Paşinyan sülh sazişinə 2-ci pozucu alternativ tapdı - hücum etməmək paktı...
Elşən Mustafayev: “Hücum etməmək haqqında öhdəliyi müəyyən edə biləcək ən dolğun sənəd sülh sazişi ola bilər”
Ermənistanın baş naziri Nikol Paşinyan ordu gününə həsr olunmuş çıxışı zamanı bildirib ki, Ermənistan Respublikası Azərbaycana hücum etməmək haqqında pakt bağlamağı təklif edib:
“Biz Azərbaycana silahlara qarşılıqlı nəzarət mexanizmini tətbiq etməyi təklif etmişik. Azərbaycana sülh müqaviləsinin imzalanması gözlənildiyindən daha uzun çəkəcəyi halda, hücum etməmək haqqında paktı imzalamaq da təklif olunub”.
Paşinyanın bu təklifini sülh sazişinə yönəlik növbəti pozucu alternativ kimi dəyərləndirə bilərikmi?
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistanın baş naziri Nikol Paşinyan bir müddət əvvəl “sülh göyərçini”nə çevrilsə də, regionda baş verən son proseslərdən sonra adəti üzrə siyasi kursunu dəyişərək Azərbaycanla baş tutacaq sülh müqaviləsini imzalamaqdan yayınmağa, sülh danışıqlarını uzatmağa başlayıb: “Bunun isə bir sıra səbəbləri var. Azərbaycanın 19 sentyabrda başlatdığı lokal antiterror tədbirlərindən sonra regionun mənzərəsinin dəyişməsi, Qərbin, xüsusən də ABŞ və Fransanın Rusiyanı Cənubi Qafqazdan sıxışdırıb çıxarmaq üçün aktiv fazaya qədəm qoymaları və bu məqsədlə guya Ermənistanı dəstəkləyən bəyanatlar səsləndirməsi Nikol Paşinyanın siyasi kursunun yenidən dəyişməsinə səbəb olub. Qərbin əlində alətə çevrilən Ermənistan, əslində dalana dirəndiyini dərk edir. Çünki Qarabağdan könüllü köçən ermənilərin Nikol Paşinyanın bir nömrəli başağrısına çevrilməsi, eləcə də müxalifətin də yavaş-yavaş aktivləşməsi onsuz da siyasi problemlərlə çalxalanan Ermənistan üçün heç də yaxşı gələcək vəd etmir. Bütün bu hadisələrin fonunda isə Nikol Paşinyan dar siyasi təfəkkürü ilə etirazları yatırmaq, müxalifəti bir müddətlik susdurmaq üçün Azərbaycanla imzalanması nəzərdə tutulan sülh müqaviləsi və aparılan sülh danışıqlarını baltalamaq qərarına gəlib.
Paşinyanın sülh üçün yenidən 3 şərt barədə fikri sərhədlərin demarkasiya və delimitasiyası üçün 1975-ci il xəritələrinin əsas götürülməsi barədə fikrinin Azərbaycan tərəfindən qəbul edilməyəcəyini gözəl bildiyindən xəbər verir. Birincisi, uduzan və kapitulyasiya sənədi imzalayan tərəfin sülh üçün şərt qoşması dünya tarixində görünməmiş hadisədir. Əgər sülh müqaviləsi üçün şərt qoyacaq tərəf varsa, bu, qalib Azərbaycandır. İkincisi, Ermənistan tərəfi dəfələrlə 1975-ci il xəritələrini əsas gətirsə də, bu, Azərbaycan tərəfindən təsdiqlənməyib. Bəlkə də bu səbəbdən Nikol Paşinyan indi də hücum etməmək haqqında saziş məsələsini gündəmə gətirməklə, sülh danışıqlarını ləngitmək məqsədi güdür.
Paşinyanın indiki halda yeganə məqsədi vaxt udmaq və ölkə daxilindəki ciddi problemləri həll etməkdir. Bu problemlərin həlli isə artıq mümkünsüzdür. Hücum etməmək haqqında öhdəliyi müəyyən edə biləcək ən dolğun sənəd sülh sazişi ola bilər ki, bundan da Paşinyan maksimum yayınmağa çalışır”.
Məhəmmədəli QƏRİBLİ
