Üç “exit-poll”un eyni nəticələr göstərməsinin dəqiq bir izahı var...
Rauf Zeyni: “Bu rəylərin təxminən üst-üstə düşməsinin səbəbləri ilk növbədə...”
Məlum olduğu kimi, növbədənkənar prezident seçkiləri ilə əlaqədar üç təşkilat - Vətəndaşların Əmək Hüquqlarını Müdafiə Liqası, Rəy Monitorinq Mərkəzi və "Sosioloji Tədqiqatlar Mərkəzi" MMC “exit-poll” keçirib.
MSK-nın yaydığı məlumata görə, səsvermə başa çatdıqdan sonra ABŞ-ın “Oracle Advisory Group” təşkilatı Azərbaycanda keçirilmiş növbədənkənar prezident seçkiləri ilə bağlı “exit poll”un nəticələrini açıqlayıb. Nəticələri təşkilatın nümayəndələri Vlada Qalan və Corc Brinbaum təqdim edib. Vlada Qalan bildirib ki, keçirilmiş seçkilər tarixi əhəmiyyət daşıyır.
“Oracle Advisory Group” ilk dəfədir Qarabağda və Şərqi Zəngəzurda keçirilən seçkilərdə iştirak edib”, - o vurğulayıb.
Qeyd edilib ki, “exit-poll” 40 seçki dairəsi və 500 seçki məntəqəsi üzrə 63 mindən çox seçicinin fikri öyrənilərək keçirilib.
Üç “exit-poll”-un təxminən eyni nəticələri verməsi nə ilə izah oluna bilər?
“Seçkilərin azad, demokratik şəraitdə keçirildiyi göz önündədir, bu baxımdan onların rəylərinin üst-üstə düşməsi təbii qarşılanmalıdır”
Milli QHT Forumunun prezidenti Rauf Zeyni “Bakı-Xəbər”ə şərhində bildirdi ki, seçkilər azad, şəffaf və demokratik mühitdə keçirilib. O hesab edir ki, “exit-poll” keçirən hər üç təşkilatın bir-birinə uyğun rəy verməsi də bu amillə bağlıdır. “İlk növbədə Azərbaycan xalqı 7 fevral prezident seçkilərində çox böyük fəallıq göstərdi. Bütün dünya ictimaiyyəti bunun şahidi oldu ki, Azərbaycanda seçkilər şəffaf, demokratik, ədalətli mühitdə keçirildi və onun nəticələri olaraq ölkə Prezidenti, müzəffər Ali Baş Komandan İlham Əliyev parlaq qələbə qazandı. Azərbaycan xalqını, Azərbaycan seçicilərini biz də öz növbəmizdə təbrik edirik, xalqımıza, dövlətimizə uğurlu olsun deyirik. Prezident seçkilərində Azərbaycan Milli Qeyri-Hökumət Təşkilatları Forumu (MQF) fəaliyyət göstərib, 40 rayon, 500-ə yaxın məntəqədə 213 nəfər MQF müşahidəçiləri seçkiləri müşahidə ediblər. Seçkilər azad, şəffaf və demokratik mühitdə keçirilib” - deyə R.Zeyni qeyd etdi.
“Exit-poll” keçirən hər üç təşkilatın mövqeyinə şərh verən R.Zeyni bildirdi ki, o təşkilat bu rəyi seçicilər arasında keçirdikləri sorğuya əsasən açıqlayıb: “Onlar seçicilər arasında sorğu aparıb yekun rəylərini açıqlayıblar. Bu rəylərin təxminən üst-üstə düşməsinin səbəbləri ilk növbədə onların eyni məkanda və eyni seçicilərdən rəylər almaları ilə bağlı ola bilər. Çünki hər hansı “exit-poll” keçirilirsə, eyni məntəqələrdə eyni seçicilərdən rəy öyrənilirsə, təbii ki, o rəylərdə bir o qədər də fərq ola bilməz. Eyni zamanda da seçkilərin azad, demokratik şəraitdə keçirildiyi göz önündədir, bu baxımdan onların rəylərinin üst-üstə düşməsi təbii qarşılanmalıdır. Hər şey göz önündədir” - deyə bildirən R.Zeyni, həmçinin, seçkini izləyib obyektiv rəy verən yerli və xarici müşahidəçilərə də təşəkkür etdi.
İradə SARIYEVA
