”Seçkilərdən sonra sülh gündəliyi daha da geniş miqyas alacaq” - Qazaxıstanlı politoloq
![Image](/uploads/posts/2024-02/qazax.webp)
“Seçkilərdən sonra sülh gündəliyi daha da geniş miqyas alacaq və bu, həm də regionun çiçəklənməsi dövrünün başlanğıcı olacaq”. Bu sözləri secki-2024.az saytına açıqlamasında qazaxıstanlı politoloq, siyasi ekspert Fərhad Kasenov deyib.
Kasenov qeyd edib ki, istənilən ölkədə keçirilən seçkilər böyük əhəmiyyət kəsb edir, çünki bu zaman yeni inkişaf proqramları təqdim olunur, insanlar tərəflər arasında fikir mübarizəsinin şahidi olur: “Prezident seçkiləri bir ölkə üçün çox böyük rol oynayır. Düşünürəm ki, Azərbaycan üçün mövcud geosiyasi kontekstdə bu seçkilər xüsusi məna kəsb edir.
Demək olar ki, prezident seçkiləri formalaşmış dövlət aparatının yoxlanışıdır, əhalinin hansı gözləntilərinin olmasını, dövlətlə xalq arasında sıx əlaqələrin mövcudluğunu müəyyən edəcək və onların bir-birini hansı səviyyədə tamamlamasını nümayiş etdirəcək”.
Ekspertin fikrincə, ümumilikdə bütün dövlət aparatı seçkilər zamanı yenidən yoxlamadan keçəcək və bu səbəbdən də Azərbaycanın gələcəyi və iqtisadi inkişafı üçün 7 fevral seçkiləri olduqca əhəmiyyətlidir:
“Keçiriləcək seçkilər Azərbaycanla yanaşı, həm region, həm də dünyadakı proseslər üçün də olduqca böyük əhəmiyyət daşıyır. Hazırda Azərbaycan və Qazaxıstan öz regionlarının flaqman ölkələri olaraq böyük geosiyasi oyunların mərkəzindədir. Yeni iqtisadi əlaqələrin bünövrəsi qoyulur.
Azərbaycan və Qazaxıstan nəqliyyat və logistika mərkəzlərinə çevrilir. Bu mərkəzlərdə böyük həcmdə yük dövriyyəsinin şahidi oluruq”.
Fərhad Kasenov Azərbaycanın suverenliyini tam bərpa etməsini də seçkilərin keçirilməsinin vacib elementlərindən biri kimi diqqətə çatdırıb:
“Azəbaycan ilk dəfə olaraq suverenliyini tam bərpa edərək seçkilərə gedir və vaxtilə Azərbaycanla Ermənistan arasında dərin anlaşılmazlıqlara səbəb olan Qarabağ probleminin həllindən sonra artıq bütün ölkə ərazisində seçkilərin təşkili əlamətdar hadisədir.
Əgər əvvəlki dövrlərdə Azərbaycanın siyasi gündəliyi birmənalı olaraq öz torpaqları işğaldan azad etmək üçün güclü iqtisadiyyat qurmaq və iqtisadi inkişafa nail olmaq idisə, lakin indi ölkənin məqsədi hazırkı vəziyyəti qoruyub saxlamaqla yeni gündəlik, əsasən sülh gündəliyi üzərində çalışacaq.
Azərbaycan tərəfinin atdığı addımlar bütün Cənubi Qafqaz regionu ölkələrinin bir-biri ilə qarşılıqlı iqtisadi əlaqələrinin inkişaf etdirilməsinə də xidmət edir. Ümid edirik ki, məhz Azərbaycanın səyləri nəticəsində regionda uzunmüddətli və dayanıqlı sülh təmin ediləcək. Seçkilərdən sonra isə sülh gündəliyi daha da geniş miqyas alacaq və bu, həm də regionun çiçəklənməsi dövrünün başlanğıcı olacaq”, - deyən siyasi ekspert Fərhad Kasenov sonda seçkilərlə bağlı qardaş Azərbaycan xalqına ən səmimi və xoş arzularını bildirib.
“Arzulayıram ki, növbəti prezidentlik müddəti Azərbaycan üçün çiçəklənmə dövrü olsun və həmçinin regionlarımız, ölkələrimiz arasında münasibətlərin daha da yüksək pilləyə qalxmasına şahid olaq. Biz qardaş ölkələrik. Tarix, dil, din, mədəniyyət və digər bağlarla bir-birimizə çox sıx bağlıyıq. Bu səbəbdən ölkələrimiz arasında hər sahədə - iqtisadi, humanitar, mədəniyyət, təhsil və qalan bütün sahələrdə qarşılıqlı əlaqələrin ən yüksək səviyyədə olmasını arzu edirəm” – deyə politoloq fikrini yekunlaşdırıb.