İstanbulda katolik kilsəsinə terror - ASALA izi, fransız radikalları...
Bəhruz Quliyev: "Ölkələrdə qarışıqlıq salmaq və onları bir-biri ilə üz-üzə qoymaq istəyirlər"
İstanbulda katolik kilsəsində atışma olub. Hadisə şəhərin Avropa hissəsində, Sarıyer rayonundakı “Santa Maria” katolik kilsəsində ayin zamanı baş verib.
Hadisə yerinə çox sayda polis və təcili yardım əməkdaşları cəlb edilib. Silahlı hücum nəticəsində, ilkin məlumata görə, bir nəfər həlak olub.
Türkiyənin daxili işlər naziri Ali Yerlikaya məlumatı təsdiqləyib. Hücumun 2 maskalı şəxs tərəfindən həyata keçirildiyini deyən nazir məsələ ilə bağlı genişmiqyaslı təhqiqat və cinayətkarların tutulması üçün işlərə başlandığını bildirib.
Son məlumatlara görə, Türkiyənin İstanbul şəhərində yerləşən “Santa Maria” kilsəsində baş verən silahlı insidentlə bağlı 50-yə yaxın şəxs tutulub.
Qətl törədən hər iki şəxs yaxalanıb. Biri tacik, digəri rusiyalı olan bu iki əcnəbi İŞİD üzvüdür.
Bu, təbii ki, öz yerində. Bu terror hücumunda ASALA və fransız radikallarının izi də ehtimal oluna bilərmi? Nəzərə alsaq ki, son dövrlər ASALA daha aktiv "fəaliyyət" göstərəcəyini elan edib. Bu baxımdan Türkiyədə italyan kilsəsinə qarşı terror hadisəsində ASALA izlərini ehtimal etmək olar?
"Türkiyədə baş verən bu terror hadisəsində də ehtimal olunur ki, ASALA və Fransa izi var"
"Bakı-Xəbər"ə açıqlamasında SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev "Məlumdur ki, İstanbulda "Santa Maria" adlı katolik kilsəsində atışma olub. "Bu terror hücumunda ASALA və Fransız izi ola bilərmi" deyə soruşsanız, ASALA Ermənistanın terror təşkilatıdır. Bu təşkilat vasitəsilə müxtəlif dövr və dövlətlərdə terror hadisələri baş verib"-deyə bildirdi.
Ekspertin sözlərinə görə, bu terrorun kökündə erməni izi var: "Çünki ölkələrdə qarışıqlıq salmaq və onları bir-biri ilə üz-üzə qoymaq istəyirlər. Hətta müxtəlif dövrlərdə Türkiyə və Azərbaycan səfirliklərinə də hücumlar olub. Bu hücumları da araşdırdıqda burada fransız barmağı və ASALA təşkilatının izi olub.
Ümumiyyətlə, ASALA təşkilatının özü bir neçə yerə parçalanıb və onların müxtəlif qrupları fəaliyyət göstərir. Onları maliyyələşdirən dövlətlərdən biri məhz Fransadır".
Bəhruz Quliyev sözlərinə belə davam edib: "Türkiyədə baş verən bu terror hadisəsində də ehtimal olunur ki, ASALA və Fransa izi var. Mən ehtimal edirəm ki, Avropa Şurası ilə Azərbaycanın problemi olduğu bir dövrdə bu, məqsədli şəkildə həyata keçirilən terror hadisəsidir.
Türkiyə hüquq-mühafizə orqanları hadisəni araşdırmağa başlayıblar. Amma ilkin versiya budur ki, belə bir dönəmdə, yəni Avropa ilə Türkiyə və Azərbaycan arasında gərginliyi qızışdırmaq məqsədilə terror aktı həyata keçirilə bilər".
Leyla QARAXANLI
