Moskva İrəvanı ancaq sözdə hədələyə bilir - NATO-ya da reaksiya belə oldu...
Elxan Şıxəliyev:” Rusiya demək istəyir ki, Ermənistan da kursu belə götürərsə, Gürcüstan, Moldova, Ukraynanın taleyi ilə qarşılaşmağa hazır olsun”
“Ermənistan NATO ilə yaxınlaşmaq istəyirsə, bunun nə qədər təhlükəsiz olduğunu və hansı nəticələrə gətirib çıxaracağını başa düşməlidir”. Bunu Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə İrəvanın NATO ilə yaxınlaşmağa cəhd etməsinə dair suala cavab verərkən deyib.
Onun sözlərinə görə, belə qərarlar qəbul etməzdən əvvəl rəsmi İrəvan ölkənin özündəki vəziyyəti təhlil etməlidir:
“Siz Ermənistanın özünün milli maraqlarının nədən ibarət olduğunu, onun üçün nəyin faydalı olduğunu, nəyin qısamüddətli fayda gətirdiyini və nəyin uzunmüddətli fayda verdiyini başa düşməlisiniz və bundan çıxış etməlisiniz. Qərb hamıya vədlər verir. Mənə sadəcə maraqlıdır, onlar harada və nəyi yerinə yetiriblər?!”
Belə sərt xəbərdarlığın arxasında hansı maraqlar durur?
Hərbi-siyasi şərhçi, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, Ermənistanın NATO-ya yaxınlaşması həmin ölkənin rəhbərliyinin siyasi istəyi ola bilər və reallıqdan uzaqdır: “Ermənistana qədər də bunun nümunələri az olmayıb. Rusiya hər biri ilə bağlı prinsipiallıq göstərib. Rusiyanın hər zaman mövqeyi belə olub ki, NATO Şərqə doğru genişlənməsin. Bunu özünün “qırmızı xətti” sayıb. Demək istəyib ki, əgər keçmiş SSRİ respublikalarından hansısa NATO-ya daxil olarsa, o zaman bu, Rusiya üçün müharibəyə əsas ola bilər. Yalnız 3 Baltikyanı ölkə tez tərpənə bildi. Bu yanaşma Rusiyanın strateji yanaşmasının ana xəttidir. Gürcüstan bunu etmək istədi, nəticəsi Rusiyanın müdaxiləsi ilə bitdi. Moldova da eyni aqibətlə üz-üzə qaldı. Ukrayna eyni addımı atmağa hazırlaşdı, hələ də müharibənin içindədir. İndi də Ermənistan həmin yola qədəm qoyub. Rusiya demək istəyir ki, Ermənistan da kursu belə götürərsə, Gürcüstan, Moldova, Ukraynanın taleyi ilə qarşılaşmağa hazır olsun. Ermənistanın planları Rusiya -Ukrayna müharibəsinə hesablanıb. Onlar düşünürdü ki, Rusiya bu müharibədə pis vəziyyətə düşəcək. Hətta hərbi bazasını belə oradan çıxaracaq. O zaman Avropaya aid qüvvələr onların yerini tutacaq. Əsasını mülki missiya bəhanəsi ilə qoyublar. Gürcüstanın ərazisində münaqişə ocaqları olduğu üçün NATO onu qəbul etməyə çalışmır. NATO-ya üz olmada belə prosedur var. Alyansa üzv ölkələrin biri belə razı olmasa, yeni üzv qəbul edilə bilməz. Türkiyənin orada olması Ermənistanın yolunu bağlaya bilər. Strateji olaraq bilməliyik ki, Ermənistan bu kursu 2018-ci ildə ardıcıl dəstəkləyir. Rusiyanın sərhədçiləri də Ermənistanda xidmət keçir. Avropa Gorusdakı bir əməliyyat qərargahının sayını 6-ya çatdırdı. Ermənistan faktiki olaraq öz ərazisini poliqona çevirir. Heç kim bu tərs qüvvələrin nə vaxtsa üz-üzə gəlməyəcəyinə zəmanət verə bilməz. Fransanın bir generalı da Ermənistan Müdafiə Nazirliyində müşahidəçi kimi təyin edilib və bu istiqamətlər üzrə fəaliyyət göstərir. Cənubi Qafqazı barıt çəlləyinə çevirmək üçün Ermənistan əlindən nə gəlirsə, onu da edir”.
Məhəmmədəli QƏRİBLİ
