Erməni katolikosu da Azərbaycana qarşı əlinə silah götürdü...
Təbriz Musayev: “Ərazilərimizin işğalında erməni keşişləri əllərinə silah alıb terrorçularla birlikdə vuruşublar”
Katolikos yenə qan-qan deyir və düşmənçiliyin əsas baiskarlarından olan erməni kilsəsi öz “missiyası”nı davam etdirməkdədir. Bütün ermənilərin katolikosu II Qaregin Ordu Günü münasibətilə erməni xalqına müraciət ünvanlayaraq, yenə “artsax”dan, erməni döyüşçüsünün “qəhrəmanlığından” və s. dəm vurub.
Katolikosun kin püskürən açıqlamaları belə olub: “Artsax” hərəkatı dövründən etibarən Ermənistan nizami ordusu könüllü dəstələr və çağırışçılar birliyi tərəfindən formalaşdırılıb, onlar otuz ildən çox döyüşüb, “artsax” müharibələri və Azərbaycanın Ermənistan sərhədlərində açdığı döyüşlər zamanı misilsiz şücaətlər nümayiş etdiriblər... Regionumuzda yaranmış ağır vəziyyətdə Ermənistan ordusunun hərtərəfli gücləndirilməsi mühüm əhəmiyyət kəsb edir. Başımıza gələn fəlakətli faciələr, “artsaxın işğalı” fonunda biz ordumuzu bütün gücümüzlə dəstəkləməliyik, çünki Ermənistan ordusu xalqımız üçün dinc və ləyaqətli həyatın, erməni dövlətçiliyinin, təhlükəsiz gələcəyin və müstəqilliyin qarantıdır”.
“Terrorçu xislətinə malik II Qareginin kin püskürməsi və erməniləri revanşa kökləməsi əsla təəccüblü deyil”
Sözügedən məsələ ilə bağlı fikirlərini “Bakı-Xəbər”lə bölüşən İrəvan Azadlıq Təşkilatının sədri Təbriz Musayev hesab edir ki, II Qareginin o cür açıqlamalarla çıxış etməsi əsla təəccüblü görünməməlidir: “Məsələ ondadır ki, Ermənistanın işğal və terror siyasəti tarix boyu kilsədən idarə olunub. O cümlədən, kilsənin erməni diasporu üzərində güclü təsir imkanları var. Erməni kilsəsi hər zaman türklərə qarşı kin və nifrətin aşılanmasında xüsusi canfəşanlıq edib. Məsələn, Erməni Apostol Kilsəsi azərbaycanlıların tarixi vətənimiz - Qərbi Azərbaycandan zorla deportasiyası və Qarabağda aqressiv separatizmin formalaşmasında başlıca rol oynayıb. Bu istiqamətdə bütün imkanlarından istifadə edib. Kilsə xarici əlaqələrini, maliyyə imkanlarını bu istiqamətdə əsirgəməyib. Erməni keşişləri terror və qətllərlə müşahidə olunan torpaqlarımızın işğalında ASALA və “Daşnaksütyun” kimi terrorçu və cinayətkar qruplaşmalarla eyni yolu keçib. Ərazilərimizin işğalında erməni keşişləri əlinə silah alıb terrorçularla birlikdə vuruşublar. Dünyanın heç bir yerində, heç bir dinində erməni kilsəsi qədər separatizmə, terrorçuluğa meylli dini icma mövcud deyil. Düşmənçilik bunların xislətindədir. Dağınıq və pərakəndə şəkildə yaşayan, dövlətçilik ənənəsi olmayan erməniləri kilsə bəsləyib. XIX əsrin əvvəllərindən etibarən Azərbaycan torpaqlarında məskunlaşdırılmağa başlayan ermənilər bilavasitə Rusiyanın yardımı ilə ərazilərimizi mərhələli şəkildə işğal ediblər. Erməni kilsəsi saxtakarcasına Qafqaz Albaniyasının dini irsini özününküləşdirməyə başladı. O vaxt Rusiyanın imperiya siyasəti o idi ki, Cənubi Qafqazda ermənilərin timsalında süni xristian dövləti yaratsınlar. Bu baxımdan Erməni kilsəsinə hərtərəfli meydan verdilər. Baxmayaraq ki, Ermənistan Qarabağda ağır məğlubiyyətə uğrayıb, separatizmin belini qırmışıq, kilsə orada revanşizmi körükləyir. Məğlubiyyətə rəğmən, Erməni kilsəsi Ermənistanda revanşizmi yenidən toparlamağa çalışır. Ona görə də, terrorçu xislətinə malik II Qareginin kin püskürməsi və erməniləri revanşa kökləməsi əsla təəccüblü deyil”.
Vidadi ORDAHALLI
