Makron Qərb ölkələrini Ukrayna məsələsində “hərifləyib” - qoyduğu qəpik-quruşdur...
Ramil Hüseynov: “Bütün bunlar bir sıra qaranlıq məqamlardan xəbər verir”
Fransa hakimiyyətinin daha bir simasızlığı. Deməli, Fransa üzdə Rusiyanın Ukraynaya hücumuna qarşı olduğunu deyir. Ancaq əməldə tam bunun əksinə mövqe sərgiləyir.
Məsələn, Fransa Almaniyanın Ukraynaya hərbi yardımına qarşı qəti mövqe sərgiləməyə başlayıb. Məsələnin maraqlı tərəfi həm də odur ki, ABŞ 2022-ci il fevralın 24-dən, yəni Rusiya-Ukrayna müharibəsi başlayandan indiyə kimi Ukraynaya 46,6 milyard dollar, Almaniya – 18,9 milyard dollar, Böyük Britaniya – 7,3 milyard dollar, Norveç – 4,1 milyard dollar, Danimarka - 3,9 , milyard dollar, Polşa - 3,3 milyard dollar, Niderland – 2,7 milyard dollar, Kanada – 1,8 milyard dollar, İsveç – 1,6 milyard dollar, Finlandiya – 1,4 milyard dollar yardım etdiyi halda, indiyə qədər Fransanın Ukraynaya etdiyi hərbi yardım cəmi 544 milyon avro olub.
Üstəlik, prezident Emmanuel Makron utanmaz-utanmaz bəyan edib ki, Ukraynanın Rusiyaya məğlub olması fəlakətdir və buna imkan vermək olmaz. Yardım artırılmalıdır. Ukraynaya ən aşağı məbləğdə yardım edən Fransa prezidentinin belə danışmağa nə haqqı var?
“Bu onu göstərir ki, Parislə Moskva arasında gizli əlaqələr var və Makron Ukrayna əleyhinə sövdələşməyə hazırdır”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, bütün bunlar Makron hakimiyyətinin siyasi riyakarlığını ortaya qoyur: “Bu, müəyyən mənada təəccüblü deyil. Niyə? Ona görə ki, Ukrayna müharibəsi yeni başlayanda Fransa prezidenti Makron pərdəarxası danışıqlarda Kiyevi təslim olmağa çağırırdı. Hətta Makron Zelenskini inandırmağa cəhd etmişdi ki, ölkəsi uzun müddət Rusiyanın qarşısında duruş gətirə bilməyəcək. Sonra görəndə ki, Ukrayna xalqı müqavimət göstərmək əzmindədir, Birləşmiş Ştatlar hərbi yardımı genişləndirir, Paris bir qədər mövqeyini dəyişdi. Ancaq bu, nəticə etibarilə Fransanın Ukraynaya ciddi hərbi yardım göstərməsinə gətirib çıxarmadı. Halbuki, Fransa Avropa İttifaqının təkcə iqtisadi lokomotivi deyil. Fransa çox güclü hərbi-sənaye kompleksinə malikdir. Fransa həm müdafiə, həm də hücum xarakterli müasir silahlar istehsal edir. İstisna etmirəm ki, zamanında Fransa istehsal etdiyi hərbi silahları Ukraynaya versəydi, ən azından böyük bir ərazi işğal olunmazdı. Fransanın indiyə qədər çox məhdud həcmdə Ukraynaya hərbi yardım etməsi bir sıra qaranlıq məqamlardan xəbər verir. Bu onu göstərir ki, Parislə Moskva arasında gizli əlaqələr var və Makron Ukrayna əleyhinə sövdələşməyə hazırdır. Ola bilsin ki, Makron Ukraynanın bölünməsini istəyir. Makronun Ukrayna ilə bağlı müdafiə xarakterli son açıqlaması siyasi riyakarlıqdır. Fransa Ukraynanın məğlub olmamasında maraqlı olsaydı, İsveç kimi NATO üzvü olmayan ölkə ilə müqayisədə belə az həcmdə hərbi yardım etməzdi. Ona görə də sadalanan rəqəmlər və onların müqayisəsi Fransanın əsl xəyanətkarlığını ortaya qoyur”.
Vidadi ORDAHALLI
