“Separatçı Arsax bandası” Paşinyana istefa tələbi qoydu...
Məhəmməd Əsədullazadə: “Separatçıları toparlamağa çalışan xarici qüvvələr var”
Artıq Ermənistanda olan Qarabağ separatçıları Paşinyan hakimiyyətini açıq təhdid etməyə başlayıb. Ləğv edilmiş qondarma qurumun “keçmiş nümayəndəsi” Karen Mirzoyan bəyan edib ki, indiki hakimiyyəti döyüşə hazır deyilsə, o zaman ölkəyə nəzarəti hazır olanlara versinlər:
“Ermənistan hakimiyyətinin bəyanatlarını nəzərə alaraq deyə bilərik ki, diplomatik cəbhədə vəziyyət kifayət qədər mürəkkəbdir. Onlar bu vəziyyətdən necə çıxacaqlarını bilmirlər. Hər şey şansa buraxılıb və Əliyevin qərarlarından asılıdır. Əgər Ermənistanın indiki hakimiyyəti döyüşə hazır deyilsə, o zaman ölkəyə nəzarəti hazır olanlara versinlər. Yeni hökumət onun üçün ölkənin problemlərini həll edəcəyini düşünərək bu və ya digər müttəfiqə ümid bağlamamalıdır”.
Burada diqqəti çəkən məqam odur ki, ilk dövrlərdə Qarabağı tərk edən separatçılar hökumətə qarşı belə tələblərlə çıxış etməyə cəsarət etmirdilər. İndi isə müxalif mövqedən çıxış edirlər. Maraqlıdır, separatçılar bu cəsarəti haradan alır?
“Vəziyyətdən asılı olaraq, Rusiya revanşist qüvvələri və Qarabağ ermənilərini Paşinyana qarşı yönəldə bilər”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, separatçıları toparlamağa çalışan xarici qüvvələr var: “Əlbəttə ki, Ermənistanda Qarabağ separatçı tör-töküntülərinin qalması, onların Paşinyan hökumətinə qarşı bu kimi fikirlər söyləməsi təsadüfi deyil. Onları yönəldən xarici dairələr var. Azərbaycan tərəfi antiterror əməliyyatlarında separatçı başçılarını yaxalamasaydı, gör indi onlar hansı təxribatlar törədərdilər. Nəticədə onlar konkret olaraq Ermənistanda hakimiyyət uğrunda mübarizəyə qalxardılar. Rusiya da bunlara hərtərəfli dəstək verəcəkdi. Biz unutmamalıyıq ki, Qarabağ dağlasında ərazilərimizin işğalında fəal iştirak edən separatçıları Rusiya 1998-ci ildə Ermənistanda hakimiyyətə gətirib. İyirmi il həmin qüvvələr hakimiyyətdə olublar. Kim zəmanət verə bilər ki, bənzər ssenari təkrarlanmayacaq? Düzdür, situasiya 30 il əvvəlki kimi deyil. Həm geosiyasi baxımdan, həm də digər faktorlar baxımından. Ancaq istənilən halda, vəziyyətdən asılı olaraq Rusiya revanşist qüvvələri və Qarabağ ermənilərini Paşinyana qarşı yönəldə bilər. Çünki Robert Köçəryana və Serj Sarkisyana bağlı olan qüvvələr parlamentdə təmsil olunurlar. Hərbi bazalar və iqtisadi təsir rıçaqlarını nəzərə alsaq, Rusiya Ermənistanda aranı qarışdıra bilər. Düzdür, hazırda Paşinyanın dayaqları güclüdür və çoxsaylı tərəfdarları var. Qarabağ separataçılarının səsini kəsmək gücündədir. Necə ki, separatçı Şahramanyan istintaq orqanına dindirilmə üçün aparıldı, eyni qaydada Karen Mirzoyanı da cilovlamaq olar. Ancaq bu o demək deyil ki, hər zaman belə olacaq. Sabah situasiya fərqli ola bilər. Təsadüfi deyil ki, Paşinyan hakimiyyəti separatçılarla məsafəli davranır. Nikol maraqlıdır ki, Araik və digər separatçılar Bakıda həbsdə qalsınlar. Onların azad edilməsini istəmir. Çünki onlar Ermənistan cəmiyyəti üçün də mikrobdular. Bu kimi açıqlamalar sülhü tormozlamağa hesablanıb. Revanşistlər və separatçılar yenidən hakimiyyətə gəlsələr, Azərbaycana qarşı ərazi iddiaları ilə çıxış edəcəklər. Onları Rusiya və Qərbin bəzi dairələri himayə edəcək”.
Vidadi ORDAHALLI
