Suveren və bütöv Azərbaycanın ilk Prezidenti O seçildi... - YENİLƏNDİ

Fevralın 7-də Azərbaycanda Prezident seçkilərində səsvermə keçirilib. Mərkəzi Seçki Komissiyasının (MSK) sədri Məzahir Pənahov saat 08:00-dan etibarən seçki məntəqələrinin seçicilərin səs verməsi üçün açıq elan edildiyini bildirib.

Seçkilərdə hakim Yeni Azərbaycan Partiyasının prezidentliyə namizədi İlham Əliyev, namizədliyi özü tərəfindən irəli sürülən Zahid Oruc, Milli Cəbhə Partiyasının prezidentliyə namizədi Razi Nurullayev, Böyük Quruluş Partiyasının prezidentliyə namizədi Fazil Mustafa, Böyük Azərbaycan Partiyasının prezidentliyə namizədi Elşad Musayev, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev və namizədliyi özü tərəfindən irəli sürülən Fuad Əliyev mübarizə aparıb.

Bu prezident seçkiləri ölkəmiz müstəqilliyini bərpa etdikdən sonra bütöv və suveren Azərbaycanda ilk dəfə baş tutub. İşğaldan azad edilən ərazilərdə 26 seçki məntəqəsi, xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. 

Seçkilərdə 190 beynəlxalq media qurumu iştirak edib. Onların 216 təmsilçisi beynəlxalq müşahidəçi kimi qeydə alınıb.

Prezident seçkilərini QHT-lərdən, vətəndaş cəmiyyətindən rekord sayda müşahidəçi izləyib. Prosesdə 83 QHT-nin 7000-ə yaxın seçki müşahidəçisi iştirak edir. Məlumata görə, ötən prezident seçkiləri ilə müqayisədə QHT-lərdən olan ümumrespublika müşahidəçilərinin sayı təxminən 4 dəfə artıb.

Seçkilərlə əlaqədar üç təşkilat - Vətəndaşların Əmək Hüquqlarını Müdafiə Liqası, Rəy Monitorinq Mərkəzi və "Sosioloji Tədqiqatlar Mərkəzi" MMC “exit-poll” keçirib.

İşğaldan azad olunan Xankəndi şəhərində122 saylı Xankəndi seçki dairəsinin məntəqəsi yaradılıb. Füzulinin işğaldan azad edilən ərazilərində isə 84 saylı Füzuli seçki dairəsinin 3 yeni məntəqəsi yaradılıb. Məntəqələrdə ümumilikdə 3619 seçici qeydiyyata alınıb. İşğaldan azad olunan Şuşa şəhərində isə 124 saylı Şuşa-Ağdam-Xocalı-Xankəndi seçki dairəsinin 105 saylı seçki məntəqəsi yaradılıb. Məntəqədə ümumilikdə 1222 seçici qeydiyyatdan keçib.  Suqovuşan qəsəbəsində yaradılan 97 sayılı Tərtər-Naftalan-Goranboy seçki dairəsinin 58 sayılı seçki məntəqəsində həm Talış kəndinin sakinləri, həm də Suqovuşan qəsəbəsində tikintidə çalışanlar gələrək 30 ildən sonra işğaldan azad edilmiş ərazilərdə keçirilən seçkilərdə səs veriblər.

121 saylı Laçın seçki dairəsinin Laçında 5 məntəqəsi yaradılıb. Məntəqələrin 3-ü Laçın şəhərində, digərləri isə Zabux və Qorçu kəndlərində yerləşir. Laçında ümumilikdə 6020 seçici qeydiyyata alınıb. 

Seçkilər gün boyu böyük çoşqu və ruh yüksəkliyi şəraitində yüksək seçici fəallığı ilə diqqət çəkib.

Saat 19.00-da seçki məntəqələrində səsvermə prosesinə yekun vurulub və bülletenlərin sayılmasına başlanıb.

Səsvermə başa çatdıqdan sonra ABŞ-nin “Oracle Advisory Group” təşkilatı Azərbaycanda keçirilmiş növbədənkənar prezident seçkiləri ilə bağlı “exit poll”un nəticələrini açıqlayıb. Nəticələri təşkilatın nümayəndələri Vlada Qalan və Corc Brinbaum təqdim edib. Vlada Qalan bildirib ki, keçirilmiş seçkilər tarixi əhəmiyyət daşıyır.

“Oracle Advisory Group” ilk dəfədir ki, Qarabağda və Şərqi Zəngəzurda seçkilərdə iştirak edib”, - o, vurğulayıb.

Qeyd edilib ki, “exit-poll” 40 seçki dairəsi və 500 seçki məntəqəsi üzrə 63 mindən çox seçicinin fikri öyrənilərək keçirilib.

