Avropa Azərbaycana qarşı daha hansı təzyiq oyunlarına baş vura bilər…
Samir Hümbətov: “Avropanın bizə yox, bizim ona təsirimiz ola bilər”
Avropa İttifaqının (Aİ) Xarici Əlaqələr və Təhlükəsizlik Siyasəti üzrə ali nümayəndəsi, Aİ Komissiyasının vitse-prezidenti Cozep Borrelin Azərbaycan əleyhinə səsləndirdiyi əsassız iddialar ondan xəbər verir ki, hazırda Qərbdə ölkəmizlə bağlı açıq şəkildə sifariş yerinə yetirilir.
Qərbdəki müəyyən dairələr Avropa İttifaqı, AŞPA, Avropa Parlamenti, həmçinin ABŞ-dakı bəzi qruplar Fransa, Almaniya kimi ölkələri önə verərək Azərbaycana qarşı ciddi şəkildə fəaliyyətə təşviq edirlər.
Avropa Şurası Parlament Assambleyasının əsassız iddialarını da xatırlayırıq ki, son yanaşmalar da Azərbaycana qarşı uzunmüddətli qərəzin davamıdır.
Avropa İttifaqı Azərbaycan ilə Ermənistan arasında vasitəçi olsa da, Fransanın qərəzli yanaşması səbəbindən Aİ-nin vasitəçiliyi faydasız hala gəldi, tərəflər arasında sülhyaratma prosesinə ciddi zərbə vuruldu.
Maraqlıdır, Qərb bundan sonra Azərbaycana qarşı hansı qərəzli addımları ata bilər?
Siyasi şərhçi Samir Hümbətov “Bakı-Xəbər”ə açıqlamasında bildirdi ki, Avropa Şurasındakı bu qərar əslində Qərblə Azərbaycan arasında siyasi qırılmanın açıq göstəricisi kimi də dəyərləndirilə bilər: “Azərbaycan əraziləri işğalda olduğu müddətdə, vətəndaşlarımızın doğma yuvalarından köçkün olduğu dövrdə, onların haqq və hüquqlarının pozulduğu zamanda bunu dilə gətirməyən Avropa indi yenidən fəallaşıb, Azərbaycana qarşı qərəzli mövqe tutmağa davam edir. Avropa Şurasında Azərbaycanın səs hüququnun alınması Azərbaycan üçün mahiyyətcə ciddi təsir yaratmır. Yəni əslində biz ora daxil olan zaman düşünürdük ki, Avropa, Qərb özlərini dünyanın sivil cəmiyyətləri sayırlar və ədalətin, beynəlxalq hüququn tərəfdarı olaraq Ermənistanın Azərbaycan ərazilərini işğalını qınamaqla bərabər, onu məcbur edəcəklər ki, bu işğala son versin. Biz nəyi gördük? 30 ildə eyni proses oldu. ATƏT - in Minsk qrupu necə etmişdisə, eynisini Avropa Şurası etdi. Ona görə də düşünürəm ki, bizim ordakı fəaliyyətimiz də hansısa müsbət nəticə vermir. Avropa Şurası Parlamenti indiyə kimi bizə nə qazandırdı ki, indi nə qazandırsın? 23 illik dövr ərzində təcrübə göstərdi ki, Avropa Şurası bizə hansısa ciddi uğur verməyib. Ona görə də, biz onların qərarlarını ciddiyə almaq məcburiyyətində deyilik. Digər tərəfdən isə, Avropa İttifaqının özündə olan bəzi dövlətlər Azərbaycanla strateji tərəfdaşlıqla bağlı sənədə imza atıblar. Azərbaycan bu gün onların təchizatında önəmli rol oynayır. Eyni zamanda 2022 - ci il iyun ayının 18 - də Avropa İttifaqı ilə Azərbaycan arasında alternativ və bərpa olunan enerji ilə bağlı müqavilə imzalanıb. Azərbaycan onlara enerji təchizatını həyata keçirəcək. 2022 - ci il dekabrın 17 - də Azərbaycan həm də Avropa dövlətlərində - Macarıstan, Rumıniya, Gürcüstan və Azərbaycan birlikdə alternativ və bərpa olunan enerjinin Avropaya idxalını müzakirə edib, sənəd imzalayıblar. Ona görə də düşünürəm ki, Avropanın bizə yox, bizim ona təsirimiz ola bilər. Onlar əllərində olan bütün təzyiq rıçaqlarından istifadə ediblər”.
Məhəmmədəli QƏRİBLİ
