Vətən mənə oğul desə...
2023-cü ilin sentyabr ayında lokal antiteror əməliyyatları zamanı canını Vətənə fəda edən şəhid Məhəmməd Şəfahət oğlu Hüseynovun 20 yaşı tamam olub. Özünün qısa ömür yolunda tarixin yaddaşında iz qoyan Məhəmməd Hüseynov Lənkəran rayonu, Viyən kəndində dünyaya göz açıb. Doğma Azərbaycanın bütövlüyü uğrunda döyüş meydanında göstərdiyi böyük fədakarlıq nümunəsi dövlət tərəfindən ölümündən sonra 3-cü dərəcəli “Vətənə xidmətə görə” ordeni ilə təltif edilib.
Lənkəran camaatı öz qəhrəman oğlunun adını uca tutmaqla onunla qürur duyur. Eləcə bu günlər Lənkəran şəhər Heydər Əliyev Mərkəzində "Tariximiz qürurumuzdur" layihəsi çərçivəsində şəhidin doğum günü münasibətilə "Vətən mənə oğul desə" adlı anım mərasimi keçirilib. Tədbirdə rayon rəsmiləri, ictimaiyyət nümayəndələri, şəhid ailələri, müharibə veteranları, ziyalılar, məktəblilər iştirak edib.
Tədbir zamanı əvvəlcə mərkəzin foyesində şəhidin şəxsi əşyaları, onun fotoşəkillərdən ibarət sərgiyə baxış olub.
Lənkəran şəhər Heydər Əliyev Mərkəzinin direktoru Reyhanə Sadıxova tədbirin giriş sözündə 44 günlük haqq savaşımızda, antiteror əməliyyatında qeyrətli Vətən sevdalıların göstərdikləri şücaət və qəhrəmanlıqdan danışıb. Onu da vurğulayıb ki, dövlətimiz tərəfindən şəhid ailələrinə və müharibə iştirakçılarına hər zaman yüksək diqqət və qayğı göstərilir.
Ardınca Lənkəran şəhər İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Ülviyyə Əliyeva çıxış edib: “Dövlətin qüdrəti onun ordusunun gücü ilə ölçülür. Güclü ordu müstəqil dövlətçilik, sabitlik və inkişaf deməkdir. Müzəffər Ali Baş Komandan, Prezident İlham Əliyevin rəhbərliyi altında Azərbaycan ordusu nə qədər böyük, nə qədər vətənpərvər, dəmir iradəyə malik olduğunu bir daha sübut etdi”.
Tədbirdə şəhid Məhəmməd Hüseynovun xatirəsinə həsr olunmuş video-çarx nümayiş olunub, məktəblilərin ifasında ədəbi-bədii kompozisiya göstərilib.
Yekunda söz alan şəhid Məhəmməd Hüseynovun valideynləri dövlət başçısına, tədbirin təşkilatçılarına və bütün iştirakçılara təşəkkür ifadə ediblər.
Zəfər ORUCOĞLU
Azərbaycan Jurnalistlər Birliyinin üzvü
