Azərbaycanla bağlı sual hamını düşündürür - "gücü haradan alır"...
Bədrəddin Quliyev: “Azərbaycan bu geostrateji reallıqlara əməl etdiyi üçün çox güclüdür”
Son proseslər göstərir ki, rəsmi Bakı ona edilən heç bir təzyiqə boyun əymir, əksinə, haqlı olduğunu deyib döyüşür, meydan oxuyur. Biz bunu Fransa, Almaniya və Avropa institutlarının etdikləri təzyiqlərin fonunda da aydın görürük.
Hamını bir sual düşündürür: bu gücün, inamın mənbəyi nədir?
Müstəqil siyasətçi Bədrəddin Quliyev “Bakı-Xəbər”ə açıqlamasında bildirdi ki,
Azərbaycana qarşı edilən bu təzyiqlərə biz 44 günlük müharibədən sonra daha çox rast gəlmişik: “Elə müharibənin gedişində də bizə çoxlu təzyiqlər oldu. 4 dəfə müharibəni dayandırmağa cəhdlər edildi. Xüsusilə də 19 sentyabr 2023-cü ildən sonra bunların bütün ümidləri puça çıxdı. Çünki Azərbaycan öz gücünə suverenliyini təmin etdi. Azərbaycan öz işini tədricən aparıb və heç bir təzyiq bizə mane ola bilməyib. Ali Baş Komandanın uzaqgörən siyasətinin nəticəsidir ki, biz bu uğurları qazana bildik. Bölgədə baş verə biləcək prosesləri biz qabaqlamış olduq. Proseslərin bizim xeyrimizə getdiyi göz önündədir. Gah deyirlər ki, Azərbaycan Zəngəzuru işğala hazırlaşır, gah deyirlər İrəvana hücum edəcək. Ancaq heç nəyə nail ola bilmədilər. Çünki biz öz ərazi bütövlüyümüzü BMT-nin qətnamələrinə əsaslanaraq bərpa etdik. Azərbaycan sülhə sadiqlik nümayiş etdirir, ancaq ermənilər bölgəyə başqa qüvvələri gətirmək istəyir. Rusiyanı başqa bir ağa ilə əvəz etməyə çalışırlar. Həmin kənar qüvvələrin isə bura gəlməsini heç bir qonşu ölkə istəmir. Çünki Ermənistan bununla regionun təhlükəsizliyi üçün ciddi problemlər yaratmış olur. Azərbaycan indi çalışır ki, anklav kəndlərini azad etsin. Biz sübut edirik ki, kənar qüvvə olmadan da bu məsələni çözə bilərik. Ermənistan isə bunu Azərbaycana təzyiq vasitəsilə etdirmək istəyir. İran ətrafında ciddi proseslər gedir. Azərbaycanın mövqeyi gücləndikcə proseslərə təsir imkanları da artır. Ölkəmizi güclü edən onun haqlı mövqeyi üçün prinsipiallıq göstərməsidir. Azərbaycan öz ərazi bütövlüyünü və suverenliyini tam təmin etdikdən sonra Qərbdən daha çox tənqid alır. Sanki Azərbaycanın beynəlxalq hüquqa əməl edərək öz ərazisindən işğalçıları qovması, separatizmə son qoyması Qərbin bəzi dairələrində məyusluq və qəzəb yaradıb. 30 il ölkəmizin 20% ərazisini işğalda saxlayan Ermənistana bir dəfə də olsun bu cür iradə göstərilməyib.
Qərb öz maraqlarına görə Cənubi Qafqazdan Rusiyanı sıxışdırmaq və özü bu regiona yeni statusda daxil olmaq istəyir. Bu məqsədlə region ölkələrinə qarşı müxtəlif yanaşmalar sərgiləyir. Azərbaycandan Ermənistana hücum olacağı iddiası cəfəngiyatdır. Azərbaycana isə erməni məsələsi ilə təzyiq edərək öz iradəsini diqtə etmək istəyir. Qarabağdan könüllü köçən ermənilərə görə Azərbaycanı ittiham etmək xətti tutub.
Azərbaycan heç bir halda Qərblə Rusiyanın geosiyasi rəqabətində, ziddiyyətlərində yer almamalıdır. İndiki geosiyasi reallıqlar qonşularla yaxşı münasibətlərin prioritet olmasını tələb edir. Qarşıdakı dövrdə regionumuzda hansı siyasi-hərbi olayların yaranacağını indidən demək çətindir. Hər situasiyaya uyğun davranmaq lazımdır. Azərbaycan bu geostrateji reallıqlara əməl etdiyi üçün çox güclüdür”.
Məhəmmədəli QƏRİBLİ
