5 ildə 4 böyük sosial islahat paketi - Azərbaycan kimi ölkə barmaqla sayıla bilər
Elçin Bayramlı: “Azərbaycan dövlət büdcəsinin 3-də 1-dən çoxu sosial sahəyə ayrılır”
Azərbaycanda əhalinin sosial rifahının yüksəldilməsi əsas prioritetlərdən biridir. Son illər pensiya və digər sosial ödənişlərin artırılması insanların rifah halının yaxşılaşmasına xidmət edir.
Prezidentin Fərman və Sərəncamları ilə 2018-2023-cü illərdə əməkhaqqı, pensiya və digər sosial ödənişlərin artırılması məqsədilə 4 sosial islahat paketi icra olunub.
“...Bu müsbət göstəricidir”
Mövzuya şərh verən sosial sahə üzrə ekpert Elçin Bayramlı “Bakı-Xəbər”ə bildirdi ki, Azərbaycan bu sahəyə xüsusi diqqət yetirən nadir ölkələrdəndir. “Bəli, son 5 ildə müxtəlif sosial proqramlar vasitəsilə islahatlar aparılıb, sosial islahat paketləri həyata keçirilib. Nəticədə əhalinin sosial vəziyyəti yaxşılaşıb. Daha çox problemlər həll olunub, problemlərun həlli istiqamətində işlər həyata keçirilib. Heş şübhəsiz ki, bu müsbət göstəricidir. 5 ildə 4 böyük sosial islahat paketinin həyata keçirilməsi müsbət dəyərləndirilir.
Müxtəlif dolayı proqramlar vasitəsilə də bir sıra işlər görülüb. Məsələn, özünüməşğulluq, sahibkarlığa dəstək, müharibə əlillərinə, veteranlarına yönəlik sosial proqramları və sairi qeyd edə bilərik. Bu proqramlar ümumilikdə əhalinin sosial vəziyyətinin yaxşılaşmasına gətirib çıxarır. Azərbaycan dövlət büdcəsinin 3-də 1-dən çoxu sosial sahəyə ayrılır. Bu da onu göstərir ki, biz sosial dövlət konsepsiyası götürmüşük. Bu rəqəm getdikcə artır.
Son dövrlərə qədər bizim Qarabağla bağlı çox ciddi problemlərimiz mövcud idi. Əhəmiyyətli dərəcədə büdcədən ayırmalar, xərclər bu sahəyə yönəlirdi. Müharibədə xeyli xərclər oldu. Artıq bu məsələ aradan qalxıb, ordu və təhlükəsizliyə ayrılan xərclər azaldıla bilər. Xərclər sosial islahatlara yönəldildikdə əhalinin rifah halı indikindən daha yüksək səviyyədə təmin oluna bilər”.
E.Bayramlı bir neçə sahədə də yeniliklər olmasını arzulayır. O hesab edir ki, özünüməşğulluq proqramının əhatə dairəsi və maliyyə imkanları artırılmalıdır. O qeyd etdi ki, bu halda həm əhalinin məşğulluq səviyyəsi artacaq, həm də iqtisadi artım baş verəcək.
Bütövlükdə, E.Bayramlı hesab edir ki, Azərbaycanda həyata keçirilən sosial islahat paketinin böyük əhəmiyyəti var və bu, vətəndaş məmnunluğunun artmasına səbəb olur.
İradə SARIYEVA
