Ermənistan XİN mina xəritələri ilə bağlı tam yalan məlumat yaydı...
Azər Həsrət: “Ermənistana inanmaq olmaz, zamanla onların yalançı vədləri sübut olunacaq”
Ermənistan minalanmış ərazilərin xəritəsini Azərbaycana təqdim edəcək. Bununla bağlı bu ölkənin mediasında müxtəlif fikirlər səslənir. Ermənistan Xarici İşlər Nazirliyinin X səhifəsində minalanmış ərazilərin xəritələrinin Azərbaycana verilməsi ilə bağlı qeyd edilib: “Artıq bir neçə dəfə bildirildiyi kimi, Ermənistan, o cümlədən etimad yaratmaq məqsədilə Dağlıq Qarabağ rəsmilərindən aldığı bütün minalanmış xəritələri Azərbaycana təhvil verib. Daha sonra humanitar məqsədləri rəhbər tutan Ermənistan Dağlıq Qarabağın keçmiş xadimlərini dindirərək, onların Azərbaycana köçürülməsi üçün yeni xəritələr hazırlayıb.
Təəssüflər olsun ki, bu təşəbbüs Azərbaycan tərəfindən dərhal son dərəcə mənfi və istehzalı cavab aldı, Ermənistanın etimad yaratmaq cəhdləri tənqid olundu, mövzunun manipulyasiyasına davam edildi və Ermənistanın müsbət addımı mənfi ritorikaya çevrildi”.
Məlumatda qeyd edilir ki, Ermənistan tərəfi minalanmış ərazilərin bütün xəritələrini Azərbaycana təqdim edib. Bu nə dərəcədə doğru məlumatdır?
"Azərbaycanı ittiham edərcəsinə açıqlamalar yaymaq Ermənistan dövlətinin xarici siyasətinin qeyri-ciddiliyindən xəbər verir”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, Ermənistan tərəfinin dediklərinin doğru olmasını istərdik. Ancaq bu növbəti manipulyasiyadır: “Hər kəs yaxşı bilir ki, bir zamanlar Ermənistan tərəfi iddia edirdi ki, onlarda minalanmış ərazilərin xəritəsi yoxdur. Müəyyən müddət sonra o xəritəni Azərbaycana təqdim etdilər. Lakin həmin xəritələrin dürüstlüyü cəmi 25 faiz təşkil edirdi. Bu günlərdə də bəyan ediblər ki, daha 8 xəritəni Azərbaycan tərəfinə verməyə hazırdırlar, bunu vasitəçilərin əli ilə edəcəklər. Belə bir şəraitdə Azərbaycanı ittiham edərcəsinə açıqlamalar yaymaq Ermənistan dövlətinin xarici siyasətinin qeyri-ciddiliyində xəbər verir. Azərbaycanın Ermənistanı durduğu yerdə hər hansı bir məsələdə ittiham etmək kimi istəyi yoxdur. Ümümiyyətlə, Azərbaycan tərəfi Ermənistanla münasibətləri normallaşdırmaq istəyir. Təəssüflər olsun ki, Ermənistan tərəfinin nə istədiyi bəlli deyil. Bu ölkə başqalarının istəyi ilə oturub-durur. Fransanın sözü ilə hərəkət etməklə Ermənistan öz milli maraqlarını belə zərbə altına qoyur. Bu səbəbdən də Ermənistana inanmaq olmaz. Zamanla onların yalançı vədləri sübut olunacaq”.
Günel CƏLİLOVA
