Sahibkarlar bu qədər güzəştlərdən sonra da Xankəndiyə sərmayə qoymasalar...
Elçin Qurbanov: “Torpaq, mənfəət, gəlir vergilərindən tamamilə azad olunmaq təsərrufat subyekti üçün çox ciddi güzəşt deməkdir”
Xankəndidə fəaliyyət göstərmək istəyən sahibkarlara bir sıra güzəştlər olacaq. Mikro sahibkarlar üçün əsas tələblər onların həmin sahə üzrə təcrübələrinin olması, ən qısa zamanda fəaliyyətlərini bərpa edə bilmələri, vergi və digər öhdəliklərinin olmamasıdır.
Bundan başqa, dövriyyə vəsaitlərinin olması da əsasdır.
Nəzərdə tutulan güzəştlər isə bunlardır:
Vergi güzəştləri
Sosial güzəştlər
Kommunal güzəştlər
10 il müddətinə vergidən azad olma və.s
Bu güzəştlər iş adamlarının Xankəndidə layihələr icra etməsi üçün kifayət qədər stumullaşdırıcı sayıla bilərmi?
İqtisadçı Elçin Qurbanov “Bakı-Xəbər”ə açıqlamasında bildirdi ki, kommunal güzəştlərin tədbiqi stimullaşdırıcı xarakter daşıyır və məqsəd ondan ibarətdir ki, işğaldan azad olunmuş ərazilərdə məçğulluq təmin olunsun: “Orada olan insanların əmək fəaliyyətinə şərait yaradılsın, insanların köçü baş tutsun. Bunlardan başqa, kiçik fərdi sahibkarlığın da dəvəti artıq elan olunub. Xüsusi proqramlar, tədris kursları təşkil olunub. Ancaq bəzi tərəddüdlər yaranır. Orada ancaq tikinti ilə məşğul olanlardı. Həmçinin ictimai iaşə qismən fəaliyyət göstərə bilir. Qarabağa köç məsələsində, ilk növbədə məcburi köçkünlər köçürülməlidir. Ancaq sahibkarların da ora köçürülməsi üçün qaçqın olmaları şərt deyil. Elə etmək lazımdır ki, istənilən sahibkar, vətəndaş orada fəaliyyət göstərə bilsin. Onun orada yaşaması üçün ev, şərait olmalıdır. Bəli, orada ciddi güzəştlər tətbiq olunub. Əsasən də, kənd təsərrüfatının istehsaalı ilə məşğul olan sahibkarlar orada fəaliyyət göstərir. Kütləvi şəkildə köç təşkil olarsa, o zaman sahibkarlıq fəaliyyəti bərpa olunacaq. Sahibkarlıqda dövriyyə, vaxt amilləri çox vacibdir. Dövriyyə yoxdursa, sahibkarlıq fəaliyyəti öz təşəkkülünü tapa bilmir.
Vergilər barədə onu da qeyd etmək istəyirəm ki, torpaq, mənfəət, gəlir vergilərindən tamamilə azad olunmaq təsərrufat subyekti üçün çox ciddi güzəşt deməkdir. Çünki istənilən iqtisadi subyektin fəaliyyətinin əsas nəticəsi onun mənfəət və gəliri ilə xarakterizə olunur. Həmin ərazilərdə fəaliyyət göstərəcək təsərrüfat subyektləri, xidmət obyektləri istehsal məqsədi ilə xarici ölkədən idxal olunan maşın və qurğuların idxalı vaxtı ədv - dən azad olunacaq. Demək olar ki, tamamilə kompleks güzəştlər olacaq. İri sahibkarlar, mehmanxanaların tikintisi ilə məşğul olanlar hər zaman olacaq. Kiçik sahibkarların da çoxluğunu mən görmək istəyirəm. Hesab edirəm ki, hər şey yaxşı olacaq”.
Yenilənmiş Vergi Məcəlləsinə görə, işğaldan azad edilən ərazilərdə istehsal fəaliyyəti ilə məşğul olan rezidentlər üçün idxal olunan texnika, xammal və materiallar Əlavə Dəyər Vergisindən azad edilib. Həmçinin, regionda fəaliyyət göstərən sahibkarlıq subyektləri mənfəət (gəlir), torpaq, əmlak və sadələşdirilmiş vergidən də azad olunub.
Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyevin sözlərinə görə, Prezident İlham Əliyev öz çıxışında tapşırıqlar verdi, məqsədləri göstərdi: “Amma bu o anlama gəlmir ki, artıq sabahdan sahibkarlar işğaldan azad olunmuş ərazilərdə evləri tikməyə başlayacaqlar. Bu, mərhələli şəkildə olacaq. Çünki evlər orada yaşayacaq insanlar üçün tikilir, insanları isə ora köçürmək lazımdır. Məndə olan məlumata görə, həmin ərazilərə hələlik 6-7 min nəfər köçürülüb, amma 1 ildən sonra bu rəqəm 140 minə çatdırılacaq. Hazırda artıq orada evlərin tikintisi gedir və bu prosesdə özəl sektor da mümkün qədər iştirak edir”.
Məhəmmədəli QƏRİBLİ
