Zalujnını Zelenskiyə qarşı kim qaldırır - Rusiya, ya NATO?..
Elşad Həsənov: “Gələcəkdə Zalujnının Zelenskiyə alternativ siyasi lider olacağı danılmazdır”
2023-cü ilin yayında başlayan əks-hücum uğursuzluğu Ukrayna Silahlı Qüvvələrinin baş komandanı Valeri Zalujnı ilə ölkə Prezidenti Vladimir Zelenski arasında gərginliyi daha da artırıb.
Ukrayna Silahlı Qüvvələrinin baş komandanı fəal şəkildə yeni səfərbərlik dalğasının tərəfdarıdır və ictimai etimad səviyyəsində prezidentdən öndədir ki, bu da onların münasibətlərini yalnız çətinləşdirir. O, həmçinin hökuməti ordunun düzgün xidmətə yönəldilməsinə mane olmaqda ittiham edir. Onların qarşıdurması Qərbin qətiyyən bəyənmədiyi hərbi strategiya seçimindəki qətiyyətsizliyi göstərir.
Vladimir Zelenski general Zalujnını vəzifəsindən uzaqlaşdırmağa çalışsa da, buna nail ola bilməyib.
Bildirililir ki, Zelenski ilə Zalujnı arasında münasibətlərin pisləşməsinə ən çox əks-hücumun uğursuzluğu təsir edib, çünki bu uğursuzluq təkcə ölkə daxilində deyil, Qərbdə də müzakirələrə səbəb olub.
Ukraynada Zelenski ilə Zalujnı arasında baş verənlərdə Rusiyanın əli varmı?
Ola bilərmi ki, Qərb uğursuzluqları guya Zelenski ilə Zalujnının arasında ixtilafın üstünə atıb aradan çıxmaq istəsin?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, Ukrayna silahlı qüvvələrinin baş komandanı Valeriy Zalujnının istefaya göndərilməsi ilə bağlı məsələ keçən ildən bir neçə dəfə qaldırılıb və bu məsələ mətbuatda ciddi müzakirələrə səbəb olub: “Zalujnı peşəkar hərbçidir. 1993-cü ildən orduda qulluq edir, 27 iyul 2021-ci iıdən bu vəzifəyə təyin olunub. Onun əhali və hərbçilər arasında çox böyük nüfuzu var. Buna görə də onun istefaya göndərilməsi Ukrayna cəmiyyətinə ağır zərbə ola bilər. Bildirildi ki, 29 yanvarda Zelenski onu yanına çağırıb və vəzifəsindən azad olunması haqda əmrin hazır olduğunu bildirib. Hətta Avropa ölkələrindən birinə səfir və ya Təhlükəsizlik Şurasının sədri vəzifələrini təklif edib. Zalujnı bundan imtina edib. Buna görə də mövzu böyük əks-səda doğurub. Gözlənilib ki, prezident sərəncamı çıxacaq, ancaq bu baş verməyib. Zelenski müsahibəsində bildirib ki, bu haqda fikirləşir və bəzi başqa işçilər də dəyişməlidir. Onun yerinə Baş kəşfiyyat idarəsinin rəisi və quru qoşunları komandanının təyin ediləcəyinə dair versiyalar səslənir. Keçirilən sorğuların nəticəsinə görə ukraynalıların 92 faizi Zalujnıya, 60 faizi Budanova, 33 faizi isə Sırskiyə inandıqlarını bildirib. Ukrayna əhalisinin cəmi iki faizi Zalujnının istefasını dəstəkləyir. Artıq bu vəziyyət ölkə başçısı ilə Zalujnı arasındakı konflikt kimi təqdim edilir. Zelenski ondan yaxa qurtarmağa çalışır. Deyirlər ki, Zalujnının dəyişməsinə Ukraynanın Qərbdəki havadarları mane olur. ABŞ prezidentinin köməkçisi bildirib ki, başqa ölkənin daxilindəki kadr məsələsinə qarışmırlar, bu onların daxili işidir. Zelenski bir imzası ilə onu istefaya göndərə bilər. Rusiya bu ziddiyyətin daha da qızışmasında maraqlıdır. Bütün bunlar gərginliyi daha da artırır. Qərbin bu məsələdə maraqlı olduğu inandırıcı deyil. Əksinə, onlar çalışır ki, Ukrayna ordusu monolit olsun. Qərb liderləri deyir ki, Ukraynanın qələbəsi üçün əllərindən gələni etməlidirlər. Artıq Zelenskinin addımlarından görünür ki, yaxın günlərdə o, Zalujnını istefaya göndərəcək. Onun yerinə Budanovun təyin olacağı daha inandırıcıdır. Gələcəkdə Zalujnının Zelenskiyə alternativ siyasi lider olacağı da danılmazdır”.
Məhəmmədəli QƏRİBLİ
