Putinin əmlakı və gəlirləri açıqlandı - 78 kv.m. mənzil, 10 müxtəlif bankda hesablar...
Rusiya prezident seçkilərinə hazırlaşır. Martın 17-də keçiriləcək seçkilərdən əvvəl Rusiya Mərkəzi Seçki Komissiyası Rusiya prezidenti Vladimir Putinin əmlakı və gəlirləri haqqında məlumatları açıqlayıb.
Putinin açıqlanan əmlakı və gəlirləri ilə bağlı bəzi detallar diqqət çəkir.
Açıqlanan məlumata görə, Putinin Sankt-Peterburqda 78 kvadratmetrlik mənzili və həmin şəhərdə 18 kvadratmetrlik qarajı var.
Putinin 1960 model GAZ M21, 1965 model GAZ M21 və 2009 model Niva markalı avtomobilləri olduğu bildirilir. Rusiya liderinin 10 fərqli bank hesabında 54,4 milyon rublu (təxminən 606 min dollar) olduğu açıqlanıb.
Sankt-Peterburq Bankında da 230 səhm sahibi olan Rusiya lideri 2018-ci ildə başladığı prezidentlik dövrü ərzində - son 6 ildə 67 milyon rubldan çox gəlir əldə edib.
Qeyd edək ki, ölkənin Federasiya Şurası prezident seçkilərinin 2024-cü il martın 15-17-də keçirilməsinə qərar verib və Putinin namizədliyi dünən Rusiya Mərkəzi Seçki Komissiyası tərəfindən təsdiqlənib.
Rusiyada əvvəlki prezident seçkiləri 2018-ci il martın 18-də keçirilib və Putin 76,69 faiz səslə qalib olub.
Tahir TAĞIYEV
