Qərb Qafqazda özü-özünü Rusiyasız məhv edir - anti-Azərbaycan kursu...
Əvvəldən də gözlənildiyi kimi, Avropa Şurası Parlament Assambleyasında ölkəmizə qarşı başlanan növbəti siyasi oyun davam etdirilməkdədir. Qurumun Monitorinq Komitəsi də gözlənildiyi kimi bəyan etdi ki, Parlament Assambleyası Azərbaycan nümayəndə heyətinin etimadnaməsini təsdiqləməməlidir.
Parlament Assambleyasının da bu tövsiyəyə əməl edəcəyi heç kimdə əvvəldən şübhə doğurmur. Azərbaycan nümayəndə heyətinin sədri Səməd Seyidov Monitorinq Komitəsinin hesabatına etiraz edib: “Biz hesab edirik ki, bu təşəbbüs müstəqil və suveren bir ölkə kimi Azərbaycana qarşı köklü qərəzin bariz təzahürüdür”. Buna rəğmən, Avropa Şurasının Monitorinq Komitəsi bildirib ki, Azərbaycanın quruma üzvlüyündən 20 ildən çox müddət keçsə də, rəsmi Bakı “üzvlüyə qəbul edilərkən təşkilat qarşısında götürdüyü əsas öhdəlikləri yerinə yetirməyib”. Etimadnamələrin qəbul edilməməsi tövsiyəsini verən Monitorinq Komitəsi deyib ki, Azərbaycanda seçkilərin azad və ədalətli şəkildə keçirilməsi ilə bağlı “çox ciddi narahatlıqlar var”. Amma bütün bu əsassız iddialara dair konkret sübutlar təqdim edilməyib. Qarabağla bağlı vəziyyət, ermənilərin buranı könüllü tərk etməsi kimi məqamlarla bağlı da Monitorinq Komitəsi ciddi təhriflərə yol verib. Bunlar fonunda Səməd Seyidov Monitorinq Komitəsinin qərarına etiraz məktubunda yazıb: “Nümayəndə heyətimizin etimadnaməsinin ratifikasiyasından imtina AŞPA-nın və ümumilikdə Avropa Şurasının hakimiyyətinə ciddi zərbə olacaq və onun ağır nəticələrinə görə məsuliyyət bu dar düşüncəli addımın təşəbbüskarlarının üzərinə düşür”. Baş verənləri şərh edən rusiyalı politoloq, beynəlxalq münaqişələr üzrə mütəxəssis və təhlükəsizlik məsələləri üzrə ekspert Yevgeni Mixaylov bildirir ki, Qərbin riyakarlığı Avropanın əsas dövlətlərinə ölkələrinin milli maraqlarını hər şeydən üstün tutan liderlər rəhbərlik etməyənədək davam edəcək: “Rusiya Avropa Şurasında öz mövqeyini göstərməyə başlayan kimi onun hüquqları dərhal məhdudlaşdırılmağa başladı və nəticədə biz AŞPA-dan çıxdıq. Buna görə kim zərər çəkdi? Yalnız Avropa Şurası. Bax, Azərbaycanla bağlı da eyni vəziyyətdir. Bakı beynəlxalq miqyasda maraqlarını qətiyyətlə müdafiə edir, bu da cavabı. Onlar nə edəcəklərini bilmirlər. Bir tərəfdən Azərbaycanın ehtiyatlarından asılılıq, digər tərəfdən Parisin və Berlinin Cənubi Qafqazda Moskva və Bakının ümumi maraqlarına xələl gətirmək istəyi. Üstəlik ABŞ-ın təsiri. Avropa Şurası bürokratları üçün seçim birmənalıdır: guya münaqişədən zərər çəkmiş və həm Bakı, həm də Moskvadan inciyən Ermənistana kömək bəhanəsi ilə Azərbaycana təzyiq göstərmək”. Onun sözlərinə görə, “kollektiv” adlandırılan Qərbin bu cür davranışı Azərbaycanı və Rusiyanı yolundan döndərməməlidir: “Düşünürəm ki, Qərbin riyakarlığına öyrəşməyin və sadəcə olaraq, öz milli maraqlarını müdafiə etməkdə davam etməyin vaxtıdır. Ölkələrimizin prezidentləri çox gözəl münasibətdədirlər və bu əlaqələr daha da möhkəmlənir. Biz birlikdə Cənubi Qafqazda birbaşa kəsişən Bakının maraqlarını müdafiə edə biləcəyik. Bu vəziyyət isə Avropa Şurasının əsas dövlətlərinə İlham Əliyev və Vladimir Putin kimi ölkəsinin milli maraqlarını hər şeydən üstün tutan liderlər rəhbərlik etməyənədək davam edəcək”.
Əslində, bütün bunları Avropada da yaxşı sezirlər. Məsələn, AŞPA-nın məlum toplantısında sözügedən qərara qarşı sərt çıxış edən deputatlar da tapılıb. Böyük Britaniyanın AŞPA-dakı nümayəndəsi Yan Liddel-Qreydjer Azərbaycana qarşı demarşı pisləyib. O, çıxışı zamanı həmkarlarının gəldiyi qənaətə etiraz edib və bunun düzgün qərar olmadığını səsləndirib. Ümumiyyətlə, baş verən son hadisələr təşkilatın daxilində demokratik dəyərlərin iflasa uğradığını üzə çıxarıb. Təşkilat həqiqət və faktlardan uzaq, erməni təbliğatının əsas elementlərini təkrarlayan, qərəz və yalanlardan qaynaqlanan xəbərlər üzərində fəaliyyəti prioritet elan edib. AŞPA-da Azərbaycan nümayəndə heyətinin səlahiyyətlərinin məhdudlaşdırılmasının istənilməsinin arxasında daha çox anti-Azərbaycan meyilini formalaşdırmış qüvvələrin dayandığı da görünür. Azərbaycan beynəlxalq təşkilatlarla işləməkdə, əlaqələrin qurulmasında maraqlı tərəfdir və bu iş xarici siyasətimizin əsasını təşkil edən məqamlardan biridir. Amma bu o demək deyil ki, hansısa təşkilat dövlətimizi ikili standartlara boyun əyməyə məcbur edə bilər. Qərarlarının heç bir hüquqi və məcburetmə təsiri olmayan, sülhün əldə edilməsinə heç bir fayda verə bilməyən AŞPA indi qərəzli siyasəti ilə hazırda Cənubi Qafqazda sabitliyə böyük təhlükə yaradır. Bu hal bütünlükdə Qərbin regionda maraqlarına və mənafeyinə zərbə hesab olunur. O da faktdır ki, Azərbaycan Avropa Şurasından çıxarsa, İnsan Haqları üzrə Avropa Məhkəməsinin yurisdiksiyasından da çıxa bilər. Bundan Azərbaycan heç nə itirməyəcək. Əksinə, Avropa Şurası kimi qurumların təqzyiqindən xilas olacaq. Bu qurumu öz nəzarətinə götürən Fransa-Almaniya cütlüyünün Azərbaycana təzyiq etmək istiqamətində cəhdləri bu müstəvidə də heç olacaq.
Nahid SALAYEV
