Erməni nazir mina xəritələrini gizlətdiklərini etiraf etdi...
Mübariz Göyüşlü: “Bu xəritələrin uzun müddət gizlədilməsi Ermənistan hakimiyyətinin riyakar siyasətinin göstəricilərindən biridir”
Ermənistan Qarabağda minalanmış ərazilərin yeni xəritəsini Azərbaycana verə bilər. Bu barədə erməni KİV-i məlumat yayıb. Məlumata görə, bu barədə Ermənistanın xarici işlər naziri Ararat Mirzoyan deyib.
Onun sözlərinə görə, Ermənistanın Qarabağda minalanmış ərazilərin yeni xəritəsini Azərbaycana təqdim etməsi istisna deyil.
Bildirək ki, 2020-ci ildə 2-ci Qarabağ müharibəsi bitəndən indiyədək Ermənistan tərəfi minalanmış ərazilərin dəqiq xəritəsini təqdim etməyib. 2020-ci ildən sonra mina qurbanlarının sayı 342 nəfərə çatıb.
2020-ci ilin noyabrından bugünədək 118 min hektardan çox ərazi minalardan və partlayış təhlükəli sursatlardan təmizlənib. O cümlədən, 18 mindən çox piyada əleyhinə, 31 mindən çox tank əleyhinə mina, 60 mindən çox partlamamış hərbi sursat aşkarlanaraq zərərsizləşdirilib.
Yaxşı, indiyə qədər niyə mina xəritələrini verməyiblər, nəyi gözləyirlər? İndi nəyin bazarlığını etmək istəyirlər? Bəs "haqq-ədalət" carçısı olan beynəlxalq təşkilatların niyə səsi çıxmır? Ermənistan mina xəritələrini gizlətdiyini açıq etiraf edirsə, daha dunya birliyi, beynəlxalq qurumlar nə gözləyir, niyə Ermənistana təzyiq etmirlər?
“Dünya birliyi susmamalı, bu istiqamətdə Ermənistana təzyiqlər göstərməlidir ki, xəritələri tez bir zamanda versin”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə şərhində bildirdi ki, ermənilərin belə davranışları ilk deyil, hər zaman bu cür manipulyasiyalar edirlər. O qeyd edir ki, istər xəritələrin verilməsi, istər danışıqlar, istərsə də sülh məsələləri olsun, hamısında eyni yolu tututlar. “Ermənistan heç bir vaxt dediyi sözün üstündə durmayıb, hər zaman yayınmağa çalışıb. Onlar müxtəlif bəhanələrlə real işləri həyata keçirməkdən yayınmağa cəhd edirlər. Müharibədən dərhal sonra onlara sülh üçün əlimizi uzatdıq. Eyni zamanda mina xəritələrinin verilməsi ilə bağlı müraciətlər etdik, amma əvvəlcə xəritələrin olduğunu inkar etdilər, sonra yanlış xəritələr verdilər, indi də Ararat Mirzoyan bəyan edir ki, gerçək mina xəritələri Azərbayana verilə bilər. Özü də bunu mina qurbanlarının sayı 342 nəfərə çatandan və Azərbaycan bu istiqamətdə beynəlxalq kampaniya aparandan sonra xəritələrin əllərində olduğunu açıqlayırlar. Ermənistan üç ildir ki, gerçək mina xəritələrini gizlətməklə öz bədxah davranışlarını ortaya qoyub. Bu xəritələrin uzun müddət gizlədilməsi Ermənistan hakimiyyətinin riyakar siyasətinin göstəricilərindən biridir”-deyə müsahibimiz bildirdi.
M.Göyüşlünün sözlərinə görə, Ermənistan rəhbərliyi hər dəfə mina xəritələrindən sui-istifadə edib onu bazarlıq predmetinə çevirib. “Hər fürsətdə öz saxta niyyətlərini ortaya çıxarırlar. Lakin Azərbaycan da öz mövqeyini sərt şəkildə ortaya qoyub, qoyur. Bizim tələblərimiz aydındır. Ermənistan mina xəritələrinin verilməsi məsələsində bizimlə əməkdaşlıq etməlidir. Ermənistan I Qarabağ müharibəsində əsir və girov götürülmüş 4 minə yaxın azərbaycanlının taleyinə aydınlıq gətirməlidir. Eyni zamanda ekoloji terroru dayandırmalıdır. Bu məsələləri həyata keçirməsələr onlarla hər hansı bir əməkdaşlıq mənasız görünür. Hesab edirəm ki, onlar növbəti dəfə öz xislətlərinə uyğun davranışla əməkdaşlıq məsələlərini pozacaqlar. Dünya birliyi susmamalı, bu istiqamətdə Ermənistana təzyiqlər göstərməlidir ki, xəritələri tez bir zamanda versin. Amma təəssüf ki, biz bunu görə bilmirik. İndi Ermənistanın xarici işlər naziri özü etiraf edir ki, xəritələr onlardadır, bu xəritələri heç bir şərt irəli sürmədən Azərbaycana verməlidirlər. Bu qədər insanın mina qurbanı olmasının günahkarı Ermənistandır. O, riyakar addımlarını dayandırmalıdır. Bizim insanlar ermənilərin qurduğu mina tələsinə düşüb həyatlarını itirirlər. Sanki bu da beynəlxalq təşkilatların işinə yarayırmış kimi görsənir. Əks halda reaksiya verərdilər. Halbuki, bu ermənilərə qarşı olsaydı indi dünyada böyük hay-küy qopmuş olardı. Bu mənada hesab edirəm ki, Ermənistanın nəyin bazarlığını nəzərdə tutmasından asılı olmayaraq, mina xəritələrinin verilməsi Azərbaycanın tələbidir, o tələbi yerinə yetirməlidir”-deyə M.Göyüşlü vurğuladı.
İradə SARIYEVA
