Paşinyanın varislərinin savaşı başladı - Qriqoryanla Simonyan bir-birini qırır…

Ermənistan hakimiyyəti daxilində cərəyan edən proseslər getdikcə daha maraqlı xarakter almaqda, həm də bu ölkənin geosiyasi güclər arasında çəkişmə meydançası olduğunu təsdiqləməkdədir. Belə görünür ki, indiki halda baş nazir Nikol Paşinyanın kimlə əvəzlənəcəyi də geniş müzakirə predmetidir. 

Lakin məsələyə fərqli rakursdan yanaşmalar da mövcuddur. Qeyd edilən xüsusda “armenianreport” portalı yazır: “İt quyruğundan ağıllıdır, amma quyruğu daha ağıllı olsaydı, o, iti yelləyərdi. Təsadüfi deyil ki, materialımıza qədim bu atalar sözü ilə başladıq. Bizi buna son günlər Ermənistanda baş verən informasiya sızmaları məcbur edir.

Belə ki, həm keçmiş, həm də indiki hakimiyyət üçün “yağ çəlləyi” kimi tanınan “Joxovurd” nəşri yazır ki, Nikol Paşinyanın yaxın çevrəsində, daha doğrusu  Ermənistan Təhlükəsizlik Şurasının katibi Armen Qriqoryanla Milli Assambleyanın sədri Alen Simonyan arasında çirkli pərdəarxası müharibə başlayıb. Səbəb də odur ki, növbəti seçkilərə hələ tam iki il qalmasına baxmayaraq, Qriqoryan və Simonyan Paşinyana daha yaxınlıq uğrunda bir-biri ilə müharibəyə başlayıblar. Səbəb də onun varisi olmaq hüququnu qazanmaqdır. O da bildirilir ki, Qriqoryanın arxasında Paşinyanın Rusiyanı tamamilə tərk etməkdə qətiyyətsizliyindən narazı olan Qərb dövlətləri, Simonyanın arxasında isə müvafiq olaraq Moskva dayanır. Əgər bu qismən də olsa doğrudursa, o zaman Qriqoryanın nəzarətində olan Ermənistanın hüquq-mühafizə sisteminin Simonyana niyə məhz indi güclü zərbə vurduğu aydın olur. Xatırladaq ki, Alen Simonyanın qardaşının həyat yoldaşı, özünü korrupsiya qalmaqalının mərkəzində tapan Ani Gevorkyan bir neçə gün əvvəl həbs edilib.  Hüquq-mühafizə sisteminə görə, o, vəzifə səlahiyyətlərindən sui-istifadədə ittiham olunur. Bununla belə, maraqlı olan budur ki, hüquq-mühafizə orqanları hətta Qriqoryanın icazəsi olsa belə, təkbaşına belə bir addım ata bilməzdi. Alen Simonyan hakimiyyət iyerarxiyasında həddən artıq güclü fiqurdur və onun qohumunun həbsinə razılıq şəxsən Paşinyandan alınıb. Bu da müəyyən düşüncələrə səbəb olur. Görünür, baş nazir yorğanı üstünə çəkməyə başlayan Simonyanın oyununu görüb və onu özünə gətirmək üçün, belə demək mümkünsə, qabaqlayıcı zərbələr endirib.  Digər tərəfdən, vətəndaşın üzünə tüpürməsi ilə yadda qalan Simonyan o qədər axmaqdır ki, rus oyunlarını oynamaq və özünü baş nazir kreslosunda sınamaq qərarına gəldi? O nə gözləyirdi? Onun cəmiyyətdəki reytinqi cüzi səviyyədədir. Onun Paşinyana məxsus xarizması yoxdur. Onun hakim partiya daxilində güclü dəstəyi yoxdur. Üstəlik, şayiələrə görə, bəzi yüksək rütbəli partiya üzvləri Nikol Paşinyan qarşısında Alen Simonyanın Milli Assambleyanın spikeri vəzifəsindən istefası məsələsini qaldırıblar. Simonyan nəyə arxalanır, xüsusən indi - ailəsi korrupsiya qalmaqalında olduğu halda? O bundan özünü kənara çəkə bilməz. Gülməli olan odur ki, Simonyanla müqayisədə Armen Qriqoryan – korrupsioner general Movses Akopyanın bu qardaşı oğlu daha solğun görünür.

Üstəlik, bir müddətdir mediada, əsasən müxalif mediada olsa da, Qriqoryanın Qərbin dəstəyinə arxalanaraq özünü qabağa çəkməsi, təkəbbür göstərməsi barədə xəbərlər yayılıb. Paşinyan isə buna diqqət çəkib. Amma o, hələ də yoldaşlarına qarşı aktiv və sərt tədbirlər görməyə başlamayıb. Baxmayaraq ki, Paşinyanı tanıyanlara görə, onun həyasız yoldaşlarına qarşı repressiyalar çox çəkməyəcək. Ancaq şəxsən bizim belə bir sualımlz var: uşaqlar, siz nəyə ümid edirsiniz? Paşinyansız siz heç kimsiniz və heç kim sizə zəng edə bilməz. Siz hər hansı görkəmli qabiliyyətiniz olduğuna görə yox, Paşinyana yaxınlığınıza görə suyun üzündəsiz. Paşinyan komandadan qovsa, o zaman zibil kimi dibə düşəcəksiz. Artur Vanetsyana baxın, bir vaxtlar Qriqoryan və Simonyan kimi Paşinyan tərəfindən ucaldılıb. Hakim komandadan qaçandan sonra cəmiyyətdə məşhurdurmu? Qətiyyən yox. 2021-ci il seçkilərində hətta Serj Sarkisyanla birləşsə də, liderlərindən biri Vanetsyan olan “Mənim şərəfim var” bloku 5%-dən bir qədər çox səs toplayıb. Simonyan və Qriqoryan bunu da ala bilməyəcəklər. Təbii ki, güc komandası ictimai əhval-ruhiyyəyə həssasdır. Və son zamanlar ictimai durum Paşinyanın xeyrinə deyil. Belə ki, “Gallup”ın yanvarda keçirdiyi sorğunun nəticələrinə görə, respondentlərin 66,4%-i Paşinyana etibar etmir. Amma bu heç də o demək deyil ki, cəmiyyət birdən Ermənistandan kənar qüvvələrə arxalanaraq Qriqoryan və ya Simonyanın arxasınca düşəcək. Xalq Paşinyanı yaxşı və ya pis olduğuna görə yox, hələ ona layiqli alternativ olmadığına görə izləyəcək. Alternativ görünəndə, varis haqqında danışmaq olar. Amma onlar mütləq vətəndaşlara tüpürən Simonyan və ya oğurluq edən əclaf Movses Akopyanın qardaşı oğlu Qriqoryan olmayacaq. Beləliklə, siz mütləq itinizin axmaq quyruğunu yelləməyə çalışmamalısınız”.

Ramil QULİYEV