KTMT-dən çıxmaq planı daha necə olur ki - İrəvan noyabr sammitinin heç bir sənədini hələ qəbul etməyib...
Bəhruz Quliyev: “Bütün hallarda, hələ ki, Rusiya nəyəsə ümid edir”
Ermənistanın Kollektiv Təhlükəsizlik Müqaviləsi Təşkilatından (KTMT) çıxması məsələsi gündəmdə deyil. Bu barədə KİV-ə müsahibəsində Rusiya XİN-in KTMT məsələlərinə dair xüsusi tapşırıqlar üzrə səfiri Viktor Vasilyev bildirib.
Səfir qeyd edib ki, Ermənistan 2023-cü ilin noyabrında keçirilən KTMT Kollektiv Təhlükəsizlik Şurasının iclasında iştirak etməsə də, orada qəbul olunan sənədlər hazırda rəsmi İrəvan tərəfindən nəzərdən keçirilir və onların bir neçəsi ilə bağlı razılıq əldə edilib. Vasilyevin fikrincə, bu, Ermənistanın KTMT-dən çıxması məsələsinin gündəmdə olmamasına dəlalət edir. Onun sözlərinə görə, Ermənistanın hərbi-texniki sahədə təhlükəsizliyi də bu təşkilatdan kənarda təmin oluna bilməz.
Reallıq odur ki, Ermənistan KTMT üzvləri tərəfindən qurumun noyabr sammitində razılaşdırılmış sənədləri hələ də imzalamayıb. KTMT Kollektiv Təhlükəsizlik Şurasında qəbul olunan sənədlərin yalnız bəzilərinin Ermənistan tərəfindən nəzərdən keçirilməsi nə deməkdir? Belə bir laqeyid münasibət belə nəticə çıxarmağa əsas vermirmi ki, Ermənistan KTMT-dən çıxmaq fikrindədir? Qərarların bəzilərinin qəbul edilməsi, digərlərinin qəbul edilməməsi Ermənistanın KTMT-dən çıxmaq niyyətində olmasınım göstəricisi deyilmi? Bundan artıq nə olmalıdır ki?
“Ancaq günlərin bir günü Paşinyan Kremli heyrətləndirəcək qərarı verə bilər”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev buna birmənalı prizmadan yanaşmadı: “Ermənistan həmişə KTMT-dan öz maraqları üçün istifadə etməyə çalışıb. 30 ilə yaxın müddətdə Azərbaycan torpaqlarını işğal altında saxlayan Ermənistan bu təşkilatı özü üçün “qalxan” hesab edirdi. Biz dəfələrlə erməni tərəfindən fikirlər eşidirdik ki, Azərbaycana qarşı bu təşkilatın imkanlarından istifadə edə bilər. 44 günlük Vətən müharibəsində də Ermənistan bu məqsədlə KTMT-yə müraciət edib. Amma bu müraciət əsassız olduğu üçün təşkilata üzv ölkələr tərəfindən qəbul olunmayıb. Eyni zamanda, Azərbaycan diplomatiyası erməni tərəfinin bu kimi cəhdlərinin qarşısını aldı. Həmçinin, Azərbaycanın KTMT-yə üzv olan digər ölkələrlə çox yaxşı münasibətləri var. İndi Ermənistan mərhələ-mərhələ bu iclaslara qatılmayaraq, KTMT-nin təlimini öz ərazisində keçirməyə imkan verməyərək, de-fakto KTMT-də deyil, de-yure onun orda olması hələ ki, gözlənilir. Düşünürəm ki, Ermənistanın son davranışları onsuz da Rusiyanı qıcıqlandırır. O üzdən, Moskva Ermənistanın nazı ilə çox oynamayacaq. Bu formatda da Rusiyanın atacağı addımları proqnozlaşdırmaq mümkündür. Ermənistanın artıq KTMT-də olub-olmaması qurum üçün heç nəyi dəyişməyəcək. Ancaq KTMT-də olmaması Ermənistan üçün çox şeyi dəyişəcək. Coğrafiya üzərindən geosiyasi və geostrateji maraqların kəsişməsi bölgəsinə çevriləcək. Xüsusən də, Şimali Atlantika Alyansına daxil olan ölkələrin siyasi və strateji maraqları ilə Rusiyanın maraqları Ermənistan üzərindən ciddi ziddiyyət təşkil edən məqama gələcək. Ermənistan növbəti mərhələdə poliqona çevrilmə ehtimalını özü indidən yaradır. Bütün hallarda hələ ki, Rusiya nəyəsə ümid edir. Hesab edirlər ki, Ermənistanın bu ölkədən asılılığı böyük olduğu üçün İrəvan buna gedə bilməz. Ancaq günlərin bir günü Paşinyan Kremli heyrətləndirəcək qərarı verə bilər. Artıq proseslər buna doğru gedir”.
Vidadi ORDAHALLI
