Yeni pensiya qərarı 1,1 milyon vətəndaşımıza təsir edəcək...
Vüqar Bayramov: “Pensiya artımı əhalinin sosial təminatının yaxşılaşdırılması baxımından əhəmiyyətlidir”
Azərbaycanın dərin məzmunlu sosial siyasətində əhalinin, xüsusilə də aztəminatlı insanların gəlir imkanlarının artırılması xətti xüsusi yer tutur. Bu baxımdan respublikamızda dövlət başçısının imzaladığı müvafiq sənədlər əsasında reallaşdırılan sosial paket çərçivəsində pensiyaların artırılması diqqət çəkir.
Prezident İlham Əliyevin “Əmək pensiyalarının indeksləşdirilməsi haqqında” 5 fevral 2024-cü il tarixli Sərəncamı da bunun bariz ifadəsidir.
Yanvar ayı üzrə pensiyalara edilmiş artımlar fevral ayının pensiyası ilə birgə ödənəcək. Məsələn, şəxsin pensiyası 500 manatdırsa, bu məbləğ cari il yanvarın 1-dən 11,2 faiz, yəni 56 manat artırılmaqla 556 manata çatdırılacaq, yanvar ayının 56 manat artımı da fevral ayının pensiyasına əlavə olunaraq veriləcək. Ümumilikdə, 1,1 milyon pensiyaçını əhatə edən artımlar üçün illik əlavə olaraq təqribən 630 milyon manat xərclənəcək.
Prezident İlham Əliyevin rəhbərliyi ilə həyata keçirilən uğurlu sosial-iqtisadi siyasətin mərkəzində sosial dövlət, ölkə vətəndaşlarının rifah halının yüksəldilməsi dayanır. Elə bu məqsədlə də əhalinin sosial müdafiəsinin gücləndirilməsi üçün davamlı addımlar atılır.
Mütəxəssislərin fikrincə, Prezident İlham Əliyevin yeni sərəncamı 1,1 milyon insanın sosial vəziyyətinin inkişaf etməsinə səbəb olacaq.
“2023-ildə orta aylıq əmək haqqı tempinə uyğun olaraq pensiyaların indeksləşdirilməsi və artırılması reallaşdı”
Millət vəkili Vüqar Bayramov “Bakı-Xəbər”ə açıqlamasında bildirdi ki, 2024-cu ildə də sosial təminat tədbirləri genişləndiriləcək: “Cari il ərzində vətəndaşların, o cümlədən pensiyaçıların sosial rifahının yaxşılaşdırılması prioritetdir. 2023-ildə orta aylıq əmək haqqı tempinə uyğun olaraq pensiyaların indeksləşdirilməsi və artırılması reallaşdı. Bu, pensiyaçılar üçün 11,2 faiz artım deməkdir”.
Millət vəkilinin sözlərinə görə, pensiya artımı 1,1 milyon vətəndaşı əhatə edəcək və bu, əhalinin sosial təminatının yaxşılaşdırılması baxımından əhəmiyyətlidir: “Onu da deyim ki, bu qayda yaşa görə pensiya məbləğlərinin də artmasına şərait yaradacaq. Bu baxımdan hesab edirəm ki, təqaüdçülərin pensiya məbləğinin artması vətəndaşların sosial təminatının yaxşılaşması baxımından vacibdir”.
V.Bayramov onu da əlavə etdi ki, bütün hallarda orta maaşda artım tempi yüksəldikcə pensiyalarda daha çox artımlar müşahidə olunacaq. Onun sözlərinə görə, bu baxımdan orta aylıq əməkhaqqındakı artım yalnız ölkə iqtisadiyyatında muzdla çalışan işçilər üçün deyil, həmçinin pensiyaçılar üçün də əhəmiyyətlidir.
Günel CƏLİLOVA
