ABŞ Suriya və İraqdakı hədəflərə hücum planını təsdiqlədi - İrana qarşı bombardman an məsələsidir…
İsrailin Qəzzaya hücumlarından sonra Yaxın Şərqdə artan gərginlik ABŞ bazalarına hücumlarla daha da artıb. Bir neçə gün əvvəl isə İranın dəstəklədiyi qrupların İordaniya-Suriya sərhədində həyata keçirdiyi hücumda 3 ABŞ əsgərinin həlak olması gərginliyi daha da artırıb. ABŞ-ın hazırda İrana qarşı böyük bombardmana hazırlaşdığı açıqlanıb.
ABŞ rəsmiləri İrana qarşı hücum planını artıq təsdiqlədiklərini bildirirlər. Amerika mərkəzli CBS telekanalı xəbər verir ki, ABŞ-ın İraq və Suriyada müəyyən hədəflərə, o cümlədən İranın şəxsi heyəti və obyektlərinə bir neçə gün silsilə zərbələr endirmək planı təsdiqlənib.
Qeyd edilir ki, zərbələrin vaxtını əsasən hava şəraiti müəyyən edəcək. “ABŞ hərbçiləri pis hava şəraitində zərbələr endirmək imkanına malikdirlər, lakin seçilmiş hədəflərin daha yaxşı görünməsinə üstünlük verirlər, bu, hədəfləri vurarkən zərbələrin təsadüfən mülki şəxslərə dəyməməsi üçün vacibdir”, - deyə rəsmilər “CBS News”a bildiriblər
Sözügedən əməliyyatın İordaniyada Suriya sərhədinə yaxın olan “Tower 22” bazasına 3 ABŞ əsgərinin həlak olması ilə nəticələnən pilotsuz uçuş aparatının (PUA) hücumuna və ABŞ bazalarını hədəf alan raket hücumlarına cavab olaraq həyata keçiriləcəyi açıqlanıb.
Pentaqon bildirir ki, bazanı vuran PUA İranın İraqdakı “Ketaib Hizbullah” milis qruplaşması ilə əlaqəlidir. Amerikanın ABC kanalına danışan bir rəsmi bildirib ki, ABŞ cavab tədbirləri çərçivəsində İraqda deyil, çox güman ki, Suriyadakı İranı hədəfləri vuracaq.
Bölgədən gələn digər bir xəbər isə odur ki, “Ketaib Hizbullah” və digər iranpərəst qruplar Amerikanın mümkün cavab hücumuna qarşı İraq və Suriyadakı bazalarını boşaltmağa başlayıblar. “Aşarqul Avsat” qəzeti öz xəbərlərində ərazidəki mənbələrinə istinadən təxliyəni təsdiqləyib. Qəzet əlavə edib ki, iranpərəst silahlı dəstələr səpələnmiş şəkildə yeni mövqelərinə yerləşdiriliblər.
Silahlı qruplara mobil telefonlardan istifadə etmək qadağan edilib və hərəkət üçün mülki avtomobillərdən istifadə edilməsi əmr edilib.
TAHİR
