Zelenski bu üsulla Qərbi daha böyük yardımlara təşviq edir...
Elxan Şıxəliyev: “Zelenskinin şikayəti odur ki, biz indiyə kimi döyüşmüşük, hərbi dəstək verin, yenə döyüşək”
Qərbdəki tərəfdaşlarının göstərdiyi hərbi və maliyyə yardımı Ukraynanın müharibədən sağ çıxması üçün həlledici olsa da, qələbə üçün kifayət etmədi. Bunu Ukrayna Prezidenti Vladimir Zelenski deyib:
“Hər kəs gülümsəyir, qucaqlayır və deyir ki, sən dözümlüsən, güclüsən, azad dünyanın liderisən, demokratiyamızı xilas edirsən. Əgər Ukrayna xalqının belə prezidenti olmasaydı, biz Avropanın yarısını itirəcəkdik, daha sonra Rusiya ABŞ-a hücum edəcəkdi. Biz nəyimiz varsa, hamısını sizə verməliyik. Daha sonra dayandılar. Nankor olmaq istəmirəm. Çünki qərbli tərəfdaşlarımız Ukraynaya çox böyük kömək etdilər, bu kömək olmasaydı, ölkəmiz sağ qala bilməyəcəkdi. Onlar bizə ayaq üstə dayanmağa kömək etdilər. Fikrimcə, qələbə qazanmağımız üçün daha çox kömək edə bilərdilər”.
Zelenskinin bu monoloqunu həm də məğlubiyyətinin tam etirafı kimi qəbul etmək olarmı?
Hərbi-siyasi şərhçi, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, Rusiya-Ukrayna müharibəsi Rusiyanın Baş Qərargahı tərəfindən üç günlüyə planlaşdırılmış olsa da, müharibə artıq iki ilə yaxınlaşan müddətdə davam edir: “Rusiyanın da strateji planları sahədə öz yerini tapmadı. Onlar öz hərbi hədəflərinə nail ola bilmədilər. Ukraynanı da dəstəkləyən qüvvələr istəyirdilər ki, hərbi dəstəyin qarşılığında Ukrayna ən azı keçən yazın başlanğıcında əks hücum əməliyyatlarını keçirəndə itirilmiş torpaqları nəzarətə götürülsün. ABŞ, Şimali Atlantika Alyansına daxil olan 31 ölkə və digər 52 ölkənin hərbi və maliyyə dəstəyi ilə Ukrayna da sahədə hərbi-siyasi hədəflərini yerinə yetirə bilmədi. Verilən hərbi - texniki dəstəyi nailiyyətə çevirmək mümkün olmadı. Bunun üzərindən, ABŞ artıq maliyyə dəstəyini dayandırdı. Konqres 104 milyon ABŞ dolları ayırmalı idi, onun da yarısı İsrailə, yarısı da Ukraynaya getməli idi. Konqres onu təsdiqləmədi. Belə olduğu halda, ABŞ Avropaya mesaj verdi ki, gerisi sizin məsələdir. Yəni öz gücünüzlə Ukraynanı dəstəkləyə bilirsizsə, edin. Ukrayna prezidentinin də müsahibəsinin arxasında o durur ki, artıq istədiyi dəstəyi əvvəlki kimi ala bilmir. Ən azı F-16 qırıcı təyyarələri, raketləri ala bilmirlər. Sahədə müharibə sürünmə frazasına keçib. Amma hər iki tərəfdən böyük resurslar xərclənir müharibəyə. Ukrayna ona ayrılan 200 milyard dollarlıq dəstəyi hərbi nailiyyətə çevirə bilmədi. Onun müttəfiqləri də anladılar ki, müharibənin istədikləri kimi getməsi üçün eyni o qədər də vəsait ayrılmalıdır. O da öz yerini tapmasa nə nəticə verəcək? Bir az tərəddüd içindədirlər. Bu səbəbdən də Ukrayna prezidentini, Ukrayna xalqının hərbi rəhbərliyini Rusiyanın şərtlərində masaya oturmağa dəvət edirlər. Zelenskinin şikayəti odur ki, biz indiyə kimi döyüşmüşük, hərbi dəstək verin, yenə döyüşək. Ona görə də, bir yerə qədər Avropaya daxil olan ölkələr onların öz təhlükəsizlik konsepsiyası üzərindən Ukraynanı dəstəkləyəcəklər. 2024 - cü ilin yaz kampaniyasını da görəcək. İndiki vəziyyətdə Rusiya Ukraynadan daha güclüdür. Əgər Ukraynanın istədiyi dəstək gələrsə, vəziyyət dəyişə bilər”.
Məhəmmədəli QƏRİBLİ
