Avropa Şurasından çıxış müzakirələrinə partiyalar da cəlb ediləcək...
Rəşad Bayramov: “Sənəddə parlamentdə təmsil olunan müxalif partiyaların da imzaları var”
Məlum olduğu kimi, Avropa Şurası Parlament Assambleyasının (AŞPA) qərəzli siyasətindən sonra Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırdı.
AŞPA-nın məlum qərarı ilə bağlı bu günlərdə Prezident Adminstarsiyası (PA), Milli Məclis (MM) və Xarici İşlər Nazirliyinin (XİN) ekspertlərinin iştirakı ilə işçi müzakirə keçirilib.
Müzakirələrdə AŞPA-da Azərbaycana qarşı qərəzli münasibətə və əsassız ittihamlara cavab olaraq Azərbaycanın Avropa Şurasından çıxması və Beynəlxalq Məhkəmənin yurisdiksiyasını tanımaqdan imtina məsələsinin siyasi, hüquqi parametrləri müzakirə olunub.
Xatırladaq ki, daha əvvəl AŞPA-nın qərəzli siyasətinə qarşı olaraq Azərbaycanın Avropa Şurasından çıxa biləcəyi ilə bağlı məlumat vermişdik. Hazırda isə bu məsələ ekspertlər tərəfindən müzakirə olunur və Azərbaycanın Avropa Şurasından çıxmaq ehtimalı artır.
Bu müzakirələrdə siyasi partiyalar, QHT-lər və media yaxından iştirak etməlidirmi?
AMİP Mərkəzi Şurasının sədri, politoloq Rəşad Bayramov “Bakı-Xəbər”ə açıqlamasında bildirdi ki, bu istiqamətdə müzakirələrin aparılmasını təbii qarşılayır: “Çünki Avropa Şurası Parlament Assambleyasında, Avropa Şurasının qurumlarında Azərbaycana qarşı qərəzli kampaniya belə müzakirələrdən kənarda qalmayıb. Avropa Şurası ilk dəfə deyil ki, haqsız qərarlar qəbul edir. Xüsusən də İkinci Qarabağ savaşından sonra faktiki olaraq Azərbaycanın üzərinə mütəmadi şəkildə gəlinib. Bu baxımdan da Avropa Şurasının parlament assambleyasında Azərbaycan nümayəndə heyətinin qeyri - müəyyən müddətə fəaliyyətinin dayandırılması ilə bağlı qəbul olunan qərar Avropa Şurasından çıxmaq kimi məsələlərin müzakirəsini də labüd edirdi. Bu istiqamətdə Prezident Aparatı, Xarici İşlər Nazirliyi səviyyəsində aparılan müzakirələr başadüşüləndir. Amma bu məsələ təkcə hakimiyyət və ya onun ayrı - ayrı qollarının məsələsi deyil, bu məsələ ümummilli, Azərbaycanın bundan sonrakı xarici siyasət preoritetlərinin müəyyənləşdirilməsini özündə ehtiva edən məsələdir. Bu məsələ də ayrı - ayrı qurumların ekspertləri səviyyəsində deyil, siyasi partiyalar, qeyri – hökumət təşkilatları, media qurumlarının iştirakı ilə dinləmələrin keçirilməsi səviyyəsində olmalıdır. Azərbaycan Avropa Şurasına üzvlüklə bağlı müraciət edəndə, ölkə olaraq üzərinə öhdəliklər götürəndə də təkcə hakimiyyət, yaxud hakim partiya öhdəliklər götürməyib. Eyni zamanda, sənəddə parlamentdə təmsil olunan müxalif partiyaların da imzaları var. Bura həmin dövrdə parlamentdə olan: Müsavat, Xalq Cəbhəsi və Demokrat Partiyası da aiddir. Söhbət hər hansısa partiyanın öhdəliyindən getmir. Yəni bu məsələnin ümumi səviyyədə müzakirəyə çıxarılması, həmin müzakirələrin də konkret kateqoriya, siyasi partiya, media və QHT ilə də aparılması labüddür”.
Məhəmmədəli QƏRİBLİ
