Səfirliyimizi gülləbaran etmiş terrorçunu asacaqlar...
![Image](/uploads/posts/2024-02/terrorcu.webp)
Əli Mustafa: “Üzr istəyib, bir daha belə hadisələrin olmayacağına söz verməlidir”
Azərbaycanın İrandakı səfirliyinə hücum etmiş şəxs barəsində edam hökmü çıxarılıb. Bu barədə İran Ədliyyə Nazirliyinin saytında məlumat verilib.
Qeyd edək ki, ötən il yanvarın 27-də Azərbaycan Respublikasının İrandakı səfirliyinə hücum edən şəxsin cinayət işi üzrə məhkəmə iclası keçirilib. Məhkəmə iclası təqsirləndirilən şəxs və onun vəkillərinin iştirakı ilə keçirilib. Məhkəmə iclasında Azərbaycan Respublikası səfirliyinin bir sıra məsul şəxsləri də iştirak edib. İclasın əvvəlində təqsirləndirilən şəxsə hakim izahat verib və prokurorun nümayəndəsi ittiham aktını oxuyub. Yayımlanan ittiham aktına əsasən, Azərbaycan Respublikasının səfirliyinə hücum edən şəxs səfirlik daxilində odlu silahdan istifadə etməklə Azərbaycan Respublikası vətəndaşını qəsdən öldürməkdə, qanunsuz silah saxlamaqda, gəzdirməkdə və ictimai asayişi pozmaqda ittiham olunur.
Prokurorun nümayəndəsi ittiham aktını oxuduqdan sonra təqsirləndirilən şəxs və vəkili müdafiə çıxışı edib.
Xatırladaq ki, 27 yanvar 2023-cü il tarixində Bakı vaxtı ilə səhər saat 08:30 radələrində Azərbaycan Respublikasının İran İslam Respublikasındakı Səfirliyinə silahlı hücum olub.
Hücum edən şəxs “Kalaşnikov” markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib.
Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.
Səfirliyə edilən hücum iki ölkə arasındakı münasibətləri daha da gırginləşdirmişdi. Verilən bu qərarın ölkələrimiz arasındakı münasibətlərə hansı təsiri olacaq?
Müstəqil siyasətçi Əli Mustafa “Bakı-Xəbər”ə açıqlamasında bildirdi ki, 27 yanvar 2023-cü ildə Azərbaycanın Tehrandakı səfirliyinə Yasin Hüseynzadə adında İran vətəndaşı hücum edib: “Həmin adam avtomat silahla səfirliyimizə qarşı terror aksiyasını həyata keçirib. Həmin vaxt İran hüquq-mühafizə orqanları bu məsələyə sanki müşahidəçi qismində qatılıblar. Terror nəticəsində səfirliyimizin bir əməkdaşı öldürüldü. Bu, olduqca pis hadisədir. Düzdür, Yasin Hüseynzadənin ətrafında müəyyən spekulyasiyalar oldu. Əvvəlcə onun şəxsi motivlə bu cinayəti törətdiyi deyildi. Sonra onun psixoloji durumunda problemin yaşandığı bildirildi. Təbii ki, Azərbaycanda bu prosesləri izləyənlər bildi ki, bu hadisənin arxasında İran dövlətinin siyasi maraqları durur. Onlar belə üsullarla Azərbaycanı hədələmək, bizə gözdağı vermək istəyirdilər. Çox yaramaz niyyətlərə söykənən bir hücum idi. Həmin hadisədən sonra İranla münasibətlərimiz bir qədər də pisləşdi. Səfirliyimiz fəaliyyətini dayandırdı və bugünə kimi də həmin ölkədəki diplomatik missiyamız fəaliyyət göstərmir. Bu hadisə nəticəsində ölkəmizə həm maddi, həm də mənəvi ziyan dəyib. Bu hadisədə İran öz nüfuzunu itirmiş oldu. Beynəlxalq qanunlara görə Azərbaycan səfirliyinin təhlükəsizliyinə İran dövləti cavabdehdir. Hər hansı qəsdin edilməsi dövlətin üzərinə düşən ləkədir. Ortada cinayəti törədən konkret şəxs olsa da, bütün hallarda cəmiyyətdə belə fikir var ki, sifarişi verən İranın özüdür. Cinayətkarın cəzalanması normaldır. Çünki həmin adam İranla qonşu olan bir ölkənin maraqlarına ciddi zərbə vurub. Ona ağır cəza verilməliydi. Düşünürəm ki, bununla kifayətlənmək olmaz. İran öz üzərinə götürdüyü öhdəliyi yerinə yetirməlidir. Vurduğu maddi və mənəvi zərəri ödəməlidir. Eyni zamanda, üzr istəyib, bir daha belə hadisələrin olmayacağına söz verməlidir”.
Məhəmmədəli QƏRİBLİ