Əliyevin bu bəyanatı İrəvan müxalifətinə təsirsiz qalmayacaq...
Ramil Hüseynov: “Revanşistlərin bununla Paşinyana təzyiq edib nəyəsə nail olacaqlarını düşünmürəm”
Prezident İlham Əliyev fevralın 1-də Parlamentlərarası İttifaqın baş katibi Martin Çunqonqu qəbul edərkən deyib ki, Ermənistanın müstəqillik haqqında Bəyannaməsində Qarabağın Ermənistanla birləşdirilməsinə birbaşa çağırışlar var və bu sənədə istinadlar da Ermənistanın Konstitusiyasında öz əksini tapıb.
Ölkə başçısının fikrincə, bu iddialara son qoyulduğu, Ermənistan Konstitusiyasında və digər normativ hüquqi sənədlərdə dəyişikliklər edildiyi halda, sülhə nail oluna bilər.
“Ermənistanda bunun tez bir vaxtda həyata keçirilməsinin vacibliyini bildirən dövlət başçısı vurğuladı ki, hazırda Ermənistanda bu mövzuda ölkədaxili müzakirələrin başlanması müsbət addım kimi qiymətləndirilir və bu, sülh prosesinin tezliklə yekunlaşdırılması üçün yaxşı imkan yarada bilər”, - rəsmi məlumatda vurğulanır.
Maraqlıdır, bu bəyanat Paşinyanı Əliyevin guya sifarişlərini yerinə yetirməkdə onsuz da indiyə qədər ittiham edən qisasçı, radikal, şovinist müxalifətin fəallaşmasına necə təsir edə bilər? Yəni bu bəyanatdan Paşinyana qarşı Ermənistan daxilində necə istifadə edəcəklər?
“Hətta sonuncu antiterror əməliyyatları və Xankəndidə suverenliyimizin bərpası belə, erməni cəmiyyətinin...”
Məsələ ilə balı “Bakı-Xəbər”ə açıqlama verən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, müxalifət bunu əlində bayraq edib Paşinyana qarşı təbliğatı gücləndirəcək: “Onsuz da erməni müxalifəti, əsasən də Rusiya maraqlarından çıxış edən parlament müxalifəti bu ittihamlarla çıxış edir. Yəni Paşinyanı Azərbaycan və Türkiyənin maraqlarını həyata keçirməkdə ittiham edirlər. Əliyevin məlum açıqlamasından sonra bu yöndə tənqidlərin dozasını bir qədər də artıracaqlar. Zatən revanşistlər bütün kompromislərə qarşıdılar. Baxmayaraq ki, Ermənistanın məğlubiyyəti ortadadır. Revanşist müxalifət sülhə qarşıdır. Kommunikasiya xətlərinin işə düşməsini, Türkiyə ilə sərhədlərin açılmasını istəmirlər. Çünki yaxşı bilirlər ki, sülhün imzalanması və sərhədlərin açılması onların xəstə ideyalarının dəfn edilməsi deməkdir. Bu, həm də revanşist və marionet erməni müxalifətinin siyasi səhnədən silinməsi deməkdir. Ona görə də bu bəyanatdan Paşinyana qarşı təbliğat kampaniyasında maksimum istifadə edəcəklər. Ancaq düşünmürəm ki, bunun onlara ciddi faydası dəyəcək. Ona görə ki, Paşinyanın tərəfdarları müxalifətlə müqayisədə qat-qat çoxdur. Müxalifətin dayaqları güclü olsaydı, onlar Paşinyana ciddi təzyiq edərdilər. Ancaq bu baş vermir. Hətta sonuncu antiterror əməliyyatları və Xankəndidə suverenliyimizin bərpası belə, erməni cəmiyyətinin müxalifətə stavka etməsinə gətirib çıxarmadı. Bunun nəticəsidir ki, Nikol cəsarətlə konstitusiya islahatlarından danışır. O baxımdan, revanşistlərin bununla Paşinyana təzyiq edib nəyəsə nail olacaqlarını düşünmürəm”.
Vidadi ORDAHALLI