Təşkilatın keçirdiyi “exit-poll”un nəticələri belədir:

İlham Əliyev –    93,9 faiz

Zahid Oruc   –   1,8 faiz

Fazil Mustafa   –  1,5 faiz

Qüdrət Həsənquliyev –  1,2 faiz

Razi Nurullayev   – 0,9 faiz

Elşad Musayev –   0,4 faiz

Fuad Əliyev –   0,3 faiz.

Sosioloji Tədqiqatlar Mərkəzi də “exit-poll” nəticələrini elan edib. Mərkəzin məlumatında bildirib ki, seçicilərin 92,4 faizi İlham Əliyevə səs verib.

“Exit-poll” nəticələrinə əsasən, namizədlərin topladığı səslərin ardıcıllığı belədir:

1. Prezident İlham Əliyev - 92,4 %

2. Zahid Oruc - 2,2 %

3. Fazil Mustafa - 2 %

4. Qüdrət Həsənquliyev - 1,6 %

5. Razi Nurullayev - 0,6 %

6. Elşad Musayev - 0,8 %

7. Fuad Əliyev - 0,3 %

“Rəy” Monitorinq Mərkəzinin 33 seçki dairəsi üzrə 200 seçki məntəqəsində keçirdiyi “exit-poll”un nəticələrinə görə isə seçkilərdə hazırkı dövlət başçısı, Yeni Azərbaycan Partiyasının prezidentliyə namizədi İlham Əliyev 92,6 faiz səs toplayıb.

Tam sıralama belədir:

İlham Əliyev – 92,6 faiz

Razi Nurullayev - 1,16 faiz

Fuad Əliyev – 0,84 faiz

Fazil Mustafa – 0,58 faiz

Qüdrət Həsənquliyev – 0,46 faiz

Zahid Oruc – 0,37 faiz

Elşad Musayev – 0,11 faiz

Etibarsız bülletenlər – 0,73

“Exit-poll”da iştirakdan imtina – 3,15 faiz.

“Exit-poll” nəticələri açıqlandıqdan sonra Bakıda və ölkənin bir çox şəhər və rayonlarında, işğaldan azad edilmiş ərazilərdə Prezident İlham Əliyevin qələbəsini qeyd edən insanlar Azərbaycan Bayraqları ilə yürüş keçiriblər.

Mərkəzi Seçki Komissiyası Katibliyi seçkilərin saat 19:00-a olan ümumi seçici fəallığının nəticələrini açıqlayıb.

Bildirilib ki, növbədənkənar prezident seçkilərində respublika üzrə seçici fəallığı 76,73 faizdir: “4971032 nəfər səs verib".

Ən yüksək və ən aşağı seçici fəallığı olan dairələr də məlum olub. Saat 19:00-a olan məlumata əsasən, seçici fəallığının ən yüksək olduğu dairə 15 saylı Yasamal Birinci Seçki Dairəsidir.

Bu seçki dairəsində seçici fəallığı 83,36 % olub.

Seçici fəallığının ən aşağı olduğu dairə 19 saylı Nərimanov Birinci Seçki Dairəsidir. Bu seçki dairəsində seçici fəallığı 59,80 % olub.

Azad olunmuş ərazilərdə də seçici fəallığı açıqlanıb.

MSK Katibliyinin İnformasiya Mərkəzinin müdiri Fərid Orucov bildirib ki, azad olunmuş ərazilərdə seçici fəallığı 118 saylı Ağdam Şəhər Seçki Dairəsində 78,64 faiz, 119 saylı Ağdam Kənd Seçki Dairəsində 48,25 faiz, 120 saylı Cəbrayıl-Qubadlı Seçki Dairəsində 76,55 faiz, 121 saylı Laçın Seçki Dairəsində 79,7 faiz, 122 saylı Xankəndi Seçki Dairəsində 83,28 faiz, 123 saylı Kəlbəcər Seçki Dairəsində 80,57 faiz, 124 saylı Şuşa-Ağdam-Xocalı-Xocavənd Seçki Dairəsində 79,58 faiz, 125 saylı Zəngilan-Qubadlı Seçki Dairəsində 78,86 faiz olub.

MSK növbədənkənar Prezident seçkilərinin ilkin nəticələrini də elan edib. İlkin olaraq 54,47% bülleten hesablanıb və nəticələrə görə İlham Əliyev 92,1% səs toplayıb:

- İlham Əliyev – 92,10 faiz (2 497 542 səs);

- Zahid Oruc - 2,20 faiz; (59719)

- Fazil Mustafa - 1,99 faiz; (53986)

- Qüdrət Həsənquliyev - 1,78 faiz; (48315)

- Razi Nurullayev - 0,79 faiz; (21406)

- Elşad Musayev - 0,66 faiz; (17855)

- Fuad Əliyev - 0,48 faiz; (12981)

Ramil QULİYEV