İlham Əliyevə fəal seçici dəstəyi Ermənistanla sülh prosesinə necə təsir göstərəcək...
Mübariz Göyüşlü: “Növbəti müddət üçün prezident seçilən İlham Əliyev məlum prosesin məntiqi sonluqla başa çatması üçün əlindən gələn hər bir şeyi edəcək”
2024-cü il fevralın 7-də keçirilən prezident seçkilərində İlham Əliyev inamlı qələbə qazanaraq növbəti müddətə dövlət başçısı seçildi. Bu qələbə xalqın öz liderinə sarsılmaz inamından qaynaqlanmaqla, son iyirmi ildə görülən işlərə, qazanılan uğurlara verilən dəyərdir.
Maraqlıdır, Azərbaycanda prezident seçkilərinin nəticələrindən, seçicilərin böyük fəallıqla İlham Əliyevi dəstəkləməsindən Ermənistan rəhbərliyi hansı nəticələri çıxaracaq və ya çıxarmalıdır? Ümumiyyətlə, bu seçki Ermənistan-Azərbaycan sülh prosesinə necə təsir edəcək?
“Yekdilliklə səs qazanan İlham Əliyev Ermənistanla məsələlərin - sülh prosesi, sülh sazişi və digər istiqamətlərdə addımların atılmasında tam olaraq xalqın dəstəyi ilə bu kimi işləri həyata keçirəcək”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə açıqlamasında qeyd etdi ki, 7 fevral tarixində keçirilən prezident seçkiləri şəffaf şəkildə keçdi: “Azərbaycan xalqı onu qalib edən, torpaqların azadlığına imza atan liderə İlham Əliyevə səs verdi. İlham Əliyev böyük səs çoxluğu ilə qələbə qazandı. Bu onu göstərir ki, İlham Əliyevlə Azərbaycan xalqının birliyi möhkəmdir, sarsılmazdır. Danılmaz faktdır ki, Azərbaycan xalqı tam olaraq İlham Əliyevi dəstəkləyib, dəstəkləyir və dəstəkləyəcək də”.
Həmsöhbətimiz hesab edir ki, yekdilliklə səs qazanan İlham Əliyev Ermənistanla məsələlərin - sülh prosesi, sülh sazişi və digər istiqamətlərdə addımların atılmasında tam olaraq xalqın dəstəyi ilə bu kimi işləri həyata keçirəcək: “Azərbaycan dövləti öz sülhsevər niyyətini elə ikinci Qarabağ müharibəsinin ilk günlərindən büruzə verib. Azərbaycan tərəfi daim öz sülh əlini uzadıb, qarşı tərəfin bu prosesdən yayınması nəticəsində vəziyyət bu həddə çatıb. Azərbaycan tərəfi bundan sonra da öz siyasətini davam etdirəcək. Növbəti müddət üçün prezident seçilən İlham Əliyev məlum prosesin məntiqi sonluqla başa çatması üçün əlindən gələn hər bir şeyi edəcək. İnşallah, qısa müddət ərzində sülh sazişinin imzalanmasının şahidi olarıq”.
Günel CƏLİLOVA
