ASALA "dirildi" - erməni terrorunun yeni ilk qurbanları kim olacaq...
Elşad Həsənov: “Açıq meydanda məğlub olan Ermənistanın terrora keçməsi mümkündür”
Son günlər ASALA adlı erməni terror təşkilatının yenidən fəallaşdığı, hətta Ermənistanda təlimlər keçdiyi ilə bağlı fikirlər səslənir. Bununla bağlı hətta xarici media resurslarında da məlumatlar dərc edilib.
Bəllidir ki, sözügedən terror təşkilatının əvvəllər əsas hədəfi türk diplomatları olub. Maraqlıdır, hazırda onların hədəf seçəcəyi obyektlər və ölkələr hansılar ola bilər?
Təhlükəsizlik orqanlarının veteranı, siyasi şərhçi Elşad Həsənov “Bakı-Xəbər”ə açıqlamasında bildirdi ki, Ermənistan daim terrorçu təşkilatları yaradıb və onları dəstəkləyib:”Çünki Ermənistan özünün “Böyük Ermənistan” kimi sərsəm ideologiyasını həmin təşkilatlara təbliğ edib. Onların bu istəkləri ürəklərində qaldı. Çünki millət olaraq onlar hər zaman satqınçılıqla məşğul olublar. Tarixdəki böyük ədiblər, filosoflar ermənilər haqqında bunu deyiblər. ASALA təşkilatı 1925-ci ildə Akop Akopyan və Akop Taraxçiyan tərəfindən yaradılıb. Mənzil qərargahları Livanın Beyrut şəhərində olub. Təlimlərini də əsasən Suriyada keçiblər. Terrorçuları hazırlayıblar ki, türk diplomatlarını qətlə yetirsinlər. Bir çox türk diplomatlarını da öldürməyə nail olublar. Bunların xisləti belədir. Açıq meydanda məğlub olan Ermənistanın terrora keçməsi mümkündür. ASALA-nın Ermənistanda yenidən cücərməsi ilə bağlı xarici mediada məlumatlar yayılır. İKT-nin güclü inkişaf etdiyi bir vaxtda belə məlumatlar gizli saxlanıla bilməz. 30 il Azərbaycan ərazilərini işğal etdi, dağıtdı. Sonra Azərbaycan öz ərazi bütövlüyünü təmin etdi. Ermənilər bizə hər sahədə uduzduqları üçün, köhnə üsullara əl atmaq istəyirlər. Onların ilk növbədə hədəfləri Azərbaycanın siyasi rəhbərliyi, diplomatları ola bilər. Bizim müvafiq orqanlar bu istiqamətdı lazımi tədbirlər görürlər. Onların atacağı addımlarla bağlı əks tədbirlər görülür. Biz, lazım gəlsə, onların Ermənistandakı ocaqlarını belə öz müasir silahlarımızla məhv etməyə hazırıq. Terrorun kökü belə kəsilməlidir. Ermənistan yaxın zamanda bizim təklif etdiyimiz sülh sazişini imzalasa, Zəngəzur dəhlizini açsa, onların da vəziyyəti normal olacaq. Əksinə olsa, onlara heç bir vasitə kömək etməyəcək. Azərbaycan müharibədə zəfər çalandan sonra da silahı terə qoymayıb. Ordusunu və təhlükəsizliyini daha da gücləndirir. Bizim ordumuzda peşəkar orduya keçid sürətlənir. Hərbçilərimizə xüsusi diqqət göstərilir. Biz hər an düşmən təxribatına hazır olmalıyıq. Onlar belə revanşist fikirlərdən əl çəkməsələr, başları yenidən əziləcək”.
Son gedişlər göstərir ki, ASALA və VOMA kimi erməni terror təşkilatları yenidən aktivləşdirilir. Erməni politoloq Aram Poqosyanın Ermənistan KİV-ə açıqlamasında səsləndirdiyi fikirlər də bunu sübut edir. Politoloq qeyd edib ki, “proksi qüvvələrin” orduya inteqrasiyası təmin olunmalıdır. Cənubi Qafqazda cərəyan edən hadisələrin mənafelərinə cavab verməməsi fonunda erməni diasporu, xaricdəki müəyyən dağıdıcı qüvvələr öz maraqlarını təmin etmək üçün yenidən terror təşkilatlarına üz tuturlar. Bu əsasda da ASALA və VOMA kimi terror təşkilatları yenidən gücləndirilir.
Qeyd edək ki, VOMA terror təşkilatı yaxın dövrlərdə yaradılıb. Bu təşkilat PKK-dan, “ASALA”nın törəmələrindən ciddi dəstək alır. Terror təşkilatına erməni əsilli Rusiya vətəndaşı, kəşfiyyatçı Vova Vartanov başçılıq edir.
Məhəmmədəli QƏRİBLİ
