Yanvarın 1-dən pensiyalar 11,2 faiz artdı... 500-ə azı 56 manat...
Aydın Hüseynov: “Vətəndaşların həm pensiyası artacaq, həm də pensiya kapitalı indeksasiya olunacaq”
Azərbaycan sosial dövlətdir. Prezident İlham Əliyev dəfələrlə bəyan edib ki, ölkəmizdə aparılan siyasətin mərkəzində vətəndaşların maraqları dayanır. Bununla bağlı ölkə başçısı İlham Əliyevin sərəncamı ilə bütün növ pensiyalar indeksləşdirilərək 11,2 faiz artırılıb.
Sərəncamla 2024-cü il yanvarın 1-dək təyin edilmiş bütün pensiyalar 2023-cü il üzrə orta aylıq nominal əməkhaqqının illik artım tempinə uyğun olaraq 11,2 faiz indeksləşdirilməklə bu ilin 1 yanvar tarixindən artırılır. Məsələn, şəxsin pensiyası 500 manatdırsa, bu məbləğ cari il yanvarın 1-dən 11,2 faiz, yəni 56 manat artırılmaqla 556 manata çatdırılacaq, yanvar ayının 56 manat artımı da fevral ayının pensiyasına əlavə olunaraq veriləcək.
Ekspertlərin fikrincə, pensiyaların indeksləşdirələrək 11,2 faiz artması əhalinin sosial-iqtisadi vəziyyətinə müsbət təsir edəcək.
“Pensiyaların artımı ilə yanaşı, vətəndaşların fərdi hesablarında olan pensiya kapitalları da istehlak qiymətləri indeksinin illik səviyyəsinə uyğun olaraq indeksləşdiriləcək”
Pensiya artımının vətəndaşların sosial rifahına təsiri barədə fikir bildirən Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov “Bakı-Xəbər”ə şərhində bildirdi ki, Azərbaycanda həyata keçirilən sosial siyasət vətəndaşların rifahının təminatının yaxşılaşdırılmasına, onların sosial müdafiəsinin daha da gücləndirilməsinə xidmət edir. Əmək pensiyalarının indeksləşdirilməsi ilə bağlı yeni tədbirlər də ölkəmizdə həyata keçirilən sosial siyasətin növbəti təzahürü kimi vətəndaşların dayanıqlı sosial təminatına yönələn siyasətin davamıdır. Yeni qaydalara əsasən, 2024-cü il yanvarın 1-dən ölkədəki 1,1 milyon nəfər pensiyaçının pensiyaları 11,2 faiz artacaq və orta pensiya məbləği 485 manat təşkil edəcək: “Həyata keçirilən sosial islahatların ən mühüm istiqaməti pensiya təminatını əhatə edib və pensiyaçılarımızın sosial müdafiəsinin gücləndirilməsi istiqamətində son beş ildə mühüm addımlar atılıb. Yuxarıda xatırlatdığımız 4 sosial islahat paketinin icrası sayəsində pensiyaların artırılması davamlı xarakter daşıyıb və 2018-2023-cü illərdə minimum pensiya 2,5 dəfə artaraq 110 manatdan 280 manata, orta aylıq pensiya 2,1 dəfə artaraq 208 manat 436 manata yüksəlib. Eləcə də yaşa görə orta aylıq pensiya 2 dəfə artaraq 234 manatdan 467 manata çatıb”.
A.Hüseynovun sözlərinə görə, pensiyaların artımı ilə yanaşı, vətəndaşların fərdi hesablarında olan pensiya kapitalları da istehlak qiymətləri indeksinin illik səviyyəsinə uyğun olaraq indeksləşdiriləcək: “Belə ki, ölkə üzrə ötən il qeydə alınmış 8,8 faiz inflyasiya rəqəminə uyğun olaraq bütün sığorta olunan vətəndaşların fərdi hesabındakı kapital indeskləşdiriləcək. Beləliklə, vətəndaşın kapitalı hər il özünün topladığı sığorta haqqı ilə bərabər, inflyasiyaya görə hesablanmış indeksasiya məbləği ilə birlikdə artacaq”.
Günel CƏLİLOVA
