ABŞ-ın qisas hücumundan əvvəl İranla razılaşma olub? – İran hərbçilərinin hədəfdəki bölgələrdən çıxmasına öncədən şərait yaradılıb…
ABŞ-ın milli təhlükəsizlik müşaviri Ceyk Sallivan ABŞ və Böyük Britaniyanın Yəməndə İranın dəstəklədiyi husilərə qarşı gecə saatlarında həyata keçirdiyi hava zərbələrindən sonra açıqlama verib. Sullivan ABŞ-ın Yaxın Şərqdə İranın dəstəklədiyi qruplara qarşı daha çox hücumlar planlaşdırdığını bəyan edib: “Qüvvələrimizə hücum edildiyi və insanlarımız öldürüldüyü halda ABŞ-ın cavab verəcəyinə dair açıq mesaj verməyə davam etmək üçün əlavə hücumlar və əlavə tədbirlər həyata keçirmək niyyətindəyik".
Son hücumun ABŞ-ın reaksiyasının sonu deyil, başlanğıcı olduğunu ifadə edən Sullivan deyib: "Bəziləri görüləcək, bəziləri bəlkə də görülməyəcək daha çox addımlar atacağıq”.
Qeyd edək ki, Yəmənin paytaxtı Səna gecə saatlarında ABŞ döyüş təyyarələri tərəfindən vurulub. Pentaqon, hücumda raket buraxılış qurğuları və radarların hədəf alındığı bildirilib. ABŞ Mərkəzi Komandanlığı (CENTCOM) da hücumlarda 125-dən çox idarə olunan bombanın atıldığını açıqlayıb. Açıqlamada xüsusilə ABŞ Hərbi Dəniz Qüvvələrinə hücum üçün istifadə edilməsi planlaşdırılan İHA və helikopterlərin və raketlərin məhv edildiyi bildirilir.
ABŞ-ın müdafiə naziri Lloyd Austin hücumlardan sonra verdiyi açıqlamada ABŞ-ın bölgədə münaqişənin yayılmasının qarşısını almaq üçün fəaliyyətini davam etdirəcəyini, lakin ölkənin özünü və vətəndaşlarını qorumaq üçün bütün tədbirləri görəcəyini bildirib.
İraq hökuməti isə ölkə sərhədlərinə edilən dünənki hücumlarda aralarında mülki vətəndaşların da olduğu azı 40 nəfərin həlak olduğunu açıqlayıb.
ABŞ-ın İran dəstəkli qüvvələrə qarşı cavab əməliyyatını günlər sonra başlamasına münasibət bildirən xarici siyasət ekspertləri əvvəldən ABŞ-İran razılaşmasının olduğuna işarə ediblər. Ekspertlər bildirirlər ki, Ağ Evin cavab tədbirlərini gözləməsi İrana öz şəxsi heyətini hədəfə alınan yerlərdən çıxarmağa imkan tanıyıb ki, bu da iki ölkə arasında birbaşa münaqişə risqini azaldır. ABŞ müdafiə nazirinin keçmiş müavini Mik Mulroy BBC-yə deyib ki, bu yolla Ağ Ev İranın dəstəklədiyi milislərin regiondakı ABŞ qüvvələrinə hücum imkanlarını azaldıb və gərginliyi artırmayıb. Bununla belə, Mulroy qeyd edib ki, cavab əməliyyatı ABŞ və İran arasında birbaşa müharibənin qarşısını alacaq.
Vaşinqton Körfəz Dövlətləri İnstitutundan Hüseyn İbiş isə hesab edir ki, cavab tədbirlərinin gecikməsi ABŞ-ın İran ərazisinə hücum etmək niyyətində olmadığını göstərir.
TAHİR
