Dünyada onkologiyadan ölümlər artır, Ermənistanda necə azalır?..
![Image](/uploads/posts/2024-02/xestexana55.webp)
Pərvanə Mustafayeva: “Ermənistanda xərçəng xəstəsi olan insanların ömrü digər ölkələrdəki xərçəng xəstələrinin ömründən 30 faiz azdır”
Xərçəng XXI əsrdə dünyada insanların əsas ölüm səbəbləri arasında ikinci pillədə qərarlaşıb. Gün ərzində bu xəstəlikdən 30 minə yaxın insan dünyasını dəyişir. Ümumdünya Səhiyyə Təşkilatının məlumatına görə, il ərzində xərçəng xəstəliyindən 9,8 milyon insan ölüb.
Dünyada hər 6 ölümdən 1-i xərçəngin payına düşür. Açıqlanan statistik rəqəmlərdən də bəlli olur ki, dünyada xərçəng xəstəliyindən ölənlərin sayı artır. Ancaq Ermənistanda xərçəngdən ölüm hallarının son 4 ildə 6,4 faiz azaldığı iddia olunur. Ermənistan Milli Onkologiya Mərkəzinin direktoru Narek Manukyan deyib ki, xərçıng xəstəliyindən əziyyət çəkənlərin sayı azalmaqda davam edir. Ancaq beynəlxalq hesabatlar bunun əksini deyir.
“Ermənistan rəsmi şəxslərinin xərçəng xəstəliyinin azalması ilə bağlı məlumat təqdim etməsi düzgün deyil, çünki beynəlxalq təşkilatlar onların dediyinin əksini deyir”
Tibbi ekspert Pərvanə Mustafayeva “Bakı-Xəbər”ə açıqlamasında bildirdi ki, son illər dünyada xərçəng xəstəliyindən əziyyət çəkənlərin sayı sürətlə artır: “Məlumdur ki, xərçəng xəstəliyinin yaranmasına səbəb olan amillərdən biri də stressdir. Danılmaz faktdır ki, Ermənistan əhalisinin hər günü stressdir. Müharibə immuniteti aşağı salır. Dəfələrlə mediada Ermənistanda xərçəng xəstəliyinin sürətlə yayılması ilə bağlı məlumatlar yayılıb. Hətta bəzi beynəlxalq hesabatlarda Ermənistan xərçəng xəstəliyinə görə dünyada birinci yerdə qərarlaşıb. Onu da deyim ki, bu ölkədə kişilər arasında ən çox ağ ciyərlər, boğaz, mədə-bağırsaq və prostatın xərçənginə rast gəlinir. Qadınlar arasında isə döş, cinsiyyət orqanları və mədə-bağırsaq xərçəngi daha çox yayılıb. Ermənistanda xərçəng xəstəsi olan insanların ömrü digər ölkələrdəki xərçəng xəstələrinin ömründən 30 faiz azdır. Bu da xəstəliyin gec aşkarlanması ilə bağlıdır. Belə bir fakt olduğu halda Ermənistan rəsmi şəxslərinin xərçəng xəstəliyinin azalması ilə bağlı məlumat təqdim etməsi düzgün deyil. Beynəlxalq təşkilatlar onların dediyinin əksini deyir”.
Günel CƏLİLOVA