Qaribaşvilinin istefasının ilginc motivi - Gürcüstan Azərbaycana xəyanət etdi...
Əli Orucov: “Çox güman ki, bu, Gürcüstan hakimiyyətində müəyyən fikir ayrılıqlarına səbəb olub”
Xəbər verildiyi kimi, Gürcüstanın baş naziri İrakli Qaribaşvili istefa verib. Siyasətçi bu barədə keçirdiyi brifinqdə məlumat verib.
Qaribaşvili vəzifəsindən ayrılmasını ona hakim “Gürcü Arzusu” partiyasının siyasi şurası tərəfindən partiya sədri vəzifəsini tutmaq təklifi edilməsi ilə əlaqələndirib. Baş nazir qeyd edib ki, partiyanın konqresi fevralın 1-də keçiriləcək.
Ancaq Qaribaşvilinin istefası heç də sadalanan məsələlərlə bağlı deyil. Böyük ehtimalla, Qaribaşvili Gürcüstanın AŞPA-da müzakirələr zamanı Azərbaycana qarşı etdiyi yaramazlıqlara etiraz olaraq bunu edib. Məsələ ondadır ki, AŞPA-da Azərbaycan deputat qrupunun səlahiyytlərinin məhdudlaşdırılması zamanı Gürcüstanı təmsil edən deputatlar müzakirələrə qatılmayıb. Halbuki, onlar müzakirələrə qatılıb ölkəmizə edilən haqsızlığa etiraz edə bilərdilər. Faktiki olaraq, Gürcüstan bununla Azərbaycana xəyanət etmiş oldu.
“Məgər onlar bilmir ki, ölkənin sosial-iqtisadi inkişafına Azərbaycan hansı töhfə verir?”
Sözügedən məsələni “Bakı-Xəbər”ə şərh edən AMİP funksioneri Əli Orucov, prinsipcə, bu versiyanı istisna etmədi: “Əvvəla, Gürcüstanın timsalında Azərbaycana yönəlik belə namərdlik gözləmirdik. Ən azından ona görə ki, tarix boyu Azərbaycan ən çətin dönəmlərdə Gürcüstanın yanında olub, bu ölkəyə dəstək olub. Gürcüstan da Azərbaycan kimi separatizmdən əziyyət çəkib, ərazi itkiləri ilə üzləşib. O baxımdan, bütün bunları nəzərə almalı idilər. Bir qonşu dövlət olaraq buna diqqət yetirməli idilər. Çünki Azərbaycan nümayəndə heyyətinin səlahiyyətlərinin dondurulması ümumən Gürcüstanın da maraqlarına qarşı olan bir addımdır. İki ölkə arasında çox yaxın isti münasibətlərin mövcud olduğunu nəzərə alsaq, gürcü tərəfin AŞPA-da belə biganə mövqe sərgilənməsi anlaşılan deyil. Çox güman ki, bu, Gürcüstan hakimiyyətində müəyyən fikir ayrılıqlarına səbəb olub. Bu səbəbdən Qaribaşvili istefa verib. Fikrimcə, Qaribaşvili AŞPA-da gürcü deputatların Azərbaycanla bağlı müzakirələrdə iştirak etməmələrinə mənfi münasibət bildirib. Çünki ötən ilin payızında Fransa “Bastion” zirehli maşınları Gürcüstan üzərindən Ermənistana apardı. Bir sıra səbəblərdən Azərbaycan açıq şəkildə buna öz etirazını bildirmədi. Bütün bunlar azmış kimi, Gürcüstandan olan deputatların AŞPA-dakı müzakirələrə qatılmaması və Azərbaycanı müdafiə etməməsi doğru qərar deyildi. Belə çıxır ki, Gürcüstan da Azərbaycanın öz suverenliyini təmin etməsindən narahatdır. Məgər onlar bilmir ki, Gürcüstanın sosial-iqtisadi inkişafına Azərbaycan hansı töhfə verir? Çox yaxşı bilirlər. Sadəcə, işlərinə gəlmədiyi üçün oyun oynayırlar”.
Vidadi ORDAHALLI
