Pakistan-İran toqquşmasında Bakıdan gözlənilən mövqe...
Qabil Hüseynli: “Azərbaycan bu məsələdə birmənalı olaraq Pakistanı dəstəkləməli, beynəlxalq təşkilatlarda isə İranın mövqeyini tənqid etməlidir”
Pakistanın İrana raket hücumu nəticəsində 9 nəfərin öldüyü bildirilir. İran hücum nəticəsində 3 qadın, 4 uşaq və 2 kişinin öldüyünü açıqlayıb.
Bu hücum İranın iki gün əvvəl Pakistanda yerləşən üsyançı qruplaşmanı hədəf alaraq Pakistan ərazisinə raket zərbəsi endirməsindən sonra baş verib.
Pakistan zərbələrin nəticəsində iki uşağın həlak olduğunu açıqlayıb.
İran rəsmiləri isə bu səhər həlak olmuş qadın və uşaqların İran vətəndaşı olmadıqlarını deyib.
İki ölkənin, xüsusən də İran və Pakistan kimi iki böyük, nüfuzlu dövlətin bir-birinə belə qarşılıqlı zərbələr endirməsi heç yaxşı əlamət deyil.
Maraqlıdır ki, bu ölkələrdən biri Azərbaycanın yaxın qonşusudur. Pakistan isə bizimlə müttəfiq dövlətdir.
Sual yaranır: İran-Pakistan qarşıdurmasında Azərbaycanın tutacağı mövqe necə olmalıdır? Nəzərə almalıyıq ki, hər ikisi müsəlman dövlətidir. Buna bənzər situasiya ilə Azərbaycan İsrail-Fələstin məsələsində rastlaşdı və balanslı davranış ortaya qoydu. Bu təcrübədən yararlanmaq lazımdır, yoxsa fərqli kurs tələb oluna bilər?
Politoloq Qabil Hüseynli “Bakı-Xəbər”ə açıqlamasında bildirdi ki, Azərbaycan bu məsələdə birmənalı olaraq Pakistanı müdafiə etməlidir: “Çünki İran bütün qonşularının işinə müdaxilə etdiyi kimi, onun da daxili işlərinə qarışır. Partizan və quldur dəstələri yaradaraq həmin dövlətə ziyan vurur. Pakistanla İran arasındakı ziddiyyət əsasən Bəlucustan məsələsinə görədir. Bəlucustanın böyük bir hissəsi Pakistandadır, yalnız 40 faizi İran ərazisinə düşür. İran bəluclardan ibarət partizan dəstələri düzəldərək, həmin ölkədə təxribatlar törədir. Oradakı daxili sabitliyi pozmağa çalışır. Bu səbəbdən də Pakistan sərt cavab verdi. Dəqiq kəşfiyyat məlumatları əsasında İran ərazisində bəluc partizanların hazırlandığl məntəqələrə ciddi zərbələr endirdi. İran hansı ölkənin ərazisində sakit dayanır? Bizim ərazimizdə də casus şəbəkəsi vasitəsilə “kərimə dövləti” yaratmaq istəyir. Səudiyyə Ərəbistanına qarşı husiləri ayağa qaldırıb. Yaratdığı dəniz quldurlarından İsrailə qarşı da istifadə edir. Bir yerdə dayanan ölkə deyil. Şər bucağıdır desək, yanılmarıq. Ona görə də Azərbaycan bu məsələdə birmənalı olaraq Pakistanı dəstəkləməli, beynəlxalq təşkilatlarda isə İranın mövqeyini tənqid etməlidir”.
Görünür, hər iki tərəfin hücumları mütənasib olub, ona görə də burada gərginliyin azaldılmasına yer qalıb. Çünki hər iki ölkə onları təhdid edən terror qruplarına hücum edir, hər iki ölkənin sakitləşməyinə yer var.
Həm İranın, həm də Pakistanın güclü müttəfiqi olan Çin, eləcə də Türkiyə və Əfqanıstanda hakimiyyəti ələ almış Taliban tərəfləri təmkinli olmağa və gərginlikdən qaçmağa çağırıb.
Məhəmmədəli QƏRİBLİ
