdləri Rusiyanı qəzəbləndirir. Həmin məsələ də Rusiya ilə onun forpostu olan Ermənistanın münasibətlərinin kəskinləşməsinə gətirib çıxarır” - deyə Zülfüqarlı qeyd etdi.
M.Zülfüqarlının sözlərinə görə, bu şəraitdə Azərbaycan-Rusiya münasibətlərinin normal olması erməniləri çox qıcıqlandırır, bu cür təxribatçı suallarla da bu münasibətlərə xələl gətirməyə çalşırlar.
O qeyd etdi ki, Zaxarova erməni jurnalisti fakt qarşısında qoyub və ermənilər heç zaman ona fakt təqdim edə bilməzlər, çünki bu uydurmadır. “Erməni jurnalistlər müxtəlif vaxtlarda belə separatçı suallar ünvanlayıblar və həmişə də cavablarını alıblar. Qarabağda Böyük Vətən müharibəsinə adi olan abidələr dağıdılıbsa, bunu ermənilər özləri ediblər, indi bundan Azərbaycanı şərləmək məqsədilə istifadə edirlər. Orada o vaxt nə qədər separatçıya, daşnaka qondarma abidələr qoydular. Ermənistanda Böyük Vətən çüharibəsinə həsr olunan abidələrin yerində daşnaklara, Hitler nökərlərinə abidə qoyulur” - deyə professor Zülfüqarlı vurğuladı.
İradə SARIYEVA
