Azərbaycanda 10 yeni sosial ödəniş növü təsis edilib - bu, 10 minlərlə insanın həyatı deməkdir...
Akif Nəsirli: “... müsbət dəyərləndirilməlidir”
Məlum olduğu kimi, Azərbaycanda əhalinin sosial təminatının yüksəldilməsi üçün bir sıra işlər həyata keçirilib.
Son 4 ildə 10-dan çox yeni sosial ödəniş növü təsis olunaraq və sosial təminat sistemində bir sıra humanist yanaşmalar, güzəştlər tətbiq edilməklə bu sistemin əhatə dairəsi daha da genişləndirilib.
“Bu da onların həyat şəraitinin yaxşılaşmasına xidmət edir”
10 yeni sosial ödəniş növünün təsis edilməsinə şərh verən Liberal İqtisadçılar Mərkəzinin rəhbəri Akif Nəsirli “Bakı-Xəbər”ə açıqlamasında bildirdi ki, bu, onlarca insanın həyatında əhəmiyyətli rol oynayan bir göstəricidir. Eyni zamanda, müxtəlif kateqoriyalı insanları əhatə edən bir hadisədir. “Sosial müdafiə sistemində sosial ödəniş zövqlərinin artırılması müsbət haldır. 10 yeni sosial ödəniş növünün təsis edilməsi və tətbiqi müsbət dəyərləndirilməlidir. Həssas qrupların sosial müdafiəsini tam əhatə etmək üçün sosial ödəniş növlərinin yaradılması, formalaşdırılması təqdirəlayiq haldır. Bu o deməkdir ki, çoxlu sayda insan bu sosial ödənişlərdən bəhrələnir və bu da onların həyat şəraitinin yaxşılaşmasına xidmət edir.
Əhalinin müxtəlif qruplarını əhatə edən sosial ödəniş növləri ümumiyyətlə daha da inkişaf etdirilməlidir, genişləndirilməlidir” - deyə qeyd edən A.Nəsirlinin sözlərinə görə, həssas yanaşma, hər bir qrupa öz xüsusiyyətlərinə uyğun münasibət ümumiyyətlə sosial müdafiə sisteminin inkişafından xəbər verir.
Onun bildirdiyinə görə, Azərbaycanda sosial ödəniş çeşidinin artırılması ilə yanaşı ənənəvi sosial müdafiə ödənişləri də var ki, onların keyfiyyətini artırmağa ciddi ehtiyac var.
“Məsələn, kiçik qruplar üçün ödəniş növləri müəyyən edirik. Amma böyük qruplar üzrə də o ödəniş növlərinin tətbiq edilməsi, böyük qruplarda sosial ödənişlərin həcminin artırılması istiqamətində işlər görülməlidir”-deyə bildirən A.Nəsirli hesab edir ki, hazırda ən böyük sosial ödəniş qrupu əmək pensiyaçılarıdır. O vurğuladı ki, əmək pensiyalaçılarının pensiyaları bir qədər də artırılsa idi yaxşı olardı. Ekspert ümid edir ki, növbəti mərhələlərdə biz bunun da şahidi olacağıq. Bütövlükdə sosial ödənişlərin növbələrinin artırılmasını müsbət qiymətləndirən A.Nəsirli ümid edir ki, bundan sonra da sosial ödəniş növlərinin çeşidlərinin artırıldığını görə biləcəyik.
İradə SARIYEVA
