İran qüvvələrinin Amerika bazalarına hücumları dayanmır - ABŞ-İran müharibəsi hər an başlaya bilər...
Oktyabrın 7-də İsraillə HƏMAS arasında başlayan toqquşmalarla Yaxın Şərqdə vəziyyət daha da gərginləşib. İran qüvvələri ABŞ-ın Suriya, İraq və Qırmızı dənizdəki mərkəzlərini hədəfə almaqda davam edir. Demək olar ki, hər gün bölgədəki ABŞ bazalarına hücumlar edilir.
İki gün əvvəl İran qüvvələrinin İordaniya-Suriya sərhəd xəttində həyata keçirdiyi pilotsuz təyyarə hücumunda 3 ABŞ əsgəri şəhid olub, 30 əsgər isə yaralanıb. Hücumdan bir gün sonra ABŞ bazalarına yenə də ardıcıl hücumlar olub. ABŞ-ın Şəddadi bazası, ardınca Əl Ömər neft yatağındakı ABŞ bazası vurulub.
Yerli mənbələr Hasakenin cənubunda ABŞ qüvvələrinin yerləşdiyi Şəddadi bazası yaxınlığında günorta saatlarında raket hücumu edildiyini bildirib. Suriyadakı Əl Ömər neft yatağında yerləşən ABŞ hərbi bazası da raketlərlə vurulub. İnsan tələfatı və hücumun kim tərəfindən həyata keçirildiyi barədə hələlik məlumat verilmir.
Qeyd edək ki, ABŞ rəhbərliyi İordaniyakı bazaya hücuma görə, İranı günahlanırıb və bunun cavabsız qalmayacağını bildirib.
ABŞ Milli Təhlükəsizlik Şurasının sözçüsü Con Kirbi bazalara edilən hücumla bağlı diqqətçəkən açıqlama verib. Kirbi İranla genişmiqyaslı müharibə istəmədiklərini, lakin 3 əsgərin şəhid olduğu hücuma mütləq cavab verəcəklərini bildirib: “Biz İranla genişmiqyaslı müharibədə maraqlı deyilik, amma cavab verəcəyik, vəziyyətin tonu mütləq dəyişib. Regiondakı müharibədə gərginliyi artırmaq istəmirik. Amma biz əsgərlərimizi qorumaq üçün əlimizdən gələni etməliyik. Prezident Bayden əlimizdə olan variantları dəyərləndirir. İranın dini liderinin nə istədiyini və ya istəmədiyini deyə bilmərəm. Mən bizim nə istədiyimizi deyə bilərəm. İstədiyimiz sabit, təhlükəsiz, firəvan Yaxın Şərqdir, digər tərəfdən də bu hücumların dayandırılmasını istəyirik”.
“Washington Post” qəzeti yazıb ki, hücumu “Ketaib Hizbullah”, “Nucaba” və İranın dəstəklədiyi digər silahlı qruplaşmaların daxil olduğu İraq İslami Müqavimət qrupu öz üzərinə götürüb. Qəzetə danışan qrup rəsmisi olduğunu iddia edən şəxs, "Amerikanın İsrailə dəstəyi davam etdiyi müddətcə Amerikanın cavab təhdidlərinə əhəmiyyət verməyəcəklərini” deyib.
Qeyd edək ki, çox kritik nöqtədə yerləşən “Tower 22” hərbi bazası haqqında çox az şey məlumdur. İraq və Suriya sərhədlərinin kəsişdiyi üçbucaqda yerləşən bazanın yeri strateji baxımdan çox önəmlidir. Burada nə qədər ABŞ əsgərinin olduğu bilinmir. Bundan başqa, bazadakı silahlar və yerləşdirilən hava hücumundan müdafiə sistemləri də sirrdir.
İndi ABŞ-ın İordaniyadakı bazasına vurulan pilotsuz təyyarə hücumunda 3 əsgərin həlak olması ilə bütün gözlər İrana çevrilib. ABŞ-ın qisas vədini və İrana qarşı ittihamları dəyərləndirən Xarici İşlər Nazirliyinin sözçüsü Nasir Kenani Vaşinqton administrasiyasının əsassız ittihamlar səsləndirdiyini bildirib. Sözçüsü Kenaninin sözlərinə görə, İordaniyadakı hücum ABŞ-ı yenidən bölgədə yeni bir qarşıdurmaya sürükləmək istəyənlərin təxribatıdır. Xarici İşlər Nazirliyinin sözçüsü həmçinin İranın dəstəklədiyi milis qruplarının Tehrandan əmr almadıqlarını da iddia edib.
İordaniyadakı hücumdan sonra müharibə istəmədiklərini deyən bir çox amerikalı senatorun İrana qarşı birbaşa qisas çağırışları etməyə başlayıb. Texas senatoru Con Kornin X hesabından “Hədəf Tehran” mesajını paylaşıb. Daha sonra o, düzəliş edərək SEHAP Ordusunu nəzərdə tutduğunu bildirib. Cənubi Karolina nümayəndəsi Lindsey Graham da prezident Baydeni İran daxilində mühüm hədəfləri vurmağa çağırıb. Arkanzas senatoru Tom Kotton isə təkcə İrana deyil, bütün Yaxın Şərqdəki İranın "terrorçu" qüvvələrə qarşı dağıdıcı bir qisas zərbəsi endirilməsini görmək istədiyini deyib. Missisipi ştatından olan Rocer Uiker İrana və onun liderlərinə birbaşa hücuma çağırıb. Ayova ştatından Çak Qrassli də X hesabında "Prezident Bayden, nəhayət İrana qarşı qətiyyətli bir mövqe tutub hərəkətə keçəcəkmi?" " yazıb..
“USA Today” qəzetinə danışan keçmiş terrorla mübarizə və kəşfiyyat zabiti Cavid Əli son hücumun mümkün nəticələrinin olacağını və bölgədə vəziyyətin xeyli gərginləşəcəyini bildirib. Əli bölgədə Amerika hərbçilərinə qarşı bu günə qədər edilən ən böyük hücumla mühüm bir həddin aşıldığını deyib.
Britaniyanın baş naziri Rişi Sunak isə Yaxın Şərqdəki gərginlikdən narahatlığını ifadə edib və İranı İordaniyanın şimal-şərqində, Suriya sərhədi yaxınlığında, üç ABŞ əsgərinin ölümü ilə nəticələnən hücumdan sonra gərginliyi azaltmağa çağırıb.
Tahir TAĞIYEV
